Kaviyak wak Abunna Ta̱mu̱ta̱dde̱no̱ eher Joni 6 - Tennet

Adaiz Ye̱su̱ ol i̱bbo̱nge̱t tu̱r (5,000)

¹ Baling edeca Ye̱su̱ zoz cinne, uk zin etted nyatapar kar kuk ti̱ti̱me̱ ci Ga̱li̱li̱ ci een bo̱do̱k zara uggak ne Nyatapar ci Tiberiasi,

² kar zin koole ci a̱ppwe̱ kunuwet nonno eci acin nege kaal cik a̱vu̱la̱ u̱tu̱gu̱we̱k enne ol wak omori.

³ Oot zin Ye̱su̱ ki nuyak waginnek zi̱i̱ra̱ ta̱dde̱na̱ kar zin ka̱vvu̱to̱ lo̱o̱ta̱.

⁴ Ize da̱ ojon i̱i̱te̱ni̱ wa adahe olli Ya̱u̱do̱ kwo̱o̱r wa I̱i̱te̱n wa Va̱rda̱ngi̱nto̱ wanne̱ng otongde a̱zza̱.

⁵ Baling odong Ye̱su̱ oo, edenya koole ci a̱ppwe̱ ming a̱vvu̱na̱k nonno, kar zin kizek Vilip ne, “Kamuda atidic da̱i̱ne̱t nga cik kuutak koole cu kadait?”

⁶ A̱jji̱n Ye̱su̱ ji̱ne̱ne̱t necu lurur orong kitiman Vilip, a̱gga̱ enne la̱du̱n o̱o̱we̱ cinne gi̱i̱ ci okko enne ogoni.

⁷ O̱bo̱de̱k Vilipi Ye̱su̱, a̱nne̱k ne, “Iróng o̱ro̱bi̱ya̱na̱ obet rama (200) cik e̱e̱ggi̱n ziik eleno kar ku̱tu̱yya̱ da̱i̱ne̱t cik adak ol ne̱ko̱ veelek.”

⁸ Okko nuyaiti imma ci Ye̱su̱ een zara Andereya gotoni Si̱mo̱ne̱ Peturu, ozoz azi ne,

⁹ “Anyak logozit imma ngatu ci anyak umunet tu̱r, ki u̱lu̱g ram, iróng zin atidic iddera ol ne̱ko̱ veelek.”

¹⁰ Izek zin Ye̱su̱ nogo ne, “Anycik ol ka̱vvu̱to̱ lo̱o̱ta̱.” Anyak da̱ ngin neci arte cik meelek giir, cik da̱ aavtte ol lo̱o̱ta̱, e̱e̱ggi̱n da̱ ol ne̱ke̱ do̱o̱k i̱bbo̱nge̱t tu̱r (5,000).

¹¹ Idima zin Ye̱su̱ umunet ne̱ke̱ kar kaanyik Ta̱mu̱ta̱dde̱n zany kar kengerek ol, idima bo̱do̱k u̱lu̱g ne̱ke̱ kar ku̱tu̱gu̱ ki wanai, aanyik Ta̱mu̱ta̱dde̱n zany kar kengerek ol ne̱ke̱ veelek.

¹² Baling atanyarit nege do̱o̱k, izek zin Ye̱su̱ nuyak waginnek ne, “U̱lu̱tta̱ da̱i̱ne̱t ne̱k wanai anyigzai ko̱, gerza ming kanyari gu̱zu̱le̱ye̱.”

¹³ U̱lu̱tta̱ zin nege da̱i̱ne̱t wak anyigzai umunete ne̱k e̱e̱ggi̱n tu̱r ke̱ kizeto dho̱ngkwe̱tta̱ omoto ki ram.

¹⁴ Baling icinnet ol kaal cik a̱vu̱la̱ u̱tu̱gu̱ Ye̱su̱ ko̱, izeto ne, “De̱de̱, een e̱e̱ti̱ necu a̱ri̱to̱i̱t ci bali azi ne a̱kku̱nna̱k atin lo̱o̱c ke̱ nenen necu.”

¹⁵ A̱gga̱ Ye̱su̱ gi̱i̱ ci anyak nege zi̱nze̱tti̱nne̱, orongit kartik nonno kize alaan i̱ba̱ti̱ne̱, aara zin enne ele ngatinne̱ng kar zin kuk biya ta̱dde̱na̱ ka̱vvu̱ enne do̱.

Owo Ye̱su̱ maame ta̱dde̱na̱

¹⁶ Baling ize yo̱mo̱n, u̱lu̱cce̱ nuyaha waginnek oot liila,

¹⁷ otoddit nege i̱bo̱, kar zin orong kettedit nyatapar ovvo o̱rge̱ ci een Kapernaum. Ize da̱ rarawon, ngen Ye̱su̱ kidongozik nogo.

¹⁸ I̱ki̱ya̱ zin i̱lo̱li̱, apalpalan maam.

¹⁹ Baling amacuccet nege i̱bo̱ mailnya i̱i̱yo̱ icima we̱c ka̱vvu̱to̱ liil orgena, edenycak Ye̱su̱ ming owo maame ta̱dde̱na̱ a̱kku̱nna̱k i̱bo̱, kar zin nege ko̱to̱ngo̱o̱ltte̱.

²⁰ Abarik zin Ye̱su̱ a̱nne̱k nogo ne, “Annita Ye̱su̱, ma o̱ngo̱o̱li̱nnu̱.”

²¹ Orongit zin nege kodongtek nonno i̱bo̱, ataman niko abarik ette i̱bo̱ uzuca ngin wanai orong nege ko̱o̱tte̱ ke̱.

Orongit ol Ye̱su̱

²² Ma̱i̱je̱ nge̱rre̱ti̱n ci reng, a̱gga̱c ol balik aavtte nyatapar ti̱ti̱me̱ co̱de̱ ke̱ ming o̱de̱ da̱ i̱bo̱ neci, ngen zin Ye̱su̱ ki̱tto̱ i̱bo̱ ki nuyak waginnek. Oot demezyaha ne̱ke̱ i̱bo̱wa̱ do̱.

²³ Ma̱i̱je̱ bo̱do̱k i̱vi̱tta̱k i̱be̱tta̱ uggak ti̱ti̱m, a̱vvu̱ o̱rge̱ ci een Tiberias, a̱vvu̱na̱k ti̱ti̱m bali adahe ol da̱i̱ne̱t ngati aanyik Manyi Ye̱su̱ Ta̱mu̱ta̱dde̱n zany.

²⁴ Baling icinnet ol ne̱ke̱ ming a̱zze̱ Ye̱su̱ ki nuyak waginnek nginatu, otoddit i̱be̱t ne̱ke̱ kar zin koot o̱rge̱ ci een Kapernaum, ovvo nege orong Ye̱su̱.

Een Ye̱su̱ umune ci adak ol kar kurugte

²⁵ Baling urubtak nege Ye̱su̱ nyatapar ti̱ti̱m co̱de̱ ke̱, i̱jji̱nne̱t zin nonno izettek ne, “De̱me̱zo̱i̱t! A̱kku̱nni̱ ette i̱nna̱ ngintu vonga?”

²⁶ O̱bo̱de̱k zin Ye̱su̱ nogo, a̱nne̱k ne, “Ka̱du̱wa̱kku̱ng zoz wa een de̱de̱, iróng niga orongnyang ma̱rri̱t ming ku̱tu̱gu̱ anna kaal cik a̱vu̱la̱. Orongnyang, eci niga adakttu da̱i̱ne̱t atanyarttu.

²⁷ Ma a̱li̱ngli̱ngnyu̱ zo̱ze̱ ci da̱i̱ne̱t wak atin iróng abak udut, abarik i̱li̱ngli̱ngge̱t da̱i̱ne̱t cik gon aavtte baize wa aave udut, cik atin ka̱a̱nyu̱ng anna Ngerrti E̱e̱to̱, eci Baba Ta̱mu̱ta̱dde̱n arika annit komiz li̱ngli̱ngo̱nte̱ necu.”

²⁸ I̱jji̱nne̱t zin ol ne̱ke̱ Ye̱su̱, izettek ne, “Ku̱tu̱gu̱zza̱ nya kar ki̱ngli̱ngntta̱ li̱ngli̱ngo̱n ci Ta̱mu̱ta̱dde̱no̱?”

²⁹ O̱bo̱de̱k Ye̱su̱ nogo, a̱nne̱k ne, “Li̱ngli̱ngo̱n ci Ta̱mu̱ta̱dde̱no̱ icu: Abunna ming a̱tu̱we̱nu̱ ngati e̱e̱t bali o̱de̱ i̱tto̱na̱i̱ ke̱.”

³⁰ I̱jji̱nne̱t zin bo̱do̱k ol ne̱ke̱ Ye̱su̱, izettek ne, “Tu̱gu̱ gi̱i̱ imma ci a̱vu̱la̱ kicinnta naga, kar ku̱tu̱yi̱n. Ogoni wo̱ye̱ i̱nna̱ jang?

³¹ Adak ba̱li̱ye̱ ji̱ji̱ti̱gga̱c da̱i̱ne̱t cik een zara maana, aanyik Ta̱mu̱ta̱dde̱n balala, ki ming e̱he̱rye̱ zoz necu warage ci Ta̱mu̱ta̱dde̱no̱, azi ne, ‘Aanyik enne nogo da̱i̱ne̱t cik a̱vvu̱ ta̱mu̱-kenga kadait.’”

³² Izek zin Ye̱su̱ nogo ne, “Ka̱du̱wa̱kku̱ng zoz ci een de̱de̱. Iróng ba̱li̱ye̱ een Muses ci a̱a̱nyu̱ng da̱i̱ne̱t cik a̱vvu̱ ta̱mu̱-kenga, Baatanni ci a̱a̱nyu̱ng da̱i̱ne̱t wak een de̱de̱ a̱vvu̱ ta̱mu̱-kenga.

³³ Eci da̱i̱ne̱t cik Ta̱mu̱ta̱dde̱no̱ een e̱e̱t ci a̱kku̱ ta̱mu̱-kenga, kar zin kanyik ol cik aavtte lo̱o̱ta̱ ko̱ ruget.”

³⁴ Izettek ol ne̱ke̱ Ye̱su̱ ne, “Manyi, inyyet da̱i̱ne̱t ne̱ko̱ odohize.”

³⁵ Izek zin Ye̱su̱ nogo ne, “Ke̱e̱ni̱ anna da̱i̱ne̱t cik rugeto. Ming a̱kku̱nna̱ka̱ e̱e̱ti̱, iróng bo̱do̱k adak magiz udut, kar bo̱do̱k ming elemna e̱e̱ti̱, iróng koor a̱ru̱k nonno udut.

³⁶ I̱yo̱ko̱ ka̱du̱wa̱kku̱ng ming icintang ko̱ nu̱nu̱n, iróng bu̱k orongnyu u̱tu̱we̱t zoz cinanni.

³⁷ A̱vvu̱na̱ka̱ atin ol wak aanya Baatanni annita, ma̱i̱je̱ ming a̱kku̱nna̱ka̱ e̱e̱ti̱ imma iróng anna ka̱bu̱ri̱.

³⁸ Ka̱kku̱ni̱ la̱du̱n ta̱mu̱-kenga iróng kokko kogonni gi̱i̱ ci korongi anna, abarik kokko kogonni gi̱i̱ ci orong Baatanni bali i̱tto̱na̱na̱ ke̱.

³⁹ Een necu gi̱i̱ ci orong e̱e̱ti̱ ci i̱tto̱na̱na̱ ko̱ kar ku̱tu̱gu̱, iróng atin anna kokolozi e̱e̱t co̱de̱ olle wak anyaha enne annit ko̱, abarik kingane atin nogo daiza i̱i̱te̱ne̱ ci okko aṯurneke looci.

⁴⁰ Eci gi̱i̱ ci orong Baba icu, ming acin e̱e̱ti̱ imma Ngerinne, kar zin ku̱tu̱ zoz cinne, amuda ruget wa aave udut, kar atin anna kitingawe nonno i̱i̱te̱n ci okko looci aṯurneke.”

⁴¹ Ongongonet ol wak e̱e̱ggi̱n Ya̱u̱d zo̱ze̱ ci Ye̱su̱, ma̱rri̱t enne azi ne, “Kogonni anna ki da̱i̱ne̱t cik a̱kku̱nna̱k lo̱o̱c ta̱mu̱-kenga.”

⁴² Izeto zin ne, “Iróng dim necu een Ye̱su̱ ngerrti Yosevo wa ka̱gga̱ naga do̱o̱k baatinne ki yaatinne ko̱? Azi wo̱ye̱ enne bo̱do̱k ne, ‘Ka̱kku̱na̱k lo̱o̱c ta̱mu̱-kenga ku̱ niko?’”

⁴³ O̱bo̱de̱k Ye̱su̱ nogo a̱nne̱k ne, “Ma angongonnu zo̱ze̱ ci kozozi anna ko̱ gaganiko.”

⁴⁴ Emena Ye̱su̱ zoza dee, azi ne, “Iróng e̱e̱ti̱ imma a̱kku̱nna̱ka̱, Baba do̱ niko wa i̱tto̱na̱na̱ ko̱ ci a̱gu̱ra̱ nonno, kingane atin anna nonno daiza i̱i̱te̱ne̱ ci okko looci aṯurneke.

⁴⁵ Eher a̱ri̱tto̱wa̱ zoz ci azi ne, ‘Edemez atin Ta̱mu̱ta̱dde̱n nogo do̱o̱k.’ Imma ol do̱o̱k wak aziye zoz ci Baba kar bo̱do̱k kelemtta de̱mzi̱ne̱t cinne, a̱vvu̱na̱ka̱ atin annita.

⁴⁶ Ngen e̱e̱ti̱ imma kicin Baba, annit do̱ niko ci ka̱kku̱ni̱ Ta̱mu̱ta̱dde̱na̱ ci kicina Baba.

⁴⁷ Ka̱du̱wa̱kku̱ng zin zoz ci een de̱de̱, ming a̱tu̱we̱ e̱e̱ti̱, anyak ruget wa aave udut.

⁴⁸ Ke̱e̱ni̱ anna da̱i̱ne̱t cik rugeto.

⁴⁹ Adait ji̱ji̱tu̱ggo̱k ba̱li̱ye̱ da̱i̱ne̱t wak een maana i̱i̱na̱ ta̱mu̱-kenga balala nu̱nu̱n, ngen nege a̱da̱i̱ dee.

⁵⁰ Abarik icu zin da̱i̱ne̱t cik aluccai ta̱mu̱-kenga, ming wo̱ye̱ adak e̱e̱ti̱, iróng daizi a̱kku̱nna̱k nonno udut.

⁵¹ Ke̱e̱ni̱ anna da̱i̱ne̱t wa rugeto, kalucai ta̱mu̱-kenga. Ming adak e̱e̱ti̱ imma da̱i̱ne̱t ne̱ko̱, abak atin enne udut. Een da̱i̱ne̱t ciko ele cinanni, ci kanyike kize ruget ci olli lo̱o̱tu̱.”

⁵² Adangto zin ol wak een Ya̱u̱d nege do̱, kar zin kizeto ne, “Okko atidic e̱e̱ti̱ necu aanyyet ele cinne kize da̱i̱ne̱t kar kadait ku̱?”

⁵³ Izek zin Ye̱su̱ nogo ne, “Ka̱du̱wa̱kku̱ng anna zoz ci een de̱de̱, ming iróng niga adakku ele ci Ngerrti E̱e̱to̱ kar bo̱do̱k uudet bi̱ye̱ ciginnek, i̱llo̱i̱ ruget ngatinno̱ng udut.

⁵⁴ Ming adak e̱e̱ti̱ ele cinanni kar kuud bi̱ye̱ wagannik, anyak enne ruget ci aave udut, ming okko aṯurneke looci, kingane atin anna nonno daiza.

⁵⁵ Een ele cinanni da̱i̱ne̱t cik een de̱de̱ a̱vvu̱ ta̱mu̱-kenga, ovvo bi̱ye̱ta̱ e̱e̱ggi̱n kaal cik een udenet de̱de̱.

⁵⁶ Ming adak e̱e̱ti̱ ele cinanni kar bo̱do̱k kuud bi̱ye̱ cigannik, karumena ki nonno.

⁵⁷ Ogon ki i̱yo̱ko̱ ming i̱tto̱na̱ Baba wa aruge ta̱mu̱-kenga ko̱, karugi zin anna zo̱ze̱ cinne, okko zin e̱e̱ti̱ ci adakce ngatinanni ko̱ abak zo̱ze̱ cinanni.

⁵⁸ Ke̱e̱ni̱ anna da̱i̱ne̱t cik kalucai ta̱mu̱-kenga. Adait ba̱li̱ye̱ ji̱ji̱tu̱ggo̱k balala da̱i̱ne̱t cik een maana ci aluccai ta̱mu̱-kenga bak a̱da̱i̱to̱, imma e̱e̱ti̱ ci adak da̱i̱ne̱t cik kanyaha anna ko̱, iróng atin enne bo̱do̱k a̱da̱i̱, abak atin udut.”

⁵⁹ U̱du̱wa̱ Ye̱su̱ zoz neci ngati edemzinne enne Ce̱e̱ze̱ wa Lawinto o̱rge̱ ci een Kapernaum.

Zo̱zo̱nno̱k cik ruget wa aave udut

⁶⁰ Baling iziyyet nuyaha cik Ye̱su̱ zoz neci, izeto ne, “Okkomi de̱mzi̱ne̱t icu. Ngene wo̱ye̱ ci elemi?”

⁶¹ Imma Ye̱su̱ a̱gga̱ niko ming ungungunet nuyaha waginnek zo̱ze̱ necu, iizek zin nogo ne, “Aburnnu nong zo̱ze̱ necu?”

⁶² Ogon wo̱ye̱ ku̱ ming acinnu Ngerrti E̱e̱to̱ ming a̱mi̱re̱ okko ngin bali a̱kku̱nne̱ ke̱, ta̱mu̱-kenga!

⁶³ Aanyik Vongizi ol ruget, iróng ele aanyyet gi̱i̱ imma. Kaal cik ka̱du̱wa̱kku̱ng ko̱ een zoz ci Vongizo, aanyyet ruget.

⁶⁴ Ize bo̱do̱k Ye̱su̱ ne, “Abarik anyak ol u̱gge̱ orgene cunno̱ng cik iróng a̱tu̱we̱.” A̱gga̱ enne niko anyak ol cik iróng a̱tu̱we̱, ki e̱e̱t ci atin okko adawa nonno.

⁶⁵ Oobek zin Ye̱su̱ nogo zoz ci azi ne, “Zoz zin bali ka̱du̱wa̱kku̱ng kazi ne i̱llo̱i̱ e̱e̱t imma ci a̱kku̱nna̱ka̱ ming ngen Baba kaanyik gool.”

⁶⁶ Baling iziyyet nuyaha cik Ye̱su̱ zoz cinne niko, i̱mi̱rtte̱ zin cik meelek iróng ngen annu nonno.

⁶⁷ I̱jji̱n zin Ye̱su̱ to̱ni̱a̱k waginnek een omoto ki rama, a̱nne̱k ne, “Iróng orongnyu oot bu̱k?”

⁶⁸ O̱bo̱de̱k zin Si̱mo̱ne̱ wa een zara uggak Peturu ko̱ Ye̱su̱, a̱nne̱k ne, “Manyi, kovvoya wo̱ye̱ naga ngati ngene? Anyai i̱nna̱ zoz ci een ruget wa aave udut.

⁶⁹ Ka̱tu̱yya̱ zoz cunne, ka̱gga̱yya̱ e̱e̱ni̱ i̱nna̱ e̱e̱t ci A̱li̱le̱ O̱de̱ Ṯok, ci a̱kku̱ ngati Ta̱mu̱ta̱dde̱no̱.”

⁷⁰ O̱bo̱de̱k zin Ye̱su̱ nogo, a̱nne̱k ne, “Katahalaung i̱ge̱t ngati e̱e̱ggi̱nnu̱ omoto ki ram, anyak zin co̱de̱ ci een lo̱rye̱ni̱t orgene cunno̱ng.”

⁷¹ Arruk Ye̱su̱, Judas ngerrti Si̱mo̱ne̱ wa een Iskariyot, een Judasi demezeyait demezeyahe wak een omoto ki ram ke̱, okko atin enne ovolonge Ye̱su̱ ku̱ru̱we̱ ka̱da̱k.