I̱bu̱ru̱ 9 - Tennet

Lawinet ci alawe ol Ta̱mu̱ta̱dde̱n Ce̱e̱ze̱ cinne lo̱o̱ta̱

¹ A̱gga̱yyu̱ niga anyak go̱o̱llo̱k cik alawe ol Ta̱mu̱ta̱dde̱n olome bali reeni u̱du̱wa̱ enne oowa ke̱, anyak ti̱ti̱ ci bali eenyet Musesi ci alawe ol Ta̱mu̱ta̱dde̱n lo̱o̱ta̱ ngatu.

² Eeteheeny Muses Ce̱e̱z wa Ta̱mu̱ta̱dde̱no̱ een ti̱ti̱, enger ecito lak rama. Een nginti o̱o̱wu̱ ko̱ zara ne Nginti A̱li̱le̱ kar kanyak gi̱i̱ ci abilne tukulena, anyak bo̱do̱k nginti anyak umune ci a̱li̱le̱.

³ Anyak ru̱u̱m ci enger nginti o̱o̱wu̱ ko̱ ngati een rama ko̱, kar nginti een rama ko̱ een zara Nginti A̱li̱le̱ Oroot.

⁴ Anyak ngineci kaal ciko, i̱te̱le̱ ci abburutane olli wawaco lotagong ci adimanai zu̱rte̱nte̱ ci een dhahab, ki bo̱do̱k ce̱e̱ndu̱k ci olom bali reeni u̱du̱wa̱ Manyi adimanai zu̱rte̱nte̱ ci een dhahab, anyak ce̱e̱ndu̱we̱ neci í̱jjó̱ ci anyak da̱i̱ne̱t cik een maana balik a̱ju̱ka̱k Manyi olli Musesi balala ke̱, ki cool ci Aaroni alize ba̱a̱li̱n co̱de̱ kanyak o̱ya̱u̱, ki biyen rama cik zabalik eheronik lo̱ti̱nno̱wa̱ balik aanyik Ta̱mu̱ta̱dde̱n Muses een omoto ke̱, e̱e̱ggi̱n ne̱ko̱ olom bali reeni u̱du̱wa̱ Manyi.

⁵ Imma ce̱e̱ndu̱we̱ ci olom neci, aburuk anjilonya cik Ta̱mu̱ta̱dde̱no̱ een rama adimanai zu̱rte̱nte̱ ci een dhahab kar kurumuzzet ṯaba, i̱ye̱la̱ di̱ngdi̱ngo̱n ci zoz ci Ta̱mu̱ta̱dde̱no̱. Aparanek alaani ci a̱ddi̱ki̱re̱ wawaco bi̱ye̱ ce̱e̱ndu̱k ta̱dde̱n kar Manyi kalalek ol mu̱nye̱ne̱. Ma̱i̱je̱ zin i̱yo̱ko̱, iróng naga kozoz u̱nge̱tti̱ cik zoz necu i̱yo̱ko̱.

⁶ Ming idimante kaala balik a̱du̱wa̱ Manyi ke̱ do̱o̱k ki i̱yo̱ko̱, i̱i̱zo̱ zin ol wak wawaco Nginti A̱li̱le̱ Ce̱e̱ze̱ wa Ta̱mu̱ta̱dde̱no̱ een ti̱ti̱ ko̱, kar kalac Ta̱mu̱ta̱dde̱n cinne̱ng odohize.

⁷ I̱i̱zo̱ alaani ci a̱ddi̱ki̱re̱ wawaco do̱ Nginti A̱li̱le̱ Oroot lak co̱de̱ e̱rki̱ta̱, kar kanyaha bi̱ye̱ kaparanek Ta̱mu̱ta̱dde̱n kize gi̱i̱ ci aara mu̱nye̱n ciginnek ki cik ollu do̱o̱k, ogon nege ngati iróng a̱gga̱we̱.

⁸ Imma zin go̱o̱le̱ necu, i̱ye̱le̱kke̱t Vongizi ci A̱li̱le̱ zoz ci azi ne, ngen gool koowe kar ki̱tto̱zze̱ Nginti A̱li̱le̱ Oroot a̱bi̱le̱ ru̱u̱ma̱ ko̱, ming ngen Ce̱e̱z wa Ta̱mu̱ta̱dde̱no̱ aave lo̱o̱ta̱.

⁹ Een necu ri̱ri̱to̱n ci zoz ci kacin ngatu ko̱. Iróng muci ki kaal ne̱k apahek olli wawaco Ta̱mu̱ta̱dde̱n cik a̱vi̱la̱ ol mu̱nye̱n.

¹⁰ Eci gool ci unuk ogone nege kaal ko̱ een da̱i̱ne̱t, ki gool ci aburuce nege e̱le̱tti̱. Ogon nege kaal ne̱ko̱ zee ki̱ki̱ya̱ i̱i̱te̱ni̱ ci een jor ming okko Ye̱su̱ anyaha olom ci een jor, kar ku̱tu̱gu̱zzo̱ keer neci go̱o̱le̱ ci aave do̱.

Een Ki̱ri̱sto̱ wawac ci abunna

¹¹ I̱yo̱ko̱ zin ize Ye̱su̱ Ki̱ri̱sto̱ alaan ci a̱ddi̱ki̱re̱ wawaco kaale ne̱k een jor ko̱. I̱tto̱ zin enne Nginti A̱li̱le̱ Oroot Ce̱e̱ze̱ wa Ta̱mu̱ta̱dde̱no̱ ta̱mu̱-kenga, ci iróng e̱e̱ti̱ eenyet azzine, iróng aave lo̱o̱ta̱ ngatu.

¹² Iróng zin enne i̱i̱zo̱ Ngin wa A̱li̱le̱ Oroot ko̱ gi̱i̱ye̱ ci apahek eeza ki maala ngati aparanek Ta̱mu̱ta̱dde̱n bi̱ye̱. I̱tto̱ Ye̱su̱ ngin neci lak co̱de̱ ngati a̱da̱kne̱, uddutai bi̱ye̱ta̱ ciginnek keete wa een ta̱la̱ke̱c, kar kaara mu̱nye̱n cigga̱c udut.

¹³ Imma zo̱ze̱ bali reeni ke̱, apahek tuwayowa cik Ce̱e̱z wa Ta̱mu̱ta̱dde̱no̱ bi̱ye̱ cik eezau ki cik tiinu, kar kazacek ol cik mu̱nye̱nu̱ bbu̱u̱r ci ivade nege mo̱o̱le̱t, ki bi̱ye̱, kar kaara nogo mu̱nye̱n, ka̱vvu̱to̱ labak, kar e̱le̱tti̱ cigge̱k kubunnta eci re̱e̱nu̱no̱.

¹⁴ Izikto zin ju̱rru̱m, ming anyak da̱ bi̱ye̱ta̱ cik kaal cik kapahek naga Ta̱mu̱ta̱dde̱n ko̱ doiz, imma ngati Vongiz ci A̱li̱le̱ udut, anyak bi̱ye̱ta̱ cik Ye̱su̱ komiz kommog bi̱ye̱ cik kaalu, aanyik enne ele cinne Ta̱mu̱ta̱dde̱n ngati a̱da̱kne̱ ki̱zze̱c rok mu̱nye̱n ngatinne. A̱vi̱la̱ atin bi̱ye̱ta̱ cik Ki̱ri̱sto̱ kaale cik kabaccit lo̱o̱ta̱ ngatu, kar atin kala icima ka̱li̱ngli̱ng zoz cinne ki̱zze̱c rok mu̱nye̱n cik okkoyyet daiza.

¹⁵ Ye̱su̱ Ki̱ri̱sto̱ ci een zoc ci Ta̱mu̱ta̱dde̱no̱, anyaha olom ci een jor, kar ol cik awu Ta̱mu̱ta̱dde̱n kar elemtta olom ci een oo, aruba baiz ci aave udut kar kanyait kaal do̱o̱k, eci Ye̱su̱ a̱da̱i̱ kar kaara ol mu̱nye̱ne̱ balik ogon nege lo̱ti̱nno̱we̱ balik Musesi reentik ke̱.

¹⁶ Gon ming okko e̱e̱ti̱ a̱da̱i̱, i̱lo̱te̱k ol zoz cinne kar vu̱rrta̱ ka̱da̱k.

¹⁷ Ovvo ol a̱li̱ngli̱nge̱ ti̱lo̱wi̱ne̱t neci ngati a̱da̱he̱ e̱e̱ti̱. Ming ngen daizoiti ka̱da̱k, iróng ol a̱li̱ngli̱nge̱ ti̱lo̱wi̱ne̱t neci.

¹⁸ Ogon zin niko bu̱k, akane ol wak wawaco li̱ngli̱ngo̱n ci olom bali reeni ngati apahek nege Ta̱mu̱ta̱dde̱n bi̱ye̱ cik kaal ki bali ming u̱du̱wa̱ Manyi ke̱.

¹⁹ Baling ikebek Musesi ol ti̱lo̱wi̱ne̱t ci Ta̱mu̱ta̱dde̱no̱, kar zin kidima varany ki ru̱u̱ce̱ni̱t ci a̱zze̱to̱ u̱zu̱we̱k bi̱ye̱ cik tiinu ki eeza, ki maam kar zin kazacek buk ci Ta̱mu̱ta̱dde̱no̱ ki ol.

^20-21 Kar zin bo̱do̱k kazac Ce̱e̱z wa Ta̱mu̱ta̱dde̱no̱ een ti̱ti̱ ki kaal cik lawintak do̱o̱k. Kar zin enne kize ne, “I̱ye̱la̱ bi̱ye̱ta̱ ne̱ko̱ olom ci u̱du̱wa̱u̱ng Ta̱mu̱ta̱dde̱n.”

²² De̱de̱, azzac ol kaal do̱o̱k bi̱ye̱te̱ ki bali ming a̱du̱wa̱ lo̱ti̱nno̱wa̱ cik Musesi ke̱; eci ming i̱llo̱i̱ bi̱ye̱ cik apahek ol Ta̱mu̱ta̱dde̱n, iróng Manyi alalek ol mu̱nye̱n.

Daiz ci Ye̱su̱ ci aara ol mu̱nye̱n

²³ Imma zin Ce̱e̱z wa Ta̱mu̱ta̱dde̱no̱ aave lo̱o̱ta̱ ko̱ i̱ya̱kzo̱ni̱k Ce̱e̱z ci aave ta̱mu̱-kenga, abunna zin oroot ming apahek ol kaal cik kazace ngin neci bi̱ye̱te̱ cik e̱le̱gje̱nnu̱ kar ki̱ti̱vi̱la̱ mu̱nye̱n cik ollu. Imma Ce̱e̱z wa Ta̱mu̱ta̱dde̱no̱ wa een de̱de̱, aave ta̱mu̱-kenga ko̱, anyak gi̱i̱ ci kapahek kazace ol, ommog bi̱ye̱ cik e̱le̱gje̱nnu̱.

²⁴ Ngen Ki̱ri̱sto̱ ki̱tto̱ nginti A̱li̱le̱ Oroot adiman e̱e̱ti̱ ci diiri, i̱ya̱kzo̱ni̱k ngin neci nginti aave ta̱mu̱-kenga, i̱tto̱ zin enne ta̱mu̱-keng okko ngati Ta̱mu̱ta̱dde̱no̱ zo̱ze̱ cinna.

²⁵ Iróng enne i̱i̱zo̱ ta̱mu̱-keng kar kaanyik ele cinne kize wawac odohize, kiwagon alaani ci a̱ddi̱ki̱re̱ wawaco i̱i̱zo̱ Nginti A̱li̱le̱ Oroot Ce̱e̱ze̱ wa Ta̱mu̱ta̱dde̱no̱ ko̱. Kar kapahek Manyi wawac, kar kazac bi̱ye̱te̱ e̱rki̱nya̱ veelek.

²⁶ Ming riil zoz ci apahek tuwayowa Ta̱mu̱ta̱dde̱n kaal odohize, aanyik weda Ye̱su̱ Ki̱ri̱sto̱ ele cinne Ta̱mu̱ta̱dde̱n kize wawac odohize odohize kanante ci lo̱o̱tu̱. Abarik aanyik enne ele cinne kize wawac lak co̱de̱, kar kaara mu̱nye̱n bu̱u̱llo̱k ki bu̱u̱llo̱k.

²⁷ Izikto da̱ ju̱rru̱m, ogon zin zoz necu ki ming a̱da̱i̱ e̱e̱ti̱ ci diiri arrak, kar vu̱rrta̱ Ta̱mu̱ta̱dde̱n ketted lo̱ki̱ko̱ kaale wak gerzek u̱tu̱gu̱ enne.

²⁸ Imma zin i̱yo̱ko̱, a̱da̱i̱ Ye̱su̱ Ki̱ri̱sto̱ lak co̱de̱ kize wawac ci aara ol cik meelek mu̱nye̱n. Obodak atin enne lo̱o̱c kar ki̱ki̱ya̱ kanyahak ti̱ri̱ze̱ne̱t ol wak ere nonno.