Je̱mi̱s 5 - Tennet

De̱mzi̱ne̱t ci obod ki ol wak een i̱tto̱k

¹ I̱yo̱ko̱ izikto da̱ ju̱rru̱m, niga ol wak e̱e̱ggi̱nnu̱ i̱tto̱k, u̱tu̱lu̱z oroot piryanzete ci atin okko i̱na̱ku̱ng ko̱.

² U̱mu̱we̱c kaala cuggo̱k, kar ngazengaze kadait ru̱u̱ma̱ni̱ cuggo̱k.

³ Egerzante o̱ro̱bi̱ya̱na̱ cuggo̱k cik een ziik cik ataltali ki dhahabi, okko atin zoz ci a̱mu̱ne̱ o̱ro̱bi̱ya̱na̱ ko̱ een cunno̱ng, adakkung atin zoz neci kiwagon gwa̱a̱. Adaztau niga kaal cik meelek i̱i̱nya̱we̱ cik okko looci aṯurneke.

⁴ Icinnet da̱! Iróng niga a̱ru̱we̱kku̱ ol balik a̱li̱ngli̱ng ma̱ne̱ne̱ cuggo̱k ko̱ o̱ro̱bi̱ya̱, a̱lu̱ nege zare cuggo̱k. Uzuca u̱lu̱wa̱ ci ol balik ettedde ma̱ne̱ne̱ cuggo̱k ko̱ iin cik Manyi wa A̱ddi̱ki̱re̱ veelek.

⁵ Abakttu niga lo̱o̱ta̱ ngatu baiz ci adakkung botorzet kar a̱gga̱c e̱le̱tti̱ cuggo̱k do̱ niko. I̱di̱ktu̱ zin u̱tu̱gu̱zzu̱ kiwagon tiina wak ovvo ol otodongi.

⁶ Etteddeu niga ol cik abunna lo̱ki̱ko̱ kar bo̱do̱k u̱ru̱kttu̱ ol cik gununik, ol balik iróng adangnyung bu̱k.

Niim no̱ngi̱tto̱n

⁷ Gotonogga ki ngonogga tu̱we̱nta̱, inimet no̱ngi̱tto̱n baiza zee ki̱ki̱ya̱ Manyi. Icinnet ol wak e̱e̱vi̱ye̱ ming e̱re̱ye̱ ki̱bbi̱r ma̱na̱, anime ere ta̱mu̱ ci lomoto.

⁸ Inimet niga bu̱k no̱ngi̱tto̱n, abunna ming arikku zi̱nze̱tti̱ lo̱o̱c kar ibilet ṯop baiza, eci ize ojon i̱i̱te̱ni̱ ci a̱kku̱nne̱ Manyi.

⁹ Ma ozozu e̱le̱tti̱, ettedekkung atin Ta̱mu̱ta̱dde̱n i̱ge̱t lo̱ki̱ko̱. E̱re̱ye̱ lo̱ki̱ko̱ cunno̱ng tatuga.

¹⁰ Gotonogga ki ngonogga tu̱we̱nta̱, kar abunna ming a̱gga̱yyu̱ niimenet no̱ngi̱tto̱n, i̱no̱ni̱t baiz ci a̱ri̱tto̱k balik apirna ozoz zare cik Manyi.

¹¹ Ki i̱yo̱ko̱ ming a̱gga̱yyu̱ ko̱, ku̱mu̱yu̱kte̱ naga ol balik inimet no̱ngi̱tto̱n. Iziktu niga niimenet ci bali anime e̱e̱ti̱ ci een zara Job no̱ngi̱tto̱n. Icinntu bo̱do̱k nya ci anyahak Manyi baiz ci Jobi bali vu̱rrta̱. Anyak Manyi rezinet ki deten ci a̱ppwe̱ oroot.

¹² Gotonogga ki ngonogga tu̱we̱nta̱, ma i̱tto̱ni̱ku̱ zoz zare cik ta̱mu̱-kengo icima zare cik lo̱o̱tu̱ icima gi̱i̱ imma ci aave do̱. Ming een zoz ci elema i̱nna̱, lema, ming een zoz ci aburi i̱nna̱, tuburo, icima ettedekkung atin lo̱ki̱ko̱ i̱ge̱ta̱.

Kalac Ta̱mu̱ta̱dde̱n tu̱we̱nta̱

¹³ Ming anyak e̱e̱t imma ngatinno̱ng no̱ngi̱tto̱n cik apirnane enne, anyik kala Ta̱mu̱ta̱dde̱n. Ming anyak e̱e̱t imma ngatinno̱ng ci atalne, anyik nonno keben lo̱ngnyo̱k cik innate Ta̱mu̱ta̱dde̱n.

¹⁴ Ming anyak e̱e̱t imma ci omori ngatinno̱ng, anyik nonno kutu lo̱ddi̱ki̱re̱ cik ke̱le̱ci̱a̱k kar kalayek nonno Ta̱mu̱ta̱dde̱n kar ku̱vu̱de̱t nonno maala zare cik Manyi.

¹⁵ Eci lawinet ci alaye tu̱we̱nta̱ ko̱, aanyik atin e̱e̱t ci omori kubunna; eela atin Manyi nonno kitinga moriza. Ming anyak enne da̱ mu̱nye̱n, alalnek atin Manyi nonno.

¹⁶ I̱yo̱ko̱ zin, uturtta mu̱nye̱n cuggo̱k gonoggu kar alayek e̱le̱tti̱ cuggo̱k Ta̱mu̱ta̱dde̱n kar ubunntta. Okkomi lawinet ci e̱e̱t ci abunna, kar bo̱do̱k ki̱li̱ngli̱ng oroot.

¹⁷ Een bali a̱ri̱to̱i̱ti̱ ci een E̱li̱ja̱ e̱e̱t ci diiri ki i̱yo̱ko̱ naga niko. Ala da̱ enne Ta̱mu̱ta̱dde̱n ba̱li̱ye̱ gerza ming aṯile ta̱mu̱, iróng zin ba̱li̱ye̱ ta̱mu̱ aṯile e̱rki̱nya̱ i̱i̱yo̱ ki nyelowi torkonom.

¹⁸ Imma bali vu̱rrta̱, alawo enne bo̱do̱k kar zin ta̱mu̱-kengi kanyaha ta̱mu̱ kiṯil, i̱bbi̱r zin looci.

¹⁹ Gotonogga ki ngonogga tu̱we̱nta̱, ming anyak e̱e̱t ci i̱ti̱k tu̱ zo̱ze̱ ci een de̱de̱, anyik e̱e̱t imma kobodai nonno,

²⁰ a̱a̱dda̱ zoz cu ju̱rru̱m: Ming eela e̱e̱ti̱ imma e̱e̱t ci mu̱nye̱nu̱ kutungek mu̱nye̱n lo̱o̱c, a̱ti̱ri̱z atin enne nonno daiza kar ku̱bu̱ng mu̱nye̱n cik meelek giir.