Kaviyak wak Abunna Ta̱mu̱ta̱dde̱no̱ eher Joni 1 - Tennet

Zoz ci rugeto

¹ Aave da̱ la̱du̱n kanante ci lo̱o̱tu̱ Zoz to, arumze da̱ zoz neci ki Ta̱mu̱ta̱dde̱n, een da̱ Zoz neci Ta̱mu̱ta̱dde̱n.

² Arumze da̱ enne la̱du̱n ki Ta̱mu̱ta̱dde̱n ba̱li̱ye̱ kanante ci lo̱o̱tu̱.

³ Eteehenya Zoz kaal do̱o̱k, i̱llo̱i̱ gi̱i̱ imma ci eenycai ngati a̱zze̱ne̱ enne to.

⁴ Een Zoz neci ruget ci e̱e̱t ci diiri, okko rugeti neci anyahak ol vooriten ci i̱ye̱le̱k nogo gool ci baizo.

⁵ Alanyit vooriten neci mu̱hu̱ra̱to̱, iróng bu̱k mu̱hu̱ri̱ uule kidit nonno.

⁶ I̱tto̱na̱ Ta̱mu̱ta̱dde̱n e̱e̱t ci een zara Jon.

⁷ A̱kku̱ enne kar ki̱ki̱ya̱ kibbac zoz ci vooriten neci, kar ucca ol do̱o̱k kelemit Zoz ci Ta̱mu̱ta̱dde̱no̱ zo̱ze̱ cinne.

⁸ Iróng zin ba̱li̱ye̱ Joni eliya een vooriten, a̱kku̱ enne kar ki̱ki̱ya̱ kize ci ibbac vooriten.

⁹ Een neci ba̱li̱ye̱ vooriten wa een de̱de̱, a̱kku̱ kar ki̱ki̱ya̱ kutukul ol do̱o̱k lo̱o̱ta̱.

¹⁰ I̱ki̱ya̱k Zoz neci lo̱o̱c ba̱li̱ye̱, eenycai looci ngatinne, ma̱i̱je̱ olli lo̱o̱tu̱ iróng a̱gga̱ nonno.

¹¹ A̱kku̱nna̱k enne lo̱o̱c neci een cinne ke̱, iróng zin ol waginnek elemi nonno.

¹² Ma̱i̱je̱ ol do̱o̱k wak elemtta nonno, ki wak a̱tu̱ zoz cinne, aanyik enne nogo do̱o̱k gool ci ovvo nege e̱e̱ggi̱nne̱ dooli cik Ta̱mu̱ta̱dde̱no̱.

¹³ Iróng nege bo̱do̱k a̱rri̱ta̱i̱ bi̱ye̱te̱, icima go̱o̱le̱ ci a̱rri̱ta̱ne̱ e̱e̱ti̱ ci diiri, abarik a̱rri̱ta̱ Ta̱mu̱ta̱dde̱n.

¹⁴ I̱ki̱ya̱ Zoz neci ize e̱e̱t ci diiri kar zin kabak orgene cinna, anyak deten ki zoz ci een de̱de̱. Kicinnet naga komiz cinne, komiz ci anyak enne do̱ Ngerrti Ta̱mu̱ta̱dde̱no̱ wa o̱de̱ ṯok wa a̱kku̱ ngati Baatinne.

¹⁵ U̱du̱wa̱ Joni zoz cinne, ize ne, “Een e̱e̱ti̱ cu e̱e̱t bali ka̱du̱wa̱kku̱ng kazi ne ‘A̱kku̱ atin vu̱rrte̱ cinanni, ommogja annita eci nonno ci a̱ddi̱ki̱re̱ ngatinanni.’”

¹⁶ Imma deten wa anyak enne a̱ppwe̱ ko̱, kamuda zin naga do̱o̱k ma̱yu̱we̱ne̱t ci a̱ppwe̱.

¹⁷ Anyaha ba̱li̱ye̱ Ta̱mu̱ta̱dde̱n lo̱ti̱nno̱k go̱o̱le̱ wa Musesi, kar zin kuwahek ol; okko Ye̱su̱ Ki̱ri̱sto̱ anyaha deten ki zoz wa een de̱de̱.

¹⁸ Ngen e̱e̱ti̱ imma kicin Ta̱mu̱ta̱dde̱n udut, Ngerinne wa zinino o̱de̱ ṯok een Ta̱mu̱ta̱dde̱n bu̱k ci aanyyet ka̱gga̱c Ta̱mu̱ta̱dde̱n Baatinne.

Uwak Joni zoz cinne balala

¹⁹ Icu zoz ci Joni baling i̱tto̱nte̱k nonno ol cik een Ya̱u̱d Jerusalema ki bo̱do̱k ol wak wawaco ki ol boore ci Le̱vi̱. I̱jji̱nne̱t zin a̱nne̱k ne, “E̱e̱ni̱ i̱nna̱ ngene?”

²⁰ Ozoz zin Joni, iróng abure, ozoz zoz ci abile ṯop, azi ne, “Iróng anna ke̱e̱ni̱ Ki̱ri̱sto̱ wa atahalai.”

²¹ I̱jji̱nne̱t zin nege nonno, “E̱e̱ni̱ zin i̱nna̱ ngene? E̱e̱ni̱ i̱nna̱ E̱li̱ja̱?” O̱bo̱de̱k zin enne nogo a̱nne̱k ne, “A̱zze̱ to.” I̱jji̱nne̱t zin bo̱do̱k nege nonno dee, “E̱e̱ni̱ i̱nna̱ a̱ri̱to̱i̱t ci muluk ci Ta̱mu̱ta̱dde̱no̱ wa bali u̱du̱ya̱i̱ okko atin i̱tto̱na̱i̱ ke̱?” O̱bo̱de̱k Joni nogo a̱nne̱k ne, “A̱zze̱ to.”

²² Izettek zin nonno ne, “E̱e̱ni̱ zin i̱nna̱ ngene? Du̱wa̱kke̱t, abunna kovvo kobodeka ol wak i̱tto̱nne̱t ke̱. Du̱wa̱kke̱t zin zoz ci obod ki i̱nne̱ta̱?”

²³ O̱bo̱de̱k Joni nogo zo̱ze̱ ci a̱ri̱to̱i̱t wa zoz ci Ta̱mu̱ta̱dde̱no̱ een zara Isaya ozoz azi ne, “Ke̱e̱ni̱ anna muluk ci e̱e̱to̱ ci kawe balale ci gi̱da̱ngi̱, ‘Idimantek Manyi gool ci okko ṯop.’”

²⁴ I̱tto̱na̱i̱ da̱ ol ne̱ke̱ olle cik een Varacis, a̱nne̱k Jon ne,

²⁵ I̱jji̱nne̱t zin nonno, “Ming iróng i̱nna̱ e̱e̱ni̱ Ki̱ri̱sto̱ wa atahalai, icima a̱ri̱to̱i̱t ci zoz ci Ta̱mu̱ta̱dde̱no̱ wa een E̱li̱ja̱, icima a̱ri̱to̱i̱t ci u̱du̱ya̱i̱ okko atin a̱kku̱ ke̱, a̱gga̱me̱k ol ba̱ti̱ti̱mo̱ nya?”

²⁶ O̱bo̱de̱k zin Joni nogo, “Ka̱gga̱me̱k anna ol ba̱ti̱ti̱mo̱ maame, ma̱i̱je̱ zin orgene cunno̱ng, anyak e̱e̱t imma ci abile ci iróng niga a̱gga̱yyu̱.

²⁷ A̱kku̱ atin enne vu̱rrte̱ cinanni, ommogja enne annita, iróng wo̱ye̱ anna ke̱e̱ni̱ du̱ca̱i̱t cinne.”

²⁸ Ogone kaala ne̱ko̱ do̱o̱k o̱rge̱ ci een zara Bethany, moro ci een zara Jordan o̱to̱ne̱ ci je̱e̱ni̱, ngin bali a̱gga̱me̱ke̱ Joni ol ba̱ti̱ti̱mo̱ ke̱.

Een Ye̱su̱ Nyoon ci Ta̱mu̱ta̱dde̱no̱

²⁹ Ma̱i̱je̱ nge̱rre̱ti̱n ci reng, edenya Joni Ye̱su̱ ming a̱kku̱nna̱k nonno, kar kize ne, “Icinnet, Nyoon ci Ta̱mu̱ta̱dde̱no̱ wa a̱vi̱la̱ mu̱nye̱n cik lo̱o̱tu̱!

³⁰ Een e̱e̱ti̱ icu e̱e̱t bali ka̱du̱wa̱kku̱ng ka̱nne̱kku̱ng ne, ‘Anyak e̱e̱t ci anuwannan, een enne e̱e̱t ci ommogjan eci i̱ki̱ya̱ enne oowa.’

³¹ Iróng anna eliya ka̱gga̱ nonno, ma̱i̱je̱ zo̱ze̱ cinne; ki̱ki̱ya̱ ka̱gga̱me̱k ol ba̱ti̱ti̱mo̱ maame kar ol cik Israilo ka̱gga̱c nonno.”

³² U̱du̱wa̱ zin Joni zoz cu, azi ne, “Kicina Vongiz ci Ta̱mu̱ta̱dde̱no̱ alucak lo̱o̱c ta̱mu̱-kenga kiwagon lo̱be̱rru̱i̱, kar zin ki̱tta̱k nonno.

³³ Iróng wo̱ye̱ da̱ ka̱gga̱ nonno ming iróng a̱du̱wa̱ka̱ e̱e̱ti̱ bali i̱tto̱na̱na̱ ki̱ki̱ya̱ ka̱gga̱me̱k ol ba̱ti̱ti̱mo̱ maame ke̱. A̱nne̱ka̱ ne, ‘E̱e̱t ci acinni alucak Vongizi ci Ta̱mu̱ta̱dde̱no̱ nonno ke̱, kar ki̱tta̱k nonno, a̱gga̱me̱k atin enne ol ba̱ti̱ti̱mo̱ Vongize ci A̱li̱le̱.’

³⁴ Kicina nonno, ka̱nne̱kku̱ng ne een enne Ngerrti Ta̱mu̱ta̱dde̱no̱.”

Awa Ye̱su̱ nuyak cik e̱e̱ggi̱n o̱o̱tti̱

³⁵ Imma nge̱rre̱ti̱n ci reng, abile da̱ Joni ki nuyak waginnek e̱e̱ggi̱n ram,

³⁶ kar zin kicin Ye̱su̱ ming owo izek zin nuyak ne, “Icinnet Nyoon ci Ta̱mu̱ta̱dde̱no̱!”

³⁷ Baling iziyyet nuyaha waginnek zoz neci, unuwet Ye̱su̱ niko.

³⁸ Ma baling utuhuwe Ye̱su̱ icin nogo ming annu nonno, kar enne ki̱jji̱n nogo, “Orongnyu niga nya?” O̱bo̱dde̱k nege nonno a̱nne̱k ne, “Rabbi” (wa azi keng cinne ne de̱me̱zo̱i̱t), “abai dim i̱nna̱ nga?”

³⁹ O̱bo̱de̱k enne nogo a̱nne̱k ne, “I̱vi̱ta̱ kar icinnet.” I̱vi̱ta̱ kar zin kicinnet nginti abahe enne, kar zin ka̱vvu̱to̱ ki nonno wazin neci. Aavtte zee ki̱gi̱nge̱ i̱i̱ kize yo̱mo̱n.

⁴⁰ Imma ol balik een rama aziye Jon ming ozoz ke̱ ciko Andereya wa een gotoni Si̱mo̱ne̱ Peturu.

⁴¹ Een zoz ci orong Andereya arrak oowa, orong kuruba gotoni wa een Si̱mo̱ne̱, kar ku̱du̱wa̱k nonno kizek ne, “Kurubta Missaya wa een Ki̱ri̱sto̱ wa bali atahalai.”

⁴² Kar zin Andereya kanyahak nonno rok Ye̱su̱. Icin Ye̱su̱ nonno kar zin kizek ne, “I̱nne̱t Si̱mo̱ne̱ ngerrti Joni. Anyik zar cigunnek kize Cephas, azi ungeci cik zar ne̱ko̱ ne Peturu.”

Awa Ye̱su̱ Vilip ki Nathanael

⁴³ Imma i̱i̱te̱n ci reng, odola Ye̱su̱ uk lo̱o̱ce̱ ci Ga̱li̱li̱. Urubak zin Vilip orog neci, iizek nonno ne, “Nuwan.”

⁴⁴ Een Vilipi e̱e̱t ci orog ci een Betsaida, e̱e̱ggi̱n ciko Andereya ki Peturu cik orog neci bu̱k.

⁴⁵ Uruba Vilipi Nathanael kar zin kizek ne, “Ku̱mu̱dda̱ e̱e̱t bali eher Musesi zoz ci obod ki nonno lo̱ti̱nno̱we̱ wak Ta̱mu̱ta̱dde̱no̱ ke̱, kar bo̱do̱k a̱ri̱tto̱wa̱ cik Zoz ci Ta̱mu̱ta̱dde̱no̱ keteherit zoz neci, een enne Ye̱su̱ wa orog ci een Nazeret, ngerrti Yosevo.”

⁴⁶ I̱jji̱n zin Nathanaeli Vilip izek ne, “A̱kku̱ wo̱ye̱ gi̱i̱ imma ci abunna o̱rge̱ ci een Nazeret?” O̱bo̱de̱k zin Vilipi nonno, a̱nne̱k ne, “I̱jja̱ kar cin eberene cigunnek.”

⁴⁷ Baling icin Ye̱su̱ Nathanael ming a̱kku̱nna̱k nonno, izek nonno ne, “Cin e̱e̱t ci Israiloc de̱de̱, iróng anyak volong.”

⁴⁸ I̱jji̱n zin Nathanael nonno izek ne, “A̱gga̱ya̱n?” O̱bo̱de̱k zin Ye̱su̱ nonno, a̱nne̱k ne, “Wanai ming ngen Vilipi kutuwin, kicini ming ngen aave muneca vu̱rrta̱.”

⁴⁹ Odola zin Nathanaeli ize ne, “De̱me̱zo̱i̱t, e̱e̱ni̱ i̱nna̱ Ngerrti Ta̱mu̱ta̱dde̱no̱, e̱e̱ni̱ bo̱do̱k Alaan ci Israilo.”

⁵⁰ O̱bo̱de̱k zin Ye̱su̱ nonno, a̱nne̱k ne, “I̱yo̱ko̱ elemna i̱nna̱ eci ku̱du̱wa̱i̱n kazi ne kicini wanai ming aave muneca vu̱rrta̱. Acinni atin i̱nna̱ kaal cik meelek ommog ne̱ko̱.”

⁵¹ Emena Ye̱su̱ zoza kar kizek nonno bo̱do̱k ne, “Ka̱du̱wa̱kku̱ng zoz ci een de̱de̱, acinnu atin ta̱mu̱-keng ming o̱o̱ye̱, imma anjilonya wak Ta̱mu̱ta̱dde̱no̱ ottod ne̱ke̱ ovvo uggak i̱i̱na̱k Ngerrti E̱e̱to̱.”