Ju̱da̱ 1 - Tennet

Zawinet

¹ Annita Ju̱da̱ wa ke̱e̱ni̱ gotoni Je̱mi̱s, wa een du̱ca̱i̱t ci Ye̱su̱ Ki̱ri̱sto̱ ko̱ ci keheri waraga cu. Keherakkung i̱ge̱t ol wak atahaltai ki bo̱do̱k wak irez Ta̱mu̱ta̱dde̱n wa een Be̱e̱ti̱nna̱ kar bo̱do̱k Ye̱su̱ Ki̱ri̱sto̱ kuzute nogo.

² Kala Ta̱mu̱ta̱dde̱n kar ka̱ma̱yu̱ng i̱ge̱t oroot kar ka̱a̱nyu̱ng deten, ki baiz ci abakku yahe ki rezinet.

De̱me̱zzo̱k cik volongak

³ Gotonogga ki ngonogga wak zinino, korongi anna de̱de̱ ketehereung zoz ci obod ki ti̱ri̱ze̱ne̱t ci Ta̱mu̱ta̱dde̱no̱ kozol naga ko̱, abarik korongi ketehereung kilalekkung abunna ming keleno ki tu̱we̱ne̱t ci a̱kku̱ lak co̱de̱ ko̱, aanyik Manyi ol wak a̱tu̱we̱ ko̱.

⁴ Eci anyak ol u̱gge̱ cik eher zoz ci adange nege Ta̱mu̱ta̱dde̱n, iniktozeung nege orgen cunno̱ng. Abarik zin ol ne̱ko̱ aminye deten ci Ta̱mu̱ta̱dde̱n cinna kize gool ci ogone nege kaal cik gerzek, kar kimigtoi Manyi cinna Ye̱su̱ Ki̱ri̱sto̱ O̱de̱ Ṯok niko. Ettede zin lo̱ki̱ko̱ ci ol ne̱ko̱ bali reena.

⁵ Ma wo̱ye̱ nu̱nu̱n ming a̱gga̱yyu̱ niga gi̱i̱ bali eelanne Manyi Ta̱mu̱ta̱dde̱n olli Israilo lo̱o̱ce̱ ci Masiro ke̱, korongi ku̱du̱wa̱u̱ng bo̱do̱k gi̱i̱ neci dee. Eela bali nogo Ta̱mu̱ta̱dde̱n Masira, imma bali vu̱rrta̱, idita ol wak iróng a̱tu̱we̱.

⁶ Imma anjilonya wak iróng azunne alaanzet cinne̱ng, abarik utungtek ce̱e̱zi̱ cigge̱k lo̱o̱c ta̱mu̱-kenga ngin bali abahe ke̱. I̱yo̱ko̱ zin e̱ce̱bje̱ nege ziiye cik aavtte udut, ere i̱i̱te̱n ci a̱ddi̱ki̱re̱ lo̱ki̱ko̱.

⁷ Ogon zin bo̱do̱k niko, a̱a̱dda̱ zin ol balik o̱ro̱gjo̱we̱ cik Sodomi ki Gomorrah ki bo̱do̱k o̱ro̱gjo̱k wak ojongzo ki nogo. Izeto ol ne̱ke̱ a̱li̱ya̱k, ottodo kiwagon elegje. I̱ye̱le̱k zoz necu ol zoz ci ovvo atin ol atuze gwo̱o̱ye̱ ci alanyit udut.

⁸ Kar zin go̱o̱le̱ necu bu̱k, egerzanit ol wak anyak o̱no̱zzo̱k ko̱ e̱le̱tti̱ cigge̱k, abure nege alaanzet ci Manyi kar kodomit kaal cik aruge ta̱dde̱na̱.

⁹ Odom rok Maikol wa een alaan ci anjilonyau ta̱mu̱-kenga ko̱, ngen enne kodom lo̱rye̱ni̱t i̱i̱te̱ne̱ bali adangone ki nonno zo̱ze̱ ci obod ki ele ci Musesi ke̱. Abarik wazin neci a̱nne̱k enne nonno ne, “Edezi atin Manyi Ta̱mu̱ta̱dde̱n i̱nne̱ta̱.”

¹⁰ Imma ol ne̱ko̱ odomnye zo̱ze̱ ci iróng nege bu̱k a̱gga̱, ogon nege kiwagon elegje cik iróng i̱no̱ne̱. Gi̱i̱ zin ci egerzan nogo ko̱ nenen necu.

¹¹ Ize nonga o̱lle̱ ngatinne̱ng, eci nege unuwet zoz ci Kaini, wa bali amuny gotoni ke̱. Ogon nege kaal cik gerzek ki i̱yo̱ko̱ bali e̱e̱ti̱ wa een zara Balaam ke̱, kar kurubtai nege o̱ro̱bi̱ya̱. Atubo bo̱do̱k nege ki e̱e̱t wa azi zar ne Korah bali aburnek Ta̱mu̱ta̱dde̱n nong ke̱, adita atin Ta̱mu̱ta̱dde̱n nogo ki baling a̱ru̱k Korah ke̱.

¹² Imma ol ne̱k gon ogon kaal cik een a̱li̱ya̱n ngati ozolinu niga ki nogo kwo̱o̱ra̱, ming adainu bu̱k, adakce nege tolongou, orong kadaizet e̱le̱tti̱ cigge̱k do̱ niko. Ogon nege kiwagon di̱i̱zwa̱na̱ cik odonga ngooti, iróng zin aṯile; ogon bo̱do̱k ki keena cik tagizak, i̱llo̱i̱ rok varany ki o̱ya̱u̱, adayai egeroi do̱o̱k lai.

¹³ Imma kaala ne̱k gerzek ogon nege i̱yo̱ko̱ ko̱, atubo ki tawan ci maam wak gon apalpalan ngooti nyatapare ci a̱ddi̱ki̱re̱ ko̱, adima kaal cigge̱k gerzek arike ti̱ti̱m. Kar bo̱do̱k nege ogon ki i̱yo̱ko̱ munyunya wak owo, imma ngatu iróng aavtte nga̱to̱de̱, ovvo nege ngati mu̱hu̱ri̱ udut.

¹⁴ Imma e̱e̱ti̱ ci een zara Enok wa een do̱le̱c ci do̱le̱c ci Adami, u̱du̱wa̱ zoz ci ol ne̱ko̱: “Icinnet, a̱kku̱ Manyi ki ol ciginnek a̱li̱le̱ meelek giir,

¹⁵ kar ki̱ki̱ya̱ kettedek ol do̱o̱k lo̱ki̱ko̱, ol wak iróng elemi zoz ci Ta̱mu̱ta̱dde̱no̱, ki ol wak ogon kaal go̱o̱le̱ ci iróng Ta̱mu̱ta̱dde̱no̱ orongi, kar bo̱do̱k ki ol wak ozoz gerzet zo̱ze̱ ci Ta̱mu̱ta̱dde̱no̱.”

¹⁶ E̱e̱ggi̱n ol ne̱ko̱ ol cik acucut tu̱p niko; annu nege kaal cik gerzek lo̱rye̱nto̱ amin zi̱nze̱tti̱ cigge̱k; odong e̱le̱tti̱ kar kalabta ol u̱tu̱ge̱tti̱ne̱ cik emede kar kurubta kaal cik orong nege ngatinne̱ng.

Abunna ming kanyak zi̱nze̱tti̱ cik kanime no̱ngi̱tto̱n

¹⁷ Ma̱i̱je̱ niga gonogga wak zinino, a̱a̱dda̱ zoz bali u̱du̱kta̱u̱ng to̱ni̱a̱ha̱ cik Manyi Ye̱su̱ Ki̱ri̱sto̱ ke̱.

¹⁸ A̱nne̱kku̱ng ne, “Imma atin i̱i̱nya̱we̱ cik okko looci aṯurneke, a̱vvu̱ atin ol cik ovvo aranne zoz ci Ta̱mu̱ta̱dde̱no̱, eci orong ku̱tu̱gu̱zzo̱ kaal cik gerzek amin zi̱nze̱tti̱ cigge̱k.”

¹⁹ Ol ne̱ko̱ cik anyaha ngero orgen cunno̱ng, eci irez nege kaal cik lo̱o̱tu̱ gerzek, iróng zin nege anyak Vongiz ci Ta̱mu̱ta̱dde̱no̱ zi̱nze̱tti̱nne̱ cigge̱k.

²⁰ Imma niga gonogga wak zinino, abunna ming anyikku tu̱we̱ne̱t cunno̱ng a̱li̱le̱ ko̱ kuk ta̱dde̱na̱, kar alac Ta̱mu̱ta̱dde̱n Vongize ci A̱li̱le̱.

²¹ Ming i̱na̱ku̱ng no̱ngi̱tto̱na̱ nu̱nu̱n, abunna ming a̱gga̱yyu̱ ngen Ta̱mu̱ta̱dde̱n irezung niko. E̱re̱yyo̱ zi̱nze̱tti̱nne̱ cik alali ki̱ki̱ya̱ deteni ci Manyitinna Ye̱su̱ Ki̱ri̱sto̱, kar ka̱a̱nyu̱ng ruget wa aave udut.

²² Eelta ol wak odoi zi̱nze̱tti̱ zo̱ze̱ ci Ta̱mu̱ta̱dde̱no̱.

²³ Eelta e̱e̱t ci orong kar keelai, eelta nogo kiwagon ming eelannu ol gwo̱o̱ya̱ ko̱. Imma zin ngati anyakku ngo̱li̱ne̱t zi̱nze̱tti̱nne̱ cuggo̱k, i̱ti̱ri̱zze̱t ol wak orongi. Abarik zin amartoi rok ru̱u̱ma̱ni̱ wak ol wak ogon kaal cik gerzek ko̱.

Innat Ju̱da̱ Ta̱mu̱ta̱dde̱n

²⁴ A̱a̱nyu̱ng Ta̱mu̱ta̱dde̱n i̱ge̱t u̱zu̱tte̱ tu̱we̱ne̱t cunno̱ng, iróng enne a̱a̱nyu̱ng u̱yu̱kte̱, kar kuwuyung rok nginti aave enne di̱ngdi̱ngo̱nta̱ ki talninta.

²⁵ Een enne Ta̱mu̱ta̱dde̱n co̱de̱ ṯok Ti̱ri̱zo̱i̱t cinna, anyak enne di̱ngdi̱ngo̱n, ki ddi̱ki̱rze̱t, ki doiz, ki alaanzet ngati Manyitinna Ye̱su̱ Ki̱ri̱sto̱ wa bali aave arrak oowa bu̱u̱llo̱we̱ do̱o̱k, ki i̱yo̱ko̱ udut. Nonno nenen.