Kananet 17 - Tennet

Baayenit ci orong Ta̱mu̱ta̱dde̱n Aburam ketted kar ka̱gga̱we̱

¹ Baling izeto Aburam e̱rki̱to̱wa̱ moten torkoc ki torkoc, i̱ye̱le̱k zin Manyi Ta̱mu̱ta̱dde̱n ele nonno kar zin kizek ne, “Ke̱e̱ni̱ anna Ta̱mu̱ta̱dde̱n wa anyak Komiz do̱o̱k, li̱ngli̱nge̱ zoz cinanni kar ize e̱e̱t ci iróng anyak mu̱nye̱n.

² Kogonni atin anna olom bali kozoz ki i̱nne̱t ke̱ kar atin kanyik dooli cigunnek kizeto meele kar kotoraung izet meele.”

³ Atangu zin Aburami kicin ngu̱m cinne lo̱o̱c, kar Ta̱mu̱ta̱dde̱n kizek nonno ne,

⁴ “Eci ngatinanni een necu olom cinanni ki i̱nne̱ta̱: E̱e̱ni̱ atin i̱nna̱ be̱e̱ti̱ i̱do̱ngi̱ cik lo̱o̱cco̱k cik meelek giir.

⁵ Iróng atin bo̱do̱k zara cigunnek e̱e̱ggi̱n Aburam; e̱e̱ggi̱n atin zara cigunnek Aburaham, ma̱rri̱t ming kanyi i̱nne̱t ize be̱e̱ti̱ i̱do̱ngi̱ cik meelek.

⁶ Kaanyi atin i̱nne̱t ti̱i̱r mog taurak; kadimani atin anna i̱do̱ngi̱ doolinne cigunnek, a̱vvu̱ atin alaata bu̱k ngatunne.

⁷ Kazunne atin anna olom cinanni ki i̱nne̱t kize ci aave udut ku̱ru̱m ci doolinnu veelek bu̱u̱llo̱k ki bu̱u̱llo̱k, ke̱e̱ni̱ Ta̱mu̱ta̱dde̱n cunne ki bu̱u̱llo̱k cik a̱vvu̱ vu̱rrta̱.

⁸ Kaanyi atin anna i̱nne̱t lo̱o̱c ci Kanaani ci i̱yo̱ko̱ abahe i̱nna̱ ize i̱do̱ngo̱je̱ni̱t ko̱, kize cunne udut ki dooli cigunnek; ke̱e̱ni̱ atin anna Ta̱mu̱ta̱dde̱n cinne̱ng.”

⁹ Iizek zin bo̱do̱k Ta̱mu̱ta̱dde̱n Aburaham ne, “Imma ngatunne, abunna la̱du̱n i̱nna̱ ming azunne olom cinanni, i̱nne̱t ki dooli cigunnek ki bu̱u̱llo̱k cik atin a̱vvu̱ ke̱.

¹⁰ Een necu olom cinanni ki i̱nne̱t ki dooli cik atin a̱rri̱ta̱ i̱nna̱ do̱o̱k, olom ci azunne i̱nna̱ icu: Anyik dooli cik macik orgene cunno̱ng kettedit wucic vi̱ca̱vi̱cce̱t.

¹¹ Abunna ming etteddu wucic vi̱ca̱vi̱cce̱t kar kize baayenit ci olom cinanni ki i̱ge̱ta̱.

¹² Eci bu̱u̱llo̱we̱ cik atin a̱vvu̱ ko̱, anyik la̱du̱n do̱le̱c kettede wucic vi̱ca̱vi̱ca̱ ming een gwo̱o̱nya̱ ciginnek tu̱rge̱, anyik bo̱do̱k dooli cik ollu a̱rri̱ta̱i̱ ce̱e̱ze̱ cunne bu̱k kettedit wucic vi̱ca̱vi̱ca̱ icima dooli cik a̱gga̱mnya̱i̱ moddene o̱ro̱bi̱ya̱i̱.

¹³ Anyik dooli do̱o̱k la̱du̱n kettedit wucic vi̱ca̱vi̱cce̱t, cik a̱rri̱ta̱i̱ ce̱e̱ze̱ cunne icima cik a̱gga̱mnya̱i̱ moddene o̱ro̱bi̱ya̱i̱. Anyik olom cinanni aave eliye cunne ko̱ ka̱vvu̱ udut.

¹⁴ Ming ngen e̱e̱ti̱ imma ketted wucic vi̱ca̱vi̱ca̱ cinne, engeryai atin enne ngati ol ciginnek; u̱du̱l enne olom cinanni.”

¹⁵ Iizek bo̱do̱k Ta̱mu̱ta̱dde̱n Aburaham ne, “Eci zo̱ze̱ ci ngaa cunne Sarai, ma ngen bo̱do̱k awu nonno kize Sarai; anyik zar ciginnek kize Sarah.

¹⁶ Ka̱mu̱yu̱i̱ atin anna nonno kar ki̱ti̱rra̱i̱ i̱nne̱t do̱le̱c ci maci. Ka̱mu̱yu̱i̱ atin nonno kize e̱e̱ti̱ i̱do̱ngi̱nnu̱ kar atin alaata cik a̱ddi̱ki̱re̱ a̱vvu̱ ce̱e̱ze̱ cunne.”

¹⁷ Uluc zin Aburahami oo kar zin katarar, i̱no̱n kar kizek ele ne, “A̱rri̱t ucca bo̱do̱k wo̱ye̱ e̱e̱ti̱ ci izeto e̱rki̱to̱wa̱ o̱bo̱n co̱de̱ (100)? A̱rri̱ta̱ wo̱ye̱ atin Sarah do̱le̱c ngati izeto e̱rki̱to̱wa̱ ciginnek moten torkoc?”

¹⁸ Iizek zin Aburaham Ta̱mu̱ta̱dde̱n ne “Anyik Ismail kabak ma̱yu̱we̱nte̱ cunne!”

¹⁹ Ize zin Ta̱mu̱ta̱dde̱n ne, “I̱i̱ny, abarik atin ngaa cunne Sarah a̱rri̱ta̱ do̱le̱c ci maci, kar atin i̱nna̱ katek zar cik een I̱sa̱ko̱. Kazunne atin anna olom cinanni ki nonno kize olom ci aave udut ki dooli cik dooli ciginnek ming i̱zzi̱ enne to.

²⁰ Kar ngati Ismaili, kiziya anna zoz cunne: Ka̱mu̱yu̱i̱ atin anna nonno de̱de̱; kanyik atin anna ki̱ti̱r kanyak dooli cik meelek. Okko atin enne een be̱e̱ti̱ alaat cik e̱e̱ggi̱n omoto ki rama, kanyik atin dooli cik dooli ciginnek kokkomit kak.

²¹ Ma̱i̱je̱ olomi cinanni, kadimani atin ki I̱sa̱ko̱, ci okko atin ngaa ci een Sarah a̱rri̱ta̱ki̱ i̱nne̱t ko̱ nye̱lo̱wo̱ cu ele e̱rki̱ta̱.”

²² Baling edeca Ta̱mu̱ta̱dde̱n zoz ki Aburaham, utungek zin nonno lo̱o̱c.

²³ Imma wazin neci ele, uwe zin Aburahami ngerinne Ismail ki ol wak macik do̱o̱k ce̱e̱ze̱ cinne ki dooli wak a̱rri̱ta̱i̱ ce̱e̱ze̱ cinne ki wak a̱gga̱mnya̱i̱ ki du̱cca̱k ki wak uutai o̱ro̱bi̱ya̱i̱, kar zin ketted nogo wucic vi̱ca̱vi̱cce̱t ki bali ming a̱du̱wa̱k Ta̱mu̱ta̱dde̱n nonno ke̱.

²⁴ E̱e̱ggi̱n e̱rki̱to̱wa̱ cik Aburahami moten torkoc ki torkoc ming etted enne wucic vi̱ca̱vi̱ca̱,

²⁵ okko ngerinne Ismaili e̱e̱ggi̱n e̱rki̱to̱wa̱ omoto ki i̱i̱yo̱;

²⁶ ettedde Aburahami ki ngerinne Ismail wucic vi̱ca̱vi̱cce̱t wazin co̱de̱.

²⁷ Ovvo ol cik macik ce̱e̱ze̱ ci Aburahami do̱o̱k, ki dooli wak a̱rri̱ta̱i̱ ce̱e̱ze̱ cinne ki wak uutai o̱ro̱bi̱ya̱i̱ i̱do̱ngi̱ne̱, ettede nogo wucic vi̱ca̱vi̱cce̱t do̱o̱k.