Kananet 15 - Tennet

Olom ci Ta̱mu̱ta̱dde̱no̱ ki Aburam

¹ Imma bali vu̱rrta̱, i̱ki̱ya̱k zoz ci Manyi Aburam o̱no̱zo̱we̱: “Ma o̱ngo̱o̱le̱ zoz imma Aburam. Ke̱e̱ni̱ anna i̱li̱b cunne, kazunni atin anna i̱nne̱t oroot.”

² Abarik Aburami a̱nne̱k nonno ne “Manyi Ta̱mu̱ta̱dde̱n wa abal kaal do̱o̱k, aanya atin nya eci i̱llo̱i̱ annit do̱le̱c ci okko atin aragiz ce̱e̱z cinanni ko̱, okko Eliezeri ci a̱kku̱ o̱rge̱ ci een Damascus ko̱ ci atin aragiz ce̱e̱z cinanni?”

³ Kar Aburami kize ne, “I̱llo̱i̱ dooli cik aanya i̱nna̱ annita; okko atin du̱ca̱i̱ti̱ imma ce̱e̱ze̱ cinanni aragiz ce̱e̱z cinanni.”

⁴ I̱ki̱ya̱k zin zoz ci Manyi nonno: “Iróng atin e̱e̱ti̱ neci aragiz ce̱e̱z cunne, abarik iyowa atin do̱le̱c ci maci eliye cunne kar atin karagiz ce̱e̱z cunne.”

⁵ Uwe zin enne nonno reena kar kize ne, “Cin ta̱dde̱n ta̱mu̱-keng kar zin ikeb munyuny, ming wo̱ye̱ ikebi nogo de̱de̱.” Kar enne kizek nonno ne, “I̱yo̱ko̱ zin, ovvo atin dooli cigunnek e̱e̱ggi̱n niko.”

⁶ Elema zin Aburami zoz ci Manyi, kar enne kanyik nonno kize e̱e̱t ci abunna.

⁷ A̱nne̱k bo̱do̱k enne nonno ne, “Ke̱e̱ni̱ anna Manyi bali kanyahanni i̱nne̱t o̱rge̱ ci een Ur lo̱o̱ce̱ ci een Chaldean kar kaanyi lo̱o̱c cu kize cunne.”

⁸ Abarik Aburami ize ne, “Manyi wa abal kaal do̱o̱k, ka̱gga̱ atin anna ku̱ okko looci cu een cinanni?”

⁹ A̱nne̱k zin Manyi nonno ne, “Nyahaka annit bozongit, ki eez ki mirkic, anyik kaal ne̱ko̱ do̱o̱k kanyait e̱rki̱nya̱ i̱i̱yo̱, nyaha bo̱do̱k ki lu̱be̱ ki joron ci lo̱be̱ru̱wo̱.”

¹⁰ Anyahak zin Aburami kaal ne̱ko̱ do̱o̱k nonno, etted zin orgena kar karik lo̱o̱c kedevto; iróng zin enne etted iballi bu̱k.

¹¹ I̱vi̱tta̱k zin u̱du̱va̱na̱ itazak i̱di̱ ne̱ke̱, ma̱i̱je̱ Aburami ottok nogo.

¹² Baling okko i̱i̱ i̱i̱zo̱, a̱gga̱mtta̱ unyaha Aburam, i̱ki̱ya̱ zin mu̱hu̱ri̱te̱ni̱ u̱bu̱ng nonno.

¹³ Izek zin Manyi Aburam ne, “Ka̱gga̱ niko ovvo atin dooli cik dooli cigunnek e̱e̱ggi̱n i̱do̱ngi̱ lo̱o̱ce̱ ci iróng een cinne̱ng, ovvo atin nege e̱e̱ggi̱n du̱cca̱k e̱rki̱nya̱ obet we̱c (400).

¹⁴ Ma̱i̱je̱ atin anna ke̱de̱zi̱ ol cik aanyik nogo kizeto du̱cca̱k ke̱, imma vu̱rrta̱, ovvo atin nege iyowa lo̱o̱ce̱ necu ki kaal cik meelek giir.

¹⁵ Imma i̱nna̱ okko atin ngato ji̱ji̱ti̱gu̱nne̱k labak ngati i̱nna̱ anyate oroot.

¹⁶ Imma ming izeto bu̱u̱llo̱wa̱ we̱c, ovvo atin dooli cigunnek oboda ngintu, eci ngen mu̱nye̱na̱ cik ol cik een Amorites ke̱le̱zzo̱.”

¹⁷ Baling i̱tto̱ i̱i̱, ize looci ba̱a̱li̱n, i̱ye̱la̱i̱ i̱jjo̱ ci a̱bbu̱rru̱t ki urez ci atukule kar kotozzo orgene ci i̱di̱ ne̱ke̱.

¹⁸ Kar i̱i̱te̱n neci, idiman Manyi olom ki Aburam kar kize ne, “Kanyike anna dooli cik dooli cigunnek lo̱o̱c cu, akane liile ci Masiro kuk rok liil ci a̱ddi̱ki̱re̱, een Yuvurataz,

¹⁹ ki lo̱o̱c ci Kenites, ki ci Kenizzites ki ci Kadmonites,

²⁰ ki ci Hittites ki ci Perizzites ki ci Rephaites

²¹ ki ci Amorites ki ci Kanaani ki ci Girgashites ki ci Jebusites.”