Je̱mi̱s 3 - Tennet

Zuute a̱ha̱t

¹ Gotonogga ki ngonogga tu̱we̱nta̱, iróng wo̱ye̱ ol cik meelek ngatinno̱ng e̱e̱ggi̱n de̱me̱zzo̱k, eci niga a̱gga̱yyu̱, naga ol wak ke̱de̱me̱zi̱na̱ ko̱, etted atin Ta̱mu̱ta̱dde̱n lo̱ki̱ko̱ cinna̱ng oroot.

² Kogon naga do̱o̱k mu̱nye̱n go̱o̱lo̱we̱ cik aavtte do̱ do̱. Ming ngen e̱e̱ti̱ imma kabac i̱i̱te̱n imma gi̱i̱ye̱ ci ozoz enne, een enne e̱e̱t ci caale paz, azunne ele cinne ju̱rru̱m.

³ Ming kecebik naga zi̱i̱t ki baruc u̱tu̱ge̱tti̱ cik vartangenu abunna ming o̱ngo̱o̱li̱ne̱ta̱, kuhu wo̱ye̱ naga e̱le̱gi̱t neci do̱o̱k.

⁴ Icinnet zin da̱ zoz ci i̱be̱t wak a̱ddi̱ki̱re̱. Ming a̱ddi̱ki̱re̱ i̱be̱tta̱ ne̱ke̱ nu̱nu̱n, owo maame ngoota, amacuc ol i̱be̱t gi̱i̱ye̱ cidici kar e̱e̱ti̱ ci amacuci kuwe go̱o̱le̱ ci orong enne.

⁵ Ogon zin a̱ha̱tti̱ bu̱k niko, een a̱ha̱tti̱ gi̱i̱ cidici eliye ci e̱e̱t ci diiri, imma ngatu odong e̱e̱ti̱ ele a̱ha̱ta̱ kaale cik a̱ddi̱ki̱re̱. Icinnet ming atuz gwa̱a̱ cidici i̱rri̱t ci a̱ddi̱ki̱re̱.

⁶ Ogon a̱ha̱tti̱ bu̱k kiwagon gwa̱a̱, een enne gi̱i̱ ci lo̱rye̱nto̱ kaale cik ele ci e̱e̱t ci diiri. Egerzan ele ci e̱e̱t ci diiri do̱o̱k, akannek ele ci e̱e̱t ci diiri do̱o̱k gwo̱o̱ ci a̱kku̱ ngati alanyce gwa̱a̱ udut.

⁷ Aanyik e̱e̱ti̱ ci diiri elegje do̱o̱k kizeto gunune, iballi, elegje wak a̱vu̱vu̱t lo̱o̱ta̱ ki wak abak nyatapare ci a̱ddi̱ki̱re̱ bu̱k,

⁸ ma̱i̱je̱ ngatu, i̱llo̱i̱ e̱e̱t imma ci anyike a̱ha̱t kize gunun. I̱ti̱k a̱ha̱tti̱ tu̱, anyak minyiminy ci a̱ru̱we̱ ol ka̱da̱i̱to̱.

⁹ Kinnat gon naga Manyitinna ki Be̱e̱ti̱nna̱ a̱ha̱ta̱, kar bo̱do̱k a̱ha̱ta̱ kotore ol cik diirik balik eenyca Ta̱mu̱ta̱dde̱n ku̱tu̱gu̱zzo̱ ki enne.

¹⁰ Iyowa zoz ci ka̱di̱ngdi̱nga̱ne̱ Ta̱mu̱ta̱dde̱n ki to̱ri̱ne̱t utuge co̱de̱ ko̱ niko. Gotonogga ki ngonogga tu̱we̱nta̱, gerza zoz necu ming ogone niko.

¹¹ A̱ri̱ya̱ wo̱ye̱ gon maama cik emede ki cik abukcule e̱be̱re̱ce̱ co̱de̱?

¹² Gotonogga ki ngonogga tu̱we̱nta̱, a̱bbi̱rna̱ wo̱ye̱ keet ci een muune i̱ngi̱ro̱, icima keet ci ogon ki lobata a̱bbi̱rna̱ wo̱ye̱ muune? Iróng zin e̱be̱re̱ci̱ ci anyak maam cik abukcule ukce kize maam cik emede.

Genyiz wa een de̱de̱

¹³ Ming anyak e̱e̱ti̱ imma genyiz kar ka̱gga̱ zoz orgene cunno̱ng, anyik nonno ki̱ye̱la̱ baize cinne abunna ko̱, go̱o̱le̱ ci ogone enne kaal zinine ci alali a̱kku̱ genyiza.

¹⁴ Ma̱i̱je̱ ming alugunyi i̱nna̱ meder ki rezinet ele cunne do̱ zinine cunne, ma odongi ele cunne zo̱ze̱ neci icima amikzene zoz ci een de̱de̱.

¹⁵ Iróng zin genyizi ci ogon niko a̱kku̱ ta̱mu̱-kenga, een genyiz ci lo̱o̱tu̱, iróng anyak zoz ci vongizo, anyak zoz ci lo̱rye̱nto̱.

¹⁶ Eci ming anyai i̱nna̱ meder ki rezinet ele cunne do̱, okko baizi ngoronya ki kaal cik gerzek a̱ti̱ki̱ tu̱.

¹⁷ Imma zin genyizi ci a̱kku̱ ta̱mu̱-kenga een caala paz; kar zin kirez gano, alali mului, a̱gga̱ zoz ju̱rru̱m, aziye zoz ju̱rru̱m, anyak deten ki zoz ci abunna, iróng enger ol kar kanyak zoz ci een de̱de̱.

¹⁸ Imma ol cik anyaha gano ko̱, aanyik ol cik meelek kubunnta.