Jonah 1 - Tennet

Ibbez Jonah zoz ci Ta̱mu̱ta̱dde̱no̱

¹ I̱ki̱ya̱k zoz ci Manyi Jonah ngerrti Amittai a̱nne̱k ne,

² “Bit o̱rge̱ ci a̱ddi̱ki̱re̱ een zara Nineveh kar uwahek ol zoz cinanni lo̱ki̱ko̱ ci atin a̱kku̱ ke̱, eci anna ka̱gga̱ e̱e̱ggi̱n nege olli mu̱nye̱nu̱ oroot.”

³ Imma Jonah, ngerrti ngene, etteda gool cinne, i̱vi̱r ngati Manyi. Uk rok orog ci een Joppa kar zin kuruba i̱bo̱ ci okko o̱rge̱ ci azi zar ne Tarshish, u̱ru̱k zin enne o̱ro̱bi̱ya̱, kar zin kottod kuk.

⁴ I̱tto̱na̱k zin Manyi ngoot ci a̱ppwe̱ nyatapar ci a̱ddi̱ki̱re̱, ingazi lamlami maame gerzet ci orong ki̱li̱b i̱bo̱.

⁵ O̱to̱ngo̱o̱ltte̱ zin ol wak amacuce ko̱ do̱o̱k kar zin nege do̱o̱k kilaltek ta̱mu̱ta̱dde̱ne̱t cigge̱k abunna ming eela nogo. U̱ju̱ktte̱k zin nege i̱jjo̱ cigge̱k nyatapar ci a̱ddi̱ki̱re̱, kar icima i̱bo̱ ovolvoli. Imma Jonah ngerrti ngene uk i̱bo̱wa̱ ecito kar kudung labak.

⁶ Uk ddi̱ki̱ryo̱i̱ti̱ ci i̱bo̱wo̱ ngati Jonah, kar ki̱jji̱n nonno kizek ne, “Abarik i̱nna̱ adungi ming ogon looci ke̱te̱ ko̱? Tinga je̱e̱na̱! Ilalek ta̱mu̱ta̱dde̱n cunne, icima eelannet daiza.”

⁷ Ozozzit zin ol wak amacuce ko̱ izeto ne, “I̱vi̱ta̱, kitimanit da̱ biyen icima ngene la̱du̱n ci anyahakket de̱zi̱ne̱t cu ko̱.” Baling itimanit nege biyen, itazak zin Jonah.

⁸ I̱jji̱nne̱t zin nege nonno, “Du̱wa̱kke̱ta̱, ngene ci anyahakket de̱zi̱ne̱t cu do̱o̱k? A̱li̱ngli̱ngi̱ i̱nna̱ nya? A̱kku̱nni̱ i̱nna̱ o̱rge̱ jang? E̱e̱ni̱ i̱nna̱ i̱do̱ngo̱je̱ni̱t jang?”

⁹ O̱bo̱de̱k zin Jonah nogo, a̱nne̱k ne, “Ke̱e̱ni̱ anna ol wak azi zara ne I̱bu̱ru̱. Kala anna Manyi, Ta̱mu̱ta̱dde̱n wa aave ta̱mu̱-kenga eenyca lo̱o̱c ki nyatapar ci a̱ddi̱ki̱re̱.”

¹⁰ O̱to̱ngo̱o̱ltte̱ zin nege oroot kar i̱jji̱nne̱t Jonah a̱nne̱k ne, “Ogoni da̱ i̱nna̱ nya?” A̱gga̱c nege niko ming a̱vi̱r enne ngati Manyi, eci enne la̱du̱n u̱du̱wa̱k ba̱li̱ye̱ nogo niko.

¹¹ Otorye ngooti nyatapara kize gerza oroot. I̱jji̱nne̱t zin bo̱do̱k nege nonno dee, a̱nne̱k ne, “Ku̱tu̱gu̱zza̱ wo̱ye̱ naga nya ngatunne kar ngooti kibil?”

¹² Iizek zin enne nogo ne, “U̱ju̱kte̱ya̱ng nyatapar ci a̱ddi̱ki̱re̱, kar abunna ming abile ngooti. Ka̱gga̱ niko een ba̱ci̱ cinanni ci a̱kku̱na̱kku̱ng ngooti ci een lamlam ko̱.”

¹³ Itimanit zin ol wak amacuc i̱bo̱ ko̱ orong kettedit nyatapar ci a̱ddi̱ki̱re̱ koot ti̱ti̱ma̱. Abarik zin iróng ngen uule, otorye ngooti kize a̱ppwa̱ oroot.

¹⁴ Ilalttek zin nege Manyi, azi ne, “Manyi ye̱i̱, ma aanyet ka̱da̱kta̱ zo̱ze̱ ci e̱e̱t cu. Ma aanyet kizetta ol cik ka̱ru̱ka̱ e̱e̱t cu, eci i̱nna̱ Manyi bai ci ogoni kaal cik orongi i̱nna̱.”

¹⁵ U̱ju̱ktte̱k zin nege Jonah nyatapar ci a̱ddi̱ki̱re̱ kar zin ngooti kibil nyatapara niko.

¹⁶ O̱to̱ngo̱o̱ltte̱ zin ol ne̱ke̱ Manyi oroot, kar zin kapaktek wawac Manyi, kar ku̱tu̱gu̱zze̱k nonno olom.

¹⁷ I̱tto̱na̱ zin Manyi u̱lu̱gi̱t ci a̱ddi̱ki̱re̱ abunna ming a̱ku̱k Jonah, a̱vvu̱ zin Jonah kenge ci u̱lu̱gto̱ i̱i̱nya̱ i̱i̱yo̱ ki ba̱a̱li̱nno̱k i̱i̱yo̱.