Kananet 22 - Tennet

Atiman Ta̱mu̱ta̱dde̱n tu̱we̱ne̱t ci Aburahami

¹ Baling abak Aburahami e̱rki̱to̱k u̱gge̱ lo̱o̱ce̱ neci, itiman zin Ta̱mu̱ta̱dde̱n Aburaham. A̱nne̱k nonno ne, “Aburaham!” Awe zin enne azi ne, “Annit icu.”

² Izek zin Ta̱mu̱ta̱dde̱n nonno ne, “Dima ngerunne I̱sa̱ko̱ wa o̱de̱ ṯok irezi i̱nna̱ oroot ko̱, kar bit lo̱o̱ce̱ ci een Moriah. Bit pak nonno kize wawac ci i̱va̱dde̱ biyene ne̱ke̱ co̱de̱, kokko atin ka̱du̱wa̱ki̱ zoz neci.”

³ Ma̱i̱je̱ nge̱rre̱t i̱i̱te̱n ci reng, itinga Aburahami kar kaarik i̱jjo̱ zi̱gi̱r cinne. Kar kuwe ki du̱cca̱k ciginnek rama ki ngerinne I̱sa̱ko̱. Baling u̱du̱la̱ enne rimma cik meelek kize cik ivade enne i̱di̱ng, uk zin ngati u̱du̱wa̱k Ta̱mu̱ta̱dde̱n nonno anyik kuk ke̱.

⁴ Imma i̱i̱te̱ne̱ ci een i̱i̱yo̱, icin Aburahami ta̱dde̱n kar kedenya ngin neci meer reena.

⁵ U̱du̱wa̱k zin enne du̱cca̱k ciginnek a̱nne̱k ne, “A̱vvu̱t ngatu ki zi̱gi̱r ngen anna ki do̱le̱c kovvoya ngati. Kovvoya naga kalayya Ta̱mu̱ta̱dde̱n kar atidic kobodanna rok i̱ge̱ta̱.”

⁶ Idima Aburahami rimma cik ovvo nege ivade i̱di̱ng kar kaanyik ngerinne I̱sa̱ko̱ kodong, okko enne anyak gwo̱o̱ ki abaz. Imma baling ovvo nege owo nga̱to̱de̱,

⁷ ozozik zin I̱sa̱ko̱ baatinne a̱nne̱k ne, “Baba?” O̱bo̱de̱k zin Aburahami nonno, “Wou, ngeranni?” Azi I̱sa̱ko̱ ne, “Kanyak naga gwo̱o̱ ki rimma ngatu, abarik zin i̱nno̱ nyoon ci a̱zze̱to̱ ci kovvo kapahek Ta̱mu̱ta̱dde̱n ko̱?”

⁸ Abarizek zin Aburahami nonno a̱nne̱k ne, “Ngeranni, aanyyet atidic Ta̱mu̱ta̱dde̱n eliya nyoon ci kovvo naga kapahek nonno.” Kar nege cik e̱e̱ggi̱n rama ko̱ koot nga̱to̱de̱.

⁹ Baling u̱zu̱cca̱ nege ngin bali a̱du̱wa̱k Ta̱mu̱ta̱dde̱n nonno zoz cinne ke̱, eteheeny zin Aburahami i̱te̱le̱ nginati kar zin ketevetek rimma cik gwo̱o̱ya̱k. A̱gga̱m zin ngerinne I̱sa̱ko̱ kar keceb, kar zin kabahek rimma ne̱ke̱.

¹⁰ I̱tto̱n zin a̱zzi̱t idima abaz kar weete kotodong ngerinne.

¹¹ Ma̱i̱je̱ anjilo ci Manyi utu nonno ta̱mu̱-kenga izek ne, “Aburaham! Aburaham!” Awe zin enne azi ne, “Wou! Annit icu ngatu ko̱.”

¹² Izek zin anjilo nonno ne “Ma zin ogonik nonno gi̱i̱ imma. I̱yo̱ko̱ ka̱gga̱wa̱ ming o̱ngo̱o̱le̱ i̱nna̱ Ta̱mu̱ta̱dde̱n, eci iróng i̱nna̱ a̱ju̱ra̱ka̱ annit ngerunne ci o̱de̱ ṯok ko̱.”

¹³ Edev Aburahami ta̱dde̱n, kar zin kicin mirkic ci odowan o̱to̱ keeta. Uk enne nginati kar kooga mirkic neci kar zin ketted kapahek Ta̱mu̱ta̱dde̱n kize i̱di̱ng ci ivade karagiz nginti ngerinne.

¹⁴ Akatek zin Aburahami ngin neci kize zara aanyet atin Manyi gi̱i̱ imma. Rok i̱yo̱ko̱ bu̱k ngen ol awu ngin neci kize “Biye cu, aanyet atin Manyi gi̱i̱ imma.”

¹⁵ Utu zin bo̱do̱k anjilo ci Manyi Aburaham ta̱mu̱-kenga lak rama,

¹⁶ a̱nne̱k ne, “Ki̱tto̱ni̱k anna ele cinanni, ming ozoz Manyi, eci i̱nna̱ u̱tu̱gu̱ zoz necu iróng a̱ju̱ra̱ne̱ ngerunne wa o̱de̱ ṯok,

¹⁷ ka̱mu̱yu̱ki̱ zin atin anna i̱nne̱t de̱de̱ kar kanyik dooli cigunnek kizeto meele ku̱tu̱gu̱zzo̱ kiwagon munyunya ta̱mu̱-kenga, kar bo̱do̱k ki i̱yo̱ko̱ azac liil ti̱ti̱ma̱. Aama atin dooli cigunnek o̱ro̱gjo̱k ngati mo̱ddo̱ cigge̱k,

¹⁸ kar zo̱ze̱ ci dooli cigunnek, amuda atin ol lo̱o̱co̱we̱ do̱o̱k ma̱yu̱we̱ne̱t, eci i̱nna̱ o̱ngo̱o̱li̱na̱n.”

¹⁹ I̱mi̱ro̱zi̱k Aburahami ki I̱sa̱ko̱ du̱cca̱k waginnek ke̱, kar zin koot ki Beersheba. Kar zin Aburahami kabak Beershebakte.

Dooli cik Nahori

²⁰ Kar bali i̱i̱te̱n imma vu̱rrta̱, u̱du̱ktta̱k ol Aburaham zoz ci azi ne, “Een Milcah bu̱k ngaa; i̱ti̱rra̱k enne logoz gotonnu Nahor:

²¹ Uz ngerinne wa een a̱bu̱, ki Buz gotoni, Kemuel wa een be̱e̱ti̱ Arami,

²² ki bo̱do̱k Kesed, Hazo, Pildash, Jidlaph ki Bethuwel.”

²³ Okko Bethuweli a̱rri̱ta̱ buweenyinne ci een Rebekah. A̱rri̱ta̱k Milcah logoz cik e̱e̱ggi̱n tu̱rge̱ ko̱ Nahor gotoni Aburaham.

²⁴ Okko Reumah ngaa ci Nahori rianto ko̱ a̱rri̱ta̱ logoz ciko: Tebah, Gaham, Tahash ki Maacah.