Kaviyak wak Abunna Ta̱mu̱ta̱dde̱no̱ eher Joni 19 - Tennet

Ettedozik Ye̱su̱ todowinet ta̱la̱ke̱c ka̱da̱k

¹ U̱du̱wa̱k zin Pilato ol ko̱o̱tte̱ Ye̱su̱ reena kar koot ki̱bi̱cce̱t.

² U̱lu̱cce̱t aciiri biila ku̱tu̱gu̱ ki i̱ta̱a̱ kar zin kuburucek Ye̱su̱ oo. Uburucehe ru̱u̱m ci een lo̱ddi̱ng,

³ kar zin kotozzo ki̱mi̱rto̱zi̱k lak cik meelek giir ngati aziwe ne, “Rug a̱vvu̱ to, alaan ci Ya̱u̱do̱!” Kar zin gon kapannit nonno ngu̱m.

⁴ Obodak bo̱do̱k Pilato ol ne̱k e̱e̱ggi̱n Ya̱u̱d ke̱ reena kar zin kizek ne, “Izikttang di̱, kanyahakung nonno re̱e̱nu̱n kar a̱gga̱c ming i̱llo̱i̱ gi̱i̱ imma ci kamuda ette abaci e̱e̱ti̱ cu. Kar kettedik lo̱ki̱ko̱.”

⁵ Ma baling iyowa Ye̱su̱ re̱e̱nu̱n ngati aburce biila balik a̱lu̱ce̱ ke̱, kar bo̱do̱k ki̱ti̱m ru̱u̱m bali een lo̱ddi̱ng ke̱, izek Pilato nogo ne, “E̱e̱t neci nenen icu!”

⁶ Baling icinnet alaata cik olli wawaco ki lo̱ddi̱ki̱re̱ wak a̱li̱ngli̱ng ki nogo Ye̱su̱, egerenyit izeto ne, “Otoddoc nonno! Otodoyyek nonno ta̱la̱ke̱c!” Ma̱i̱je̱ Pilato obodehe nogo, izek ne, “O̱o̱tte̱ kar oot otoddoc, ma̱i̱je̱ anna ngen kumuda gi̱i̱ imma ci abaci e̱e̱ti̱ necu kar wo̱ye̱ ette kettedik nonno lo̱ki̱ko̱.”

⁷ Ommogtek olli Ya̱u̱do̱ zoz cinne̱ng, izettek zin Pilato ne, “Kanyaka naga lo̱ti̱nno̱k wagga̱c, azi zin lo̱ti̱nno̱wa̱ ne̱ke̱ ne, anyik nonno ka̱da̱k, ma̱rri̱t ming azi enne ne, ke̱e̱ni̱ Ngerrti Ta̱mu̱ta̱dde̱no̱.”

⁸ Baling izik Pilato muluk necu, o̱to̱ngo̱o̱le̱ lo̱o̱c,

⁹ kar zin ki̱tto̱ ce̱e̱z to. Uk i̱jji̱n Ye̱su̱ izek ne, “E̱e̱ni̱ dim i̱nna̱ ci orog jang?” Ijjak enne Ye̱su̱ nonno li̱i̱m niko.

¹⁰ I̱jji̱n bo̱do̱k Pilato nonno, izek ne, “Iróng orongi zozikan, iróng i̱nna̱ a̱gga̱ ming kanyai anna doiz ci wo̱ye̱ koogani icima kododoyi ta̱la̱ke̱ca̱?”

¹¹ Obodehe Ye̱su̱ nonno, izek ne, “Ming iróng anyoniki komizi ta̱mu̱-kenga, iróng wo̱ye̱ ette i̱nna̱ anyai komiz ngatinanni. Anyak e̱e̱ti̱ ci wanai anyahaka annit i̱nne̱t ko̱ mu̱nye̱n cik ommog veelek.”

¹² Orong da̱ nginatu Pilato kooga Ye̱su̱, ma̱i̱je̱ abarik ol cik e̱e̱ggi̱n Ya̱u̱d ko̱ egereny dee, azi ne, “Ming ooga i̱nna̱ e̱e̱t necu kuk, iróng i̱yo̱ko̱ i̱nna̱ e̱e̱ni̱ gooni alaan ci a̱ddi̱ki̱re̱ Romi.”

¹³ Baling izik Pilato zoz necu, anyahak Ye̱su̱ re̱e̱nu̱n kar zin enne ka̱vvu̱ lecere wa e̱e̱t wa etted gon lo̱ki̱ko̱ ko̱, ngati a̱gga̱ ol zare cik een bee ci derenyi a̱nne̱k ol cik e̱e̱ggi̱n Aramaik ne Gabbatha.

¹⁴ Ize da̱ looci wazin keng ngati adiman nege da̱i̱ne̱t cik I̱i̱te̱n wa Va̱rda̱ngi̱nto̱ biranoca. Izek zin Pilato Ya̱u̱do̱ ne “Icinnet alaan wanno̱ng icu.”

¹⁵ Egerenyit nege izeto ne, “Bite nonno ngati! Bite nonno ngati! Todo nonno ta̱la̱ke̱ca̱ ka̱da̱k!” I̱jji̱n zin Pilato nogo, izek ne, “Kotoddo alaan cunno̱ng ko̱?” O̱bo̱dde̱k alaata cik olli wawaco nonno, izettek ne, “Iróng naga kanyaka alaan imma kize alaan ci a̱ddi̱ki̱re̱ Romi do̱ niko.”

¹⁶ Ma̱i̱je̱ bali vu̱rrta̱ aanyik alaani Pilato nogo Ye̱su̱ koot kotoddoc keete wa een ta̱la̱ke̱c. Ebeit zin aciiri Ye̱su̱.

Ngin wa ododine Ye̱su̱

¹⁷ Odong zin Ye̱su̱ ta̱la̱ke̱c neci kar kuwe ngati een zara oo ci e̱e̱t ci a̱da̱ha̱, awu ol zo̱ze̱ ci ol cik e̱e̱ggi̱n Aramaik a̱nne̱k ne Gologota.

¹⁸ Kar zin kotoddoc nonno ki ol u̱gge̱ cik e̱e̱ggi̱n ram. Odode imma a̱tte̱ ci Ye̱su̱ a̱zza̱, okko co̱de̱ a̱tte̱ ci angeto, kar zin Ye̱su̱ kotodowe orgena.

¹⁹ Eteher Pilato waraga imma izong kar zin kamadek ta̱la̱ke̱c. E̱he̱rye̱ zoz neci azi ne, YE̱SU̱ WA NAZERETI NECU, EEN ALAAN CI YA̱U̱DO̱.

²⁰ Ikebit ol cik meelek Ya̱u̱do̱ zoz neci e̱he̱rye̱ ke̱, ma̱rri̱t da̱ ngin neci bali ododine Ye̱su̱ ke̱ ming ojongzo ki Jerusalem. Kar zin bo̱do̱k zoz neci ketehere u̱tu̱ge̱tti̱ne̱ cik ol cik e̱e̱ggi̱n Aramaik, ki Latin ki Gi̱ri̱k.

²¹ Utuburtek zin alaata cik olli wawaco Pilato nong, kar zin kizettek ne, “Nya ming eheri zoz ci azi ne, ‘Een enne alaan ci Ya̱u̱do̱’ Eheri weete zoz ci azi enne ne ‘Ke̱e̱ni̱ anna alaan ci Ya̱u̱do̱.’”

²² Obodehe Pilato nogo, izek ne, “Ming een zoz wanai ketehera ke̱, ketehera zin.”

²³ Baling otoddoc aciiri Ye̱su̱, idimtta ru̱u̱ma̱ni̱ ciginnek kar zin kengerit kizeto talena we̱c, kar ngen ngene kuuwe ciginnek kutungttek zar ru̱u̱m wa ngenyu ecito do̱ niko. O̱o̱tte̱ ru̱u̱m neci Ye̱su̱ amalkine da̱ alulai kodowe ki̱zzi̱ rok nginti volongi kar wo̱ye̱ da̱ kengerte.

²⁴ Izeto ne, “Gerza ming kerec naga, kovoccit abarik bibi icima wo̱ye̱ ngene ci okkoye, kar kicinnet i̱i̱na̱k ngene.” Kar zoz necu kakat mo̱o̱le̱t Warage ci Ta̱mu̱ta̱dde̱no̱ ke̱, azi ne, “Engerttek ru̱u̱ma̱ni̱ cigannik e̱le̱tti̱, kar zin bo̱do̱k kovoccit bibi ci ru̱u̱ma̱ni̱ cigannik.” Gi̱i̱ zin ci bali ogon aciiri balik odode Ye̱su̱ ke̱ necu.

²⁵ Abile da̱ e̱e̱ti̱ Ye̱su̱ keete ci een ta̱la̱ke̱c abanyca ki ngooni ki Ma̱ri̱ya̱ ngaa ci e̱e̱t ci een zara Klopas. Abile da̱ Ma̱ri̱ya̱ Madalina bu̱k ojonun nginati ododine Ye̱su̱ ke̱.

²⁶ Baling icin Ye̱su̱ yaatinne ming abile ki nuyait wa irez enne ojonun, izek zin yaatinne ne, “Ngaa cu, een icu ngerunne.”

²⁷ Kar zin kizek nuyait neci ne, “Een enne e̱e̱tu̱nno̱ng.” Imma nginati, kar zin nuyaiti neci kuuwe nonno ce̱e̱za̱ bu̱k.

Daiz ci Ye̱su̱

²⁸ A̱gga̱ Ye̱su̱ niko ming edeccai li̱ngli̱ngo̱ni̱ cinne, kar zoz bali u̱du̱ya̱i̱ Warage ci Ta̱mu̱ta̱dde̱no̱ ke̱ kakat mo̱o̱le̱t, ize ne, “A̱ru̱ka̱ koor.”

²⁹ Aave da̱ uduci ci merte ci amaktali ojonun, kar zin kidimtta ru̱u̱m ocoktek merte neci, kar kecebtek morok ci u̱u̱ni̱ kar zin kaarttek Ye̱su̱ utug.

³⁰ Baling atar Ye̱su̱ merte neci, ize zin ne, “Edeccai.” Kar zin kuluc oo, uk zin vongizi cinne ngati Ta̱mu̱ta̱dde̱no̱.

³¹ Okko i̱i̱te̱ne̱ ci reng a̱kku̱ ko̱ een wazin ci ovvo ol adimana da̱i̱ne̱t cik I̱i̱te̱n wa Yu̱bze̱nto̱ riili. I̱jji̱nne̱t zin lo̱ddi̱ki̱re̱ cik Ya̱u̱do̱ alaan Pilato abunna ming etted zoz cinne kar zin nege ku̱du̱lta̱ zo̱o̱ cik daizoit cinne̱ng bak aarik lo̱o̱c, eci nege iróng orong e̱le̱tti̱ cigge̱k ka̱vvu̱to̱ te̱le̱cwa̱ne̱.

³² I̱vi̱ta̱ zin aciiri u̱du̱le̱t zo̱o̱ cik e̱e̱t bali een oo odode ki Ye̱su̱ ke̱, kar bo̱do̱k ku̱du̱lle̱t zo̱o̱ cik ol ne̱ke̱ do̱o̱k.

³³ Baling ovvo nege a̱vvu̱na̱k Ye̱su̱, amuda a̱da̱k enne la̱du̱n, iróng zin ngen a̱du̱l zo̱o̱ ciginnek.

³⁴ Akat zin aciiroci co̱de̱ Ye̱su̱ onyit illawa, kar zin ele cinne ketera bi̱ye̱ ki maam.

³⁵ A̱du̱wa̱ e̱e̱ti̱ bali icin ke̱ zoz necu een de̱de̱, a̱du̱wa̱ enne niko abunna ka̱tu̱we̱ naga bu̱k.

³⁶ I̱i̱na̱ kaala ne̱ko̱ kar zoz bali e̱he̱rye̱ Warage ci Ta̱mu̱ta̱dde̱no̱ ke̱ kakat mo̱o̱le̱t, azi ne, “Iróng atin emmeni cinne co̱de̱ a̱du̱le̱ udut.”

³⁷ Azi bo̱do̱k zoz imma Warage ci Ta̱mu̱ta̱dde̱no̱ ne, “Acin atin nege e̱e̱t bali akati nege onyit illawa ke̱.”

Gool ci adawe ol Ye̱su̱

³⁸ I̱jji̱n zin bali vu̱rrta̱ Yosevo ci orog ci een Arimatiya Pilato kar kanyik nonno Ye̱su̱ kar kuk ka̱da̱. Een da̱ Yosevo nuyait ci Ye̱su̱ lo̱mu̱k ma̱rri̱t ming o̱ngo̱o̱le̱ enne ol cik Ya̱u̱do̱. Baling elema Pilato zoz neci, i̱ki̱ya̱ uwe Ye̱su̱ kar kuk ka̱da̱.

³⁹ Orkorrit enne ki Nikomede, e̱e̱t bali arrak eronak Ye̱su̱ ba̱a̱l ke̱. Anyaha Nikomede maal ci ongooli laala a̱ppwe̱ adak o̱ro̱bi̱ya̱ cik meelek giir.

⁴⁰ Baling ovvoye nege ele ci Ye̱su̱, e̱ce̱bi̱t zin ol cik een ram ko̱ ele cinne, kar ku̱vu̱de̱k maale ci ongooli laala ko̱, ki ru̱u̱ma̱ni̱, annu zoz necu gool ci keer ci adawe nege ol cik Ya̱u̱do̱ ol.

⁴¹ Aave da̱ nginti ovvo ol ododine Ye̱su̱ ke̱ aratawe ci anyak ngi̱lo̱m ci een jor, ngen zin bu̱k da̱ e̱e̱ti̱ imma kabawozik ngin neci udut.

⁴² Eci ize ojon I̱i̱te̱ni̱ wa Yu̱bze̱nto̱ Ya̱u̱do̱, kar bo̱do̱k ngi̱lo̱mi̱ neci kize ojon, abakttek zin Ye̱su̱ ngi̱lo̱m.