Je̱mi̱s 1 - Tennet

¹ Annita Je̱mi̱s wa ke̱e̱ni̱ du̱ca̱i̱t ci Ta̱mu̱ta̱dde̱no̱ ki Manyi Ye̱su̱ Ki̱ri̱sto̱ ko̱ ele nenen ci keheri waraga cu. Keherakkung anna waraga cu i̱ge̱t booryyok wak e̱e̱ggi̱n omoto ki rama, wak azzanonik lo̱o̱cco̱k do̱o̱k. Kizzayung i̱ge̱t veelek zare cik Manyi Ye̱su̱ Ki̱ri̱sto̱.

Genyiz ki tu̱we̱ne̱t

² Gotonogga ki ngonogga tu̱we̱nta̱, abunna zin kaavtte talninta, ming nu̱nu̱n atimanet no̱ngi̱tto̱na̱ go̱o̱lo̱we̱ cik aavtte do̱ do̱ baiza.

³ Eci Aanyyet timaninet ci tu̱we̱ne̱t cinna gool ci kanime no̱ngi̱tto̱n.

⁴ Abunna nimenet no̱ngi̱tto̱n ming edeca li̱ngli̱ngo̱n cinne baize cunne kar atin i̱nna̱ a̱vvu̱ ju̱rru̱m, ize i̱nna̱ e̱e̱t ci anyai arizet baiza, i̱llo̱i̱ gi̱i̱ imma ci a̱zze̱ ngatunne to.

⁵ Ming anyak e̱e̱t imma ngatinno̱ng ci iróng anyak genyiz, anyik nonno ki̱jji̱n Ta̱mu̱ta̱dde̱n wa i̱i̱rke̱, aanyik enne ol do̱o̱k genyiz ci iróng enne bu̱k a̱jji̱nni̱ i̱nne̱t ming a̱jji̱nni̱ i̱nna̱ nonno.

⁶ Abarik zin gon ming a̱jji̱n e̱e̱ti̱ Ta̱mu̱ta̱dde̱n, abunna ming a̱tu̱we̱ enne zinine cinne do̱o̱k, kar iróng anyak zi̱nze̱tti̱ rama. Eci e̱e̱ti̱ ci anyak zi̱nze̱tti̱ rama, ogon kiwagon tawani ci nyataparo omone ngooti, omone ngooti tawan go̱o̱lo̱we̱ do̱o̱k.

⁷ Imma e̱e̱ti̱ ci anyak zi̱nze̱tti̱ rama, ma i̱no̱ni̱ azi ne, aanyi atin Manyi gi̱i̱ imma;

⁸ Abarik ming uk enne orong kaal cik kar Manyi kaanyik nonno, ogon enne kiwagon e̱e̱ti̱ ci anyak zi̱nze̱tti̱ ram, iróng ogon kaal ne̱ke̱ do̱o̱k ju̱rru̱m.

⁹ Imma gotonet ki ngonogget wak a̱tu̱we̱ apirna kaale, anyik katalto kodongit e̱le̱tti̱ ming okko Ta̱mu̱ta̱dde̱n eela nogo.

¹⁰ Imma e̱e̱ti̱ ci a̱tu̱we̱ een i̱to̱i̱t ko̱, anyik katalo ming ovvo kaala ne̱ke̱ a̱zze̱. Eci a̱zze̱ atin kaala ne̱ke̱ dakdak kiwagon vu̱rre̱na̱ cik keenu ming ovoc koor zee ku̱tu̱ru̱ta̱i̱ ki̱ta̱za̱k lo̱o̱c.

¹¹ Aara koor ci a̱bu̱re̱ ovoc vu̱rre̱n kodoit ne kak, ki̱ta̱za̱k lo̱o̱c bak iróng ngen a̱zi̱ze̱ dee. Ogon bu̱k niko, a̱da̱i̱ zin atin ol wak een i̱tto̱k bu̱k ngati a̱li̱ngli̱nge̱ nege.

¹² A̱mu̱yu̱k Ta̱mu̱ta̱dde̱n e̱e̱t ci abak baiz ci anime no̱ngi̱tto̱n wak atimane ol nonno, eci ming inim enne kaal ne̱ko̱ do̱o̱k labak, aanyik atin Ta̱mu̱ta̱dde̱n nonno baiz ci aave udut ki bali u̱du̱wa̱k enne ol wak irez nonno ke̱.

¹³ Ming umuda i̱nna̱ timaninet baiza, gerza ming azi e̱e̱ti̱ ne, “Atimana Ta̱mu̱ta̱dde̱n.” Eci Ta̱mu̱ta̱dde̱n iróng atiman ol kaale cik gerzek, iróng enne gon atiman ol.

¹⁴ Abarik timaninet een gi̱i̱ ci a̱kku̱ zinine ci e̱e̱to̱ gi̱i̱ye̱ ci amin zinin cinne, kar ku̱tu̱gu̱ra̱k zin nonno gi̱i̱ ci gerze ko̱.

¹⁵ Ming ibbitet kaala cik amin zinin ko̱ baiz cunne, aanyik zin e̱e̱t ci diiri ki̱tto̱ mu̱nye̱n, ming iddera gi̱i̱ ci gerze ko̱ baiz ci e̱e̱to̱ do̱o̱k, anyaha zin daiz.

¹⁶ Gotonogga ki ngonogga tu̱we̱nta̱, ma anyikku gi̱i̱ imma kalabaung baiza.

¹⁷ A̱kku̱ muci ci abunna ta̱mu̱-kenga, ngati Baba bali eenyca kaal cik e̱e̱ggi̱n vooriten do̱o̱k ta̱mu̱-kenga. Iróng Ta̱mu̱ta̱dde̱n ukce kiwagon mu̱hu̱ri̱te̱ni̱ ming i̱ki̱ya̱ vooriteni.

¹⁸ Atahalaet enne agit zo̱ze̱ cinne wa een de̱de̱, kar kaanyyet ruget, kar naga kizet muci ciginnek wak oowu kaale wak eteehenya enne do̱o̱k.

Iziyyet zoz ci Ta̱mu̱ta̱dde̱no̱ kar u̱tu̱gu̱z niko

¹⁹ Gotonogga ki ngonogga tu̱we̱nta̱, iziyyet zoz cu ju̱rru̱m: Abunna gon e̱e̱ti̱ ming aziye zoz ataman, ma a̱li̱bo̱ni̱k zoz, ma adunya zinin ataman,

²⁰ eci mozinet ci e̱e̱to̱, iróng anyaha bunnat ci orong Ta̱mu̱ta̱dde̱n ko̱.

²¹ Ibilizet kaal wak gerzek lo̱rye̱nta̱k do̱o̱k wak aavtte orgene cunno̱ng odohize. Elemtta zi̱nze̱tti̱nne̱ cik alali zoz wa een de̱de̱, aarik Ta̱mu̱ta̱dde̱n zi̱nze̱tti̱ cuggo̱k kize ci a̱ti̱ri̱z vongizzok cuggo̱k.

²² Ma aziknnu zoz ci Ta̱mu̱ta̱dde̱no̱ gaganiko, kar zin u̱lu̱te̱t e̱le̱tti̱ cuggo̱k. U̱tu̱gu̱z zoz ci a̱du̱wa̱ zoz neci.

²³ Imma e̱e̱ti̱ ci aziye zoz ci Ta̱mu̱ta̱dde̱no̱ iine do̱, imma ngatu iróng a̱li̱ngli̱nge̱ zoz neci; ogon enne kiwagon e̱e̱ti̱ ci acin ele cinne miraya.

²⁴ Egelem e̱e̱ti̱ ele miraya zee, ming okko enne okko, iróng ngen a̱gga̱ ogon ele cinne wanai ku̱.

²⁵ Imma e̱e̱ti̱ ci aziye lo̱ti̱nno̱k wak Ta̱mu̱ta̱dde̱no̱ aanyet ku̱tu̱gu̱z kaal labak ci iróng ko̱ngo̱o̱li̱ne̱ gi̱i̱ imma, kar kuzute lo̱ti̱nno̱k ne̱ke̱, iróng erehek lo̱ti̱nno̱wa̱ balik izik enne ke̱, a̱mu̱yu̱k atin Ta̱mu̱ta̱dde̱n nonno kaale cik ogon enne do̱o̱k.

²⁶ Ming azi e̱e̱ti̱ imma ne, ke̱e̱ni̱ enne e̱e̱t ci Ta̱mu̱ta̱dde̱no̱, imma ngatu iróng azunne a̱ha̱t cinne, a̱lu̱t enne ele cinne, izeto kaala wak u̱tu̱gu̱ enne tu̱we̱nte̱ cinne ko̱ do̱o̱k kaalakreng, iróng tu̱we̱ne̱t cinne ngen a̱li̱ngli̱ng Ta̱mu̱ta̱dde̱na̱.

²⁷ Imma e̱e̱ti̱ wa a̱di̱ngdi̱nga̱n Ta̱mu̱ta̱dde̱n wa een Be̱e̱ti̱nna̱ ko̱, aave enne kize caala ne paz, i̱llo̱i̱ rok mu̱nye̱n, ogon enne kaal ciko: Azunne bo̱yyo̱k ki ngaai cik boyek ngati apirnane, kar kuzute ele cinne kaale cik lo̱o̱tu̱.