Kananet 2 - Tennet

¹ Eenyca zin bali Ta̱mu̱ta̱dde̱n ta̱mu̱-keng ki lo̱o̱c ki kaal do̱o̱k go̱o̱le̱ neci.

² Ma̱i̱je̱ baling edeccai teheenyinet wazine wa een torkonom, omon zin Ta̱mu̱ta̱dde̱n teheenyinta i̱i̱te̱ne̱ wa een turgerem.

³ U̱mu̱yu̱k zin Ta̱mu̱ta̱dde̱n i̱i̱te̱n ci een turgerem ke̱ ki̱li̱li̱, kar zin katahala ka̱vvu̱ do̱ kize ci u̱yu̱be̱ enne li̱ngli̱ngo̱nte̱ cinne.

Adam ki Eva ngati een Eden

⁴ Een necu zoz ci bali eenycane Ta̱mu̱ta̱dde̱n ta̱mu̱-keng ki lo̱o̱c. Baling idiman Manyi Ta̱mu̱ta̱dde̱n lo̱o̱c ki ta̱mu̱-keng,

⁵ ngen zin ba̱li̱ye̱ keena ki arte ki̱ti̱li̱zza̱. Ngen Manyi Ta̱mu̱ta̱dde̱n kaanyik ta̱mu̱ kiṯil, kar zin bo̱do̱k ki̱zzi̱ rok e̱e̱t ci diiri ci eev lo̱o̱c to.

⁶ Ma̱i̱je̱ maama ibboryai lo̱o̱ta̱ todowai kar zin kabaltte lo̱o̱ta̱ ta̱dde̱na̱.

⁷ Idima zin Manyi Ta̱mu̱ta̱dde̱n todowa u̱gge̱ lo̱o̱ta̱ kar zin keteheenya e̱e̱t ci diiri. Utubuwek zin Ta̱mu̱ta̱dde̱n vongiz ci rugeto, kar kaanyik nonno ruget.

⁸ Idiman zin Manyi Ta̱mu̱ta̱dde̱n ma̱na̱ ci abunna nyaate ci een zara Eden o̱to̱ne̱ ci je̱e̱ni̱. Kar zin enne karik e̱e̱t ci maci ngineci.

⁹ Kar zin Manyi Ta̱mu̱ta̱dde̱n kaanyik keen balik meelek arir enne ke̱ ki̱bbi̱re̱to̱ nginati, keen cik abunna e̱e̱ggi̱n da̱i̱ne̱t. Imma orgene ci ma̱nu̱, anyak keet ci aanyik ol ruget. Kar bo̱do̱k anyak keet ci aanyik ol ka̱gga̱c zoz ci abunna ki ci gerze. Arike zin Ta̱mu̱ta̱dde̱n e̱e̱t bali eenyca enne ke̱ ngineci.

¹⁰ Anyak da̱ moro ci a̱ri̱k orgene ci ma̱nu̱, a̱ri̱ya̱ ngati een Eden, aanyik ma̱na̱ kitiliz ju̱rru̱m. Engerye moro neci kize li̱i̱llo̱k we̱c.

¹¹ Azi zar cik co̱de̱ ne, Pishon, a̱ri̱k liili necu lo̱o̱ce̱ ci da̱ een Havilah, lo̱o̱c ci amudanne zu̱rte̱ne̱n cik een dhahab.

¹² Abunna bali dhahabi ci lo̱o̱c neci, maal ci ongooli laala ki biyen cik ataltali.

¹³ Een zara cik liil imma ne, Gihon ci a̱lu̱c lo̱o̱c ci een Kush.

¹⁴ Azi bo̱do̱k imma zar ne Tigiris ci a̱ri̱k je̱e̱ne̱ ci lo̱o̱c ci een Assyria, kar zin liili ci een we̱c ko̱ zara kize Yuvurataz.

¹⁵ Aarik zin Manyi Ta̱mu̱ta̱dde̱n e̱e̱t ci diiri ko̱ ma̱na̱ ci een Eden kar keev kar bo̱do̱k kebek.

¹⁶ Kar zin Manyi Ta̱mu̱ta̱dde̱n kizek nonno ne, “Dak keen ne̱k manato ko̱ do̱o̱k.

¹⁷ Ma̱i̱je̱ keet wa aanyi i̱nne̱t gga̱ gi̱i̱ ci abunna ki ci gerze ko̱, ma adai. Ming adau o̱ya̱u̱ cik keet neci, a̱da̱i̱ atin i̱nna̱ de̱de̱.”

¹⁸ Ize zin Manyi Ta̱mu̱ta̱dde̱n ne, “Iróng abunna ming aave e̱e̱ti̱ ci maci do̱, korongi kidimana e̱e̱t ci diiri imma kudukto ki nonno kar kozolit baiz.”

¹⁹ Anyaha zin Manyi Ta̱mu̱ta̱dde̱n elegje ki iballi balik eteehenya enne todowai ke̱. Kar zin kanyahak e̱e̱t ci diiri kar kakatek zar do̱o̱k.

²⁰ Akatek zin e̱e̱ti̱ ci diiri elegje wak o̱rgu̱ ki iballi ki elegje wak zarak do̱o̱k zar. Gool zin bali arubane kaala zar ko̱ nenen necu. I̱llo̱i̱ zin ba̱li̱ye̱ elegjene ne̱ko̱ do̱o̱k ci ogon ki Adami.

²¹ Aanyik zin Manyi Ta̱mu̱ta̱dde̱n Adam kudung oroot kar zin kaara onyit cinne co̱de̱ kar zin ku̱bu̱ng ngineci,

²² uk zin idimana ngaa onyite neci. Anyahak zin Manyi Ta̱mu̱ta̱dde̱n ngaa necu Adam.

²³ U̱ku̱le̱k zin enne je̱e̱n ize ne, “E̱e̱t imma ci katubona ki annita icu! Engeryai meer enne eliye cinanni, kakanek zin anna nonno kize ngaa, eci bali enne adimanai ngati e̱e̱t ci maci.”

²⁴ Eci zo̱ze̱ necu, ungnek atin e̱e̱ti̱ ci maci baatinne ki yaatinne lo̱o̱c kar koot kurumet baiz ki ngaa cinne, kar nege kizeto ele co̱de̱.

²⁵ Baling aavtte e̱e̱ti̱ ci maci ki ngaa do̱o̱k nga̱dhi̱ri̱r ke̱ nu̱nu̱n, a̱zze̱ bali ngatinne̱ng rok a̱li̱ya̱n bu̱k to.