Kananet 16 - Tennet

I̱ti̱rra̱ Hagari Ismail

¹ Baling oto Sarai i̱zzi̱ rok do̱le̱c ci a̱rri̱ta̱k Aburam to, anyak da̱ buuwec imma ci Masiro azi zar ne Hagar.

² Iizek zin Sarai Aburam ne, “Aanya Manyi kize i̱le̱l. Iróng ucca oginnu ki la̱ngi̱ze̱ni̱t cinanni ko̱ nya? Kar wo̱ye̱ kavadan.” Elema Aburami zoz neci Sarai ke̱.

³ Baling abak Aburami lo̱o̱ce̱ ci Kanaani e̱rki̱to̱k omoto; idima Sarai, Hagar wa een Masirenit, du̱ca̱i̱t cinne anyik ka̱ta̱gu̱zzo̱ ki Aburam mac wainne.

⁴ Ma baling a̱ta̱gu̱zzo̱ enne ki Hagar, anyaho Hagari. Ma baling a̱gga̱ Hagari ming anyaho, ibbez zin enne Sarai.

⁵ Iizek zin Sarai Aburam ne, “I̱nne̱t do̱o̱k ci anyahaka zoz ci kapirnane ko̱, ki̱rye̱ki̱ du̱ca̱i̱t cinanni anna eliya izong, baling okko a̱gga̱ ming anyaho niko, kar zin kibbezan. Etted atin Manyi zoz cinanni ki i̱nne̱ta̱.”

⁶ O̱bo̱de̱k zin Aburami Sarai a̱nne̱k ne, “Ngane du̱ca̱i̱ti̱ cunne aave azzine cigunnek, tu̱gu̱we̱k gi̱i̱ ci ette orong ogonike labak.” U̱tu̱gu̱ zin Sarai Hagar gerzet, kar enne ki̱vi̱r ngatinne.

⁷ Umuda zin anjilo ci Manyi Hagar ming ojongzo ki ṯu̱k ci aave balala. Aave bo̱do̱k e̱be̱re̱ci̱ ci maamu go̱o̱le̱ ci okko ki Shur abanyca.

⁸ Izek zin nonno ne, “Hagar du̱ca̱i̱t wa Sarai, a̱kku̱nni̱ nga, okko ki i̱ni̱n?” O̱bo̱de̱k zin Hagari nonno, a̱nne̱k ne, “Ka̱vi̱ri̱ ja anna ngati ddi̱ki̱ryo̱i̱t wananni Sarai.”

⁹ Iizek zin anjilo ci Manyi nonno ne, “Mi̱re̱ bit ngati ddi̱ki̱ryo̱i̱t cunne kar abunna ming o̱ngo̱o̱le̱ nonno.”

¹⁰ Otorek zin bo̱do̱k anjilo ci Manyi ize ne, “Kotori atin dooli cigunnek kizeto meele giir ci iróng kikebi.”

¹¹ Iizek bo̱do̱k anjilo ci Ta̱mu̱ta̱dde̱no̱ Hagar ne, “Een do̱le̱c ci anyai i̱nna̱ kenga ko̱ lo̱gu̱t ci maci. Ming utuyai, katek zar kize Ismail ma̱rri̱t Manyi izik matiz cunne.

¹² A̱ku̱l atin enne ki zi̱gi̱ri̱ ci zaro; een atin enne mo̱dde̱ni̱t ci ollu do̱o̱k. Ovvo ol do̱o̱k oyok nonno, kar atin enne kabak jo̱o̱ra̱ ngati gotonogginnu do̱o̱k.”

¹³ Akatek zin Hagari Manyi wa ozozike nonno ke̱ kize zara “E̱e̱ni̱ i̱nna̱ Ta̱mu̱ta̱dde̱n ci acinnan.” Eci enne ize ne, “Kicina de̱de̱ Ta̱mu̱ta̱dde̱n wa acinnan.”

¹⁴ Zoz zin bali da̱ akanonik ṯu̱k neci zara kize Beer Lahai Roi ko̱ nenen. Ngen ṯu̱i̱ neci aave rok i̱yo̱ko̱ orgene ci Kadesh ki Bered.

¹⁵ Baling i̱ti̱rra̱k Hagari Aburam lo̱gu̱t ci maci, akatek Aburami zar kize Ismail.

¹⁶ E̱e̱ggi̱n bali Aburam e̱rki̱to̱wa̱ moten tu̱rge̱ ki torkonom ming a̱rri̱ta̱k Hagari nonno Ismail.