Je̱mi̱s 2 - Tennet

Abure Ta̱mu̱ta̱dde̱n tahalinet

¹ Gotonogga ki Ngonogga tu̱we̱nta̱, ki i̱yo̱ko̱ ming ke̱e̱ggi̱n naga ol wak ka̱tu̱ Manyitinna Ye̱su̱ Ki̱ri̱sto̱, ma ahali ol.

² Ma wo̱ye̱ ming a̱vvu̱na̱kku̱ng ol rama ngati ovvo a̱di̱ngdi̱nga̱nnu̱ Ta̱mu̱ta̱dde̱n; aim e̱e̱ti̱ co̱de̱ ru̱u̱ma̱ni̱ cik a̱zi̱ze̱ anyak ki dhahab, okko e̱e̱ti̱ co̱de̱ ci amati, aim ru̱u̱ma̱ni̱ cik erece i̱tto̱ ecito.

³ Ming a̱ti̱ri̱zu̱ niga e̱e̱t ci aim ru̱u̱ma̱ni̱ cik a̱zi̱ze̱ kar ize ne, “Icu lecer ci abunna een cunne,” ma̱i̱je̱ ngatu a̱nne̱k e̱e̱t ci amati ko̱ ne, “Bil i̱nna̱ ngati” icima “A̱vvu̱ lo̱o̱ta̱ todowai zoone cigannik,”

⁴ Ma ogonnu niko, anyahaku niga ngero e̱le̱tti̱ cuggo̱k, etteddu niga lo̱ki̱ko̱ zi̱nze̱tti̱nne̱ cik gerzek.

⁵ Izikto, gotonogga ki ngonogga tu̱we̱nta̱, Ta̱mu̱ta̱dde̱n ci ahala ol cik amati ngati acine ol cik diirik kar kizeto ol cik een jain tu̱we̱nta̱, kar karagizet ba̱a̱li̱ne̱t ci u̱du̱wa̱k enne ol wak irez nonno.

⁶ Abarik niga odomtu ol wak amati. Amire ki ol wak een jain cik adakkung? Amire ki nogo cik ovvoyyung lo̱ki̱ka̱?

⁷ Abarik niga odomtu zare cik abunna Manyi karumene naga ko̱.

⁸ Ming azunnu niga lo̱ti̱nno̱k wak riilik Warage ci Ta̱mu̱ta̱dde̱no̱ e̱he̱rye̱ azi ne, “Irez e̱e̱t ci locariyo ki i̱yo̱ko̱ ming irezi i̱nna̱ ele cunne ko̱,” ogonnu niga zoz ci een de̱de̱.

⁹ Ma̱i̱je̱ ming irezzu niga ol lo̱lo̱i̱t, u̱tu̱gu̱zzu̱ mu̱nye̱n kar lo̱ti̱nno̱wa̱ kettedeung i̱ge̱t lo̱ki̱ko̱.

¹⁰ Imma ming azunne e̱e̱ti̱ lo̱ti̱nno̱k wak Ta̱mu̱ta̱dde̱no̱ ko̱ do̱o̱k, kar abac co̱de̱, ize enne gerza ngati a̱du̱le̱ lo̱ti̱nno̱k do̱o̱k.

¹¹ Imma e̱e̱ti̱ ci azi ne, “ma orootonu ki ngaai cik ollu,” azi bo̱do̱k ne, “Ma amunyi e̱e̱t ci diiri.” Ming iróng i̱nna̱ orootonu ki ngaai imma ngatu amunyi e̱e̱t, u̱du̱lu̱ i̱nna̱ lo̱ti̱nno̱k.

¹² Ozozit kar u̱tu̱gu̱z kaal ki ol cik ovvo ettedonik lo̱ki̱ko̱ lo̱ti̱nno̱we̱ cik a̱a̱nyu̱ng abait labak,

¹³ eci te̱di̱ne̱t lo̱ki̱ko̱ ci gerze okko ngati e̱e̱t ci iróng anyak deten. Ommog zin deteni lo̱ki̱ko̱.

Tu̱we̱ne̱t ki li̱ngli̱ngo̱n

¹⁴ Gotonogga ki ngonogga tu̱we̱nta̱, nya ci abunna ming azi e̱e̱ti̱ ne kanyai enne tu̱we̱ne̱t imma ngatu iróng ogonik ol li̱ngli̱ngo̱n? A̱ti̱ri̱z wo̱ye̱ tu̱we̱ne̱t ci ogon niko ko̱ nonno?

¹⁵ Ming wo̱ye̱ anyak gotonet icima ngoonet ci iróng anyak ru̱u̱ma̱ni̱ ki da̱i̱ne̱t.

¹⁶ Ming a̱nne̱k e̱e̱ti̱ co̱de̱ ngatinno̱ng nonno ne, “Bit labak, abunna atin baizi cunne; a̱vvu̱ ngati a̱bu̱re̱, daho ju̱rru̱m,” ma̱i̱je̱ ngatu i̱llo̱i̱ gi̱i̱ imma ci anyike enne e̱e̱t neci keelai ele, nya ci abunna ngatu?

¹⁷ Ogon zin bo̱do̱k niko, tu̱we̱ne̱t do̱ niko, ming iróng orkor ki bunnat ki i̱rrke̱ne̱t, ogon ki gi̱i̱ ci a̱da̱ha̱.

¹⁸ Ma̱i̱je̱ atin e̱e̱ti̱ imma azi ne, “Anyai i̱nna̱ tu̱we̱ne̱t; kabunna anna ki̱i̱rke̱.” Ye̱le̱ka̱ da̱ tu̱we̱ne̱t cunne ci i̱llo̱i̱ rok bunnat ki i̱rrke̱ne̱t, kar anna ki̱ye̱le̱i̱ tu̱we̱ne̱t cinanni go̱o̱le̱ ci kogonne anna kaal.

¹⁹ A̱tu̱ i̱nna̱ de̱de̱ anyak Ta̱mu̱ta̱dde̱n co̱de̱. Abunna! Elemi rok kuulo cik lo̱rye̱nta̱k bu̱k zoz necu, abarik abak zin nege bba̱ri̱to̱na̱.

²⁰ Imma i̱nna̱ e̱e̱ti̱ ci tarbali ko̱, orongi i̱nna̱ cin ming een tu̱we̱ne̱t ci i̱llo̱i̱ bunnat ki i̱rrke̱ne̱t, een gi̱i̱tareng?

²¹ Amire ki ji̱ji̱ti̱nna̱ Aburaham ci een e̱e̱t ci abunna ngati aanyik enne Ta̱mu̱ta̱dde̱n ngerinne I̱sa̱ko̱ kize wawac i̱te̱la̱?

²² Icinntu niga tu̱we̱ne̱t cinne ki bunnat ki i̱rrke̱ne̱t ming a̱li̱ngli̱ng nga̱to̱de̱, idimane tu̱we̱ne̱t ke̱le̱zzo̱ gi̱i̱ye̱ ci u̱tu̱gu̱ enne.

²³ Akat zin zoz Warage ci Ta̱mu̱ta̱dde̱no̱ mo̱o̱le̱t, azi ne, “Elema zin Aburahami zoz ci Ta̱mu̱ta̱dde̱no̱ kar enne kanyik nonno kize e̱e̱t ci abunna,” kar ol kutuwec nonno kize gooni Ta̱mu̱ta̱dde̱n.

²⁴ Acinnu niga a̱gga̱ ol e̱e̱t ming abunna gi̱i̱ye̱ ci ogon enne, iróng een zo̱ze̱ ci tu̱we̱nto̱ do̱.

²⁵ Ogon zin bo̱do̱k niko, een Rahabi ngaa ci een a̱li̱ya̱i̱t ko̱ ngaa ci abunna gi̱i̱ye̱ bali u̱tu̱gu̱ enne, baling aanyik enne ro̱tto̱k ka̱ta̱gu̱zzo̱ ce̱e̱ze̱ cinne, kar ki̱tto̱n nogo koot go̱o̱le̱ emani kilitet olli o̱rgu̱.

²⁶ Ogon zin bo̱do̱k ki i̱yo̱ko̱, ming aave ele ci e̱e̱to̱ ki̱zzi̱ vongizi to, a̱da̱k enne, ogon bo̱do̱k niko, ming anyak e̱e̱ti̱ tu̱we̱ne̱t kar ngatu iróng a̱li̱ngli̱ngi̱, ogon tu̱we̱ne̱t cinne ki ci a̱da̱ha̱.