Kaviyak wak Abunna Ta̱mu̱ta̱dde̱no̱ eher Joni 2 - Tennet

Ogon Ye̱su̱ gi̱i̱ ci a̱vu̱la̱ rucenta o̱rge̱ ci een Kana

¹ Baling edeccai i̱i̱nya̱ cik e̱e̱ggi̱n ram u̱ru̱we̱t ol rucenet o̱rge̱ ci een Kana lo̱o̱ce̱ ci Ga̱li̱li̱. Aave da̱ e̱e̱ti̱ Ye̱su̱ bu̱k nginati.

² Awa da̱ ol Ye̱su̱ ki nuyak waginnek bu̱k rucente neci.

³ Ma baling edeccai merte, iizek e̱e̱ti̱ Ye̱su̱ nonno ne, “I̱zzi̱ merte to.”

⁴ A̱nne̱k zin Ye̱su̱ yaatinne ne, “I̱nna̱ ngaa cu, iróng i̱nna̱ anyai zoz imma ki annita, ngen i̱i̱ cinanni ki̱ki̱ya̱.”

⁵ Izek zin yaatinne du̱cca̱k ne, “U̱tu̱gu̱z gi̱i̱ ci a̱du̱wa̱kku̱ng enne.”

⁶ Imma abanyce cinne̱ng, aavtte i̱jjo̱nyya̱ cik maamu e̱e̱ggi̱n torkonom, i̱jjo̱nyya̱ wak gon da̱ ogone olli Ya̱u̱do̱ keer cinne̱ng tunyento. Okkoye ucca i̱jjo̱ co̱de̱ coviyanya tu̱r icima torkonom bu̱k.

⁷ Izek Ye̱su̱ du̱cca̱k ne, “E̱le̱zze̱k i̱jjo̱nyya̱ ne̱ko̱ maam.” E̱le̱zze̱k zin du̱cca̱ha̱ i̱jjo̱nyya̱ ne̱ke̱ maam ṯoc.

⁸ Izek zin Ye̱su̱ nogo ne, “Iṯilta u̱gge̱ kar zin oot aanycik e̱e̱t ci een zoc.” U̱tu̱gu̱zzo̱ zin du̱cca̱ha̱ ne̱ke̱ niko,

⁹ kar zin e̱e̱ti̱ ci een zoc katar maam ne̱k wanai utuhuye ize merte. Iróng bu̱k enne a̱gga̱ a̱kku̱ merte neci nga, ize du̱cca̱k wak aṯila maam ke̱ do̱ cik a̱gga̱. Utu zin e̱e̱t ci een zoc ko̱ rucait abanyca,

¹⁰ kar kizek ne, “Anyik ol odohize merte wa abunna arrak, kar zin ming u̱u̱dde̱ oroot, aanycik zin merte ci amaktali. Abarik zin i̱nna̱ i̱ta̱ngu̱ merte wa abunna oroot izong kar zin nyahak ol vu̱rrta̱?”

¹¹ Een zin ba̱li̱ye̱ necu gool ci i̱ye̱la̱ Ye̱su̱ gi̱i̱ ci a̱vu̱la̱ een oo o̱rge̱ ci een Kana lo̱o̱ce̱ ci Ga̱li̱li̱. I̱ye̱la̱ zin enne komiz wainne kar zin nuyaha waginnek ku̱tu̱we̱t nonno.

¹² Ma baling edeccai rucenet neci, uluce zin Ye̱su̱ oot ki ciko yaatinne ki gotonoggi ki nuyak waginnek o̱rge̱ ci een zara Kapernaum, kar zin komonit nginati i̱i̱nya̱ cik kidik.

A̱vi̱l Ye̱su̱ Ce̱e̱z wa Ta̱mu̱ta̱dde̱no̱

¹³ Baling ize ojon I̱i̱te̱ni̱ wa Va̱rda̱ngi̱nto̱ Ya̱u̱do̱, uk zin Ye̱su̱ Jerusalema.

¹⁴ Uruba zin enne ol reena Ce̱e̱ze̱ wa Ta̱mu̱ta̱dde̱no̱ ming utene o̱le̱nya̱ ki a̱zza̱, ki lu̱be̱nya̱, kar zin bo̱do̱k uggak ataline o̱ro̱bi̱ya̱ aavtte lecerete.

¹⁵ Baling icin enne kaal cik ogone niko, uk idima nyavuta ci atize nogo, kar zin kottok ol ne̱ke̱ do̱o̱k reene ci Ce̱e̱z wa Ta̱mu̱ta̱dde̱no̱, ki a̱zza̱, ki o̱le̱nya̱ bu̱k. Azan o̱ro̱bi̱ya̱ cik ol ne̱ke̱ do̱o̱k, kar zin ku̱ju̱k lecerit.

¹⁶ Kar zin kizek ol wak utene loberuknya ko̱ ne, “O̱o̱tte̱ kaal ne̱ko̱ ngati! Iróng Ce̱e̱z ci Baba een Ce̱e̱z ci ataline ol kaal.”

¹⁷ Imma vu̱rrta̱ a̱a̱dda̱ zin nuyaha cik Ye̱su̱ zoz ci e̱he̱rye̱ Warage ci Ta̱mu̱ta̱dde̱no̱ azi ne, “Alanyit rezinet ci kireze Ce̱e̱z cunne zinine cinanni kiwagon gwa̱a̱.”

¹⁸ I̱jji̱nne̱t zin ol cik a̱ddi̱ki̱re̱ Ya̱u̱do̱ nonno, a̱nne̱k ne, “Ye̱le̱kke̱t gi̱i̱ imma ci a̱vu̱la̱ kar kicinnta de̱de̱ ming anyai i̱nna̱ komiz?”

¹⁹ O̱bo̱de̱k zin Ye̱su̱ nogo, a̱nne̱k ne, “I̱li̱bbe̱t Ce̱e̱z wa Ta̱mu̱ta̱dde̱no̱, kar zin anna keteny bo̱do̱k i̱i̱nya̱we̱ cik een i̱i̱yo̱.”

²⁰ Izettek zin lo̱ddi̱ki̱re̱ cik Ya̱u̱do̱ nonno ne, “Okkoye ba̱li̱ye̱ Ce̱e̱z wa Ta̱mu̱ta̱dde̱no̱ ko̱ e̱rki̱to̱k moten we̱c ki torkonom teheenyinta, abarik i̱nna̱ azi ne, okko eenyeti ce̱e̱z necu i̱i̱nya̱we̱ cik een i̱i̱yo̱ niko?”

²¹ Ma̱i̱je̱ da̱ Ce̱e̱z wa Ta̱mu̱ta̱dde̱no̱ ci ozoz enne ko̱, een ele cinne.

²² Baling itingawe Ta̱mu̱ta̱dde̱n nonno daiza, a̱a̱dda̱ zin nuyaha zoz bali u̱du̱wa̱ enne ke̱. Kar zin kelemtta Waraga ci Ta̱mu̱ta̱dde̱no̱ ki zoz wa u̱du̱wa̱ Ye̱su̱.

²³ Ma baling ngen Ye̱su̱ aave Jerusalema ke̱, ngati adahe I̱i̱te̱n wa Va̱rda̱ngi̱nto̱, icinnet ol cik meelek kaal cik a̱vu̱la̱ ogon Ye̱su̱, kar zin ol ne̱ke̱ ku̱tu̱we̱t nonno.

²⁴ Ma̱i̱je̱ zin abarik Ye̱su̱ iróng arik nogo zinin, eci enne a̱gga̱ nogo do̱o̱k.

²⁵ Iróng enne orong zoz ci okko a̱du̱wa̱k nonno e̱e̱ti̱ gi̱i̱ ci obod ki e̱e̱t imma, ma̱rri̱t enne Ye̱su̱ eliya a̱gga̱ kaal wak anyak e̱e̱ti̱ ci diiri zinina.