Jonah 2 - Tennet

Alaye Jonah kar zin Ta̱mu̱ta̱dde̱n keela nonno

¹ Ala Jonah Manyi Ta̱mu̱ta̱dde̱n cinne kenge ci u̱lu̱gto̱ ecito.

² Azi enne ne: “Imma bali ngati kapirnane, kala anna Manyi kar zin enne abarizekan. Bali ngati kaave anna daiza orgena, kawu anna zar cigunnek, kar zin i̱nna̱ zik u̱lu̱wa̱ cinanni.

³ U̱ju̱ke̱ya̱ i̱nna̱ annit nginti u̱u̱ni̱, a̱ju̱ke̱ka̱ liil orgen ele, a̱ri̱k tawani aburukka annit ne riu, kar bo̱do̱k maama cik komiz cunne aburukka ele cinanni do̱o̱k.

⁴ Kazi anna ne, ‘Kacinni u̱ju̱ke̱ya̱ bali i̱nna̱ annit tu̱ ngu̱me̱ cunne; ngen zin atin anna kacinni dee Ce̱e̱ze̱ cunne a̱li̱le̱.’

⁵ Orong maama cik aburuka ko̱ kegerzantan, uburuwa annit buuluc ci u̱u̱ni̱; a̱lu̱ce̱ arte cik li̱i̱lu̱ oowe cinanni.

⁶ Kutudude bali anna maame kuk rok egero cik biyenu lo̱o̱ta̱; a̱gga̱ma̱ zin annit looci lo̱o̱ta̱ udut. Ma̱i̱je̱ i̱nna̱ obodane ruget cinanni lo̱o̱wa̱ ka̱vvu̱ ta̱dde̱na̱, Manyi Ta̱mu̱ta̱dde̱n cinanni.

⁷ Baling okko rugeti cinanne orong ki̱zzi̱, ka̱a̱da̱nni̱ zin anna i̱nne̱ta̱, Manyi, kar lawinet cinanni kuzucai i̱nne̱ta̱, Ce̱e̱ze̱ cunne a̱li̱le̱.

⁸ Imma ol wak azunne kaal cik adimanai azzine kizeto ta̱mu̱ta̱dde̱ne̱t cik iróng anyak doiz ko̱ alam deten ci Ta̱mu̱ta̱dde̱no̱ ci weda een cinne̱ng.

⁹ Ma̱i̱je̱ anna, ke̱be̱ne̱ki̱ lo̱ng ci kaanyi zany, kar atin kapahei wawac. Kar zoz ci kodola ko̱, kogonni atin anna kubunna. A̱kku̱ ti̱ri̱ze̱ne̱t ngati Manyi.”

¹⁰ Kar zin Manyi ku̱du̱wa̱k u̱lu̱gi̱t, kar zin enne katazahak Jonah liil ti̱ti̱m.