Je̱mi̱s 4 - Tennet

Ma irezzu kaal wak lo̱o̱tu̱

¹ Nya ci anyaha jo̱o̱re̱t ki dango orgene cunno̱ng? Een kaal ne̱k a̱vvu̱ zo̱ze̱ ci orongnyu niga kaal cik a̱ti̱ko̱nu̱ imma i̱ge̱t zi̱nze̱tti̱nne̱ ko̱, cik anyaha jo̱o̱re̱t.

² Orongnyu niga gi̱i̱ imma, abarik iróng zin amudannu, a̱ru̱kku̱ zin ol, orongnyu kaal cik amin zi̱nze̱tti̱ cuggo̱k, abarik iróng niga arubannu gi̱i̱ ci orongnyu. Adangonu zin kar u̱ru̱kto̱. Iróng niga amudannu, eci iróng niga a̱jji̱nnu̱ Ta̱mu̱ta̱dde̱n.

³ Ming a̱jji̱nnu̱ niga Ta̱mu̱ta̱dde̱n, iróng niga amudannu, eci a̱jji̱nnu̱ niga zi̱nze̱tti̱nne̱ cik gerzek, icima ovvo atin niga ogonnu kaal ne̱ke̱ kaal cik amin zi̱nze̱tti̱ cuggo̱k.

⁴ Niga ol cik iróng o̱ngo̱o̱le̱ Ta̱mu̱ta̱dde̱n ko̱, iróng niga a̱gga̱yyu̱ rezinet ci kaal cik lo̱o̱tu̱ ming anyaha marnonet ki Ta̱mu̱ta̱dde̱n? Ming orong e̱e̱ti̱ imma kirez kaal cik lo̱o̱tu̱, ize enne mo̱dde̱ni̱t ci Ta̱mu̱ta̱dde̱no̱.

⁵ Icima i̱no̱nnu̱ niga ozoz Waraga ci Ta̱mu̱ta̱dde̱no̱ zoz necu gaganiko, kar vongizi ci abak ngatinna ko̱ kanyak meder oroot.

⁶ Abarik enne aanyet agit deten ci a̱ppwe̱. Zoz zin ci ozoz Waraga ci Ta̱mu̱ta̱dde̱no̱ azi ne: “Adang Ta̱mu̱ta̱dde̱n e̱e̱t ci odong ele abarik aanyik deten e̱e̱t ci iróng odong ele.”

⁷ Aanycik zin e̱le̱tti̱ ciggo̱k Ta̱mu̱ta̱dde̱n. Utuburet lo̱rye̱ni̱t, kar atin enne ki̱vi̱ru̱ng.

⁸ Ojongozit Ta̱mu̱ta̱dde̱n, kar enne kojongozung i̱ge̱t bu̱k. Utuunyet azzin cuggo̱k, niga olli mu̱nye̱nu̱, kar aanycik zi̱nze̱tti̱ kizeto caale, niga ol cik anyakku zi̱nze̱tti̱ rama ko̱.

⁹ I̱yo̱ko̱ zin u̱tu̱lu̱z u̱lu̱wa̱. Utuhuwet rari cunno̱ng kize u̱lu̱wa̱ kar talninet cunno̱ng kize mozinet.

¹⁰ Ma odongnyu e̱le̱tti̱ ngati Manyi, kar atin enne kodongeung ta̱dde̱n.

¹¹ Gotonogga ki ngonogga tu̱we̱nta̱, ma ozozu gonoggu gerzet. Ming ozoz e̱e̱ti̱ imma gooni gerzet icima apahek nonno lo̱ki̱ko̱, abarik ozoz enne gerzet zo̱ze̱ ci lo̱ti̱nno̱k kar kapahek lo̱ki̱ko̱. Ming apahek i̱nna̱ lo̱ki̱ko̱ lo̱ti̱nno̱k, iróng i̱nna̱ azunne nogo, abarik i̱nna̱ odongi ele ngati lo̱ti̱nno̱k ne̱ke̱.

¹² Anyak e̱e̱t co̱de̱ ṯok, Ta̱mu̱ta̱dde̱n ci aanyik ol lo̱ti̱nno̱k kar ketted lo̱ki̱ko̱, nonno do̱ ci uule ki̱ti̱ri̱z kar kidita ol do̱o̱k. Abarik, e̱e̱ni̱ i̱nna̱ ngene kar ettedik e̱e̱t ci diiri lo̱ki̱ko̱ ko̱?

Ma odongnyu e̱le̱tti̱ zo̱ze̱ ci lo̱ze̱ti̱nu̱

¹³ I̱yo̱ko̱ zin izikto ju̱rru̱m, niga ol wak a̱nnu̱ ne, “I̱yo̱ko̱ icima loza kovvoya atin markace cu icima ci, kovvo kabak nginati e̱rki̱t co̱de̱, ka̱li̱ngli̱ng kamuda o̱ro̱bi̱ya̱.”

¹⁴ Nya, ming iróng niga bu̱k a̱gga̱yyu̱ gi̱i̱ ci a̱kku̱ loza. Nya ci een ruget cunno̱ng? Ogonnu niga kiwagon i̱do̱ye̱ ci a̱kku̱ do̱yo̱i̱t kar ki̱zzi̱ dakdak.

¹⁵ Abunna abarik ming a̱nnu̱ ne, “Ming een gi̱i̱ ci orong Manyi, karuge atin kar ku̱tu̱gu̱z gi̱i̱ cu icima ci.”

¹⁶ Ki i̱yo̱ko̱ odongnyu niga e̱le̱tti̱ ko̱, een donginet e̱le̱tti̱ zoz ci lo̱rye̱nto̱.

¹⁷ Niga zin ol do̱o̱k, wak a̱gga̱yyu̱ gi̱i̱ ci abunna kar ming orong e̱e̱ti̱ ku̱tu̱gu̱, iróng zin ngen ogoni, abarik zin u̱tu̱gu̱ enne mu̱nye̱n.