I̱bu̱ru̱ 8 - Tennet

Anyaha alaani ci a̱ddi̱ki̱re̱ wawaco olom ci een jor

¹ Ungec ci kaal cik riili ka̱du̱wa̱nna̱ ko̱ iciko: Kanyak naga do̱o̱k alaan ci a̱ddi̱ki̱re̱ wawaco Ce̱e̱ze̱ wa Ta̱mu̱ta̱dde̱no̱ ta̱mu̱-kenga, a̱vvu̱ lo̱o̱ta̱ a̱tte̱ ci Ta̱mu̱ta̱dde̱n a̱zzo̱ ta̱mu̱-kenga,

² a̱li̱ngli̱ng enne Ce̱e̱ze̱ wa Ta̱mu̱ta̱dde̱no̱ de̱de̱, eenyca Manyi Ta̱mu̱ta̱dde̱n iróng een e̱e̱t ci diiri.

³ Ka̱gga̱ naga niko atahala Ta̱mu̱ta̱dde̱n alaan ci a̱ddi̱ki̱re̱ wawaco kar kaanyik Ta̱mu̱ta̱dde̱n muci kar bo̱do̱k kapahek nonno wawa. Abunna zin bo̱do̱k alaani ci a̱ddi̱ki̱re̱ wawaco Ye̱su̱ ming apahek Ta̱mu̱ta̱dde̱n wawac.

⁴ Baling ngen weda Ye̱su̱ aave lo̱o̱ta̱ ngatu, iróng weda een e̱e̱t ci wawaco ci apahek Ta̱mu̱ta̱dde̱n wawac, eci enne iróng een boor co Le̱vi̱ wak anyak ol wak wawaco wak apahek Manyi ki baling a̱du̱wa̱ lo̱ti̱nno̱wa̱ cik Musesi ke̱.

⁵ Imma zin kaala cik ogon olli wawaco Ce̱e̱ze̱ wa Ta̱mu̱ta̱dde̱no̱ lo̱o̱ta̱ ngatu ko̱, kaal wak i̱ya̱kza̱ Ce̱e̱z wa Ta̱mu̱ta̱dde̱no̱ ta̱mu̱-kenga. Zoz zin ci bali a̱du̱wa̱k Ta̱mu̱ta̱dde̱n Muses baling eenyet enne Ce̱e̱z wa Ta̱mu̱ta̱dde̱no̱ een ti̱ti̱ ko̱ balala, izek nonno ne, “Ziyo ju̱rru̱m, tu̱gu̱ kaal ne̱ko̱ do̱o̱k go̱o̱le̱ bali ka̱du̱wa̱ki̱ baling kurumto biye wa een zara Sinai ke̱.”

⁶ Imma i̱yo̱ko̱, aanyik Ta̱mu̱ta̱dde̱n Ye̱su̱ di̱ngdi̱ngo̱n ki li̱ngli̱ngo̱n ci ommog veelek, ommog li̱ngli̱ngo̱n ci ol wak wawaco balik lo̱o̱tu̱ ke̱, een necu olom ci elema Manyi ko̱ ci ommog veelek, anyaha gano ngati Ta̱mu̱ta̱dde̱no̱ kar kanyik e̱e̱t ci diiri, een Ye̱su̱ zoc ci ommog bali reeni ke̱.

⁷ Ming ubunna olomi bali reeni u̱du̱ya̱i̱ ke̱, iróng weda korong olom imma bo̱do̱k.

⁸ Ma̱i̱je̱ ngatu, umuda Ta̱mu̱ta̱dde̱n ba̱ci̱ ci ol cik diirik kar kize ne, “A̱kku̱ atin i̱i̱te̱ni̱ ming a̱du̱wa̱ Manyi, ci kokko atin anna ka̱du̱wa̱k olli Israilo ki Ju̱da̱ do̱o̱k olom ci een jor.

⁹ Iróng atin ogon ki olomi bali kadimani anna ki ji̱ji̱ti̱gge̱k baling ka̱gga̱ma̱ nogo azzine kaara lo̱o̱ce̱ ci Masiro, eci iróng nege azunne olom cinanni, kar anna kutuhuwek nogo bo̱i̱c, u̱du̱wa̱ Manyi.

¹⁰ Een necu olom ci een jor kogonni atin anna kadimani atin ki ce̱e̱z ci Israilo, i̱i̱te̱n neci, u̱du̱wa̱ Manyi, karike atin anna ti̱lo̱wi̱ne̱t cinanni o̱o̱tti̱ cigge̱k, kar keteherik zi̱nze̱tti̱nne̱ cigge̱k. Ke̱e̱ni̱ atin anna Ta̱mu̱ta̱dde̱n cinne̱ng, ovvo nege e̱e̱ggi̱n ol cigannik.

¹¹ I̱llo̱i̱ e̱e̱t imma ci atin edemez ol cik locaryak, icima e̱e̱ti̱ imma gotoni, azi ne, ‘Abunna ming a̱gga̱yyu̱ Manyi.’ Eci atin ol do̱o̱k a̱gga̱ya̱ annita, akane do̱le̱ce̱ ci dici kuk ngati ol wak a̱ddi̱ki̱re̱.

¹² Kalalnek atin anna nogo kaale balik gerzek ogon ke̱, iróng bo̱do̱k anna ka̱a̱da̱ ba̱ci̱nno̱k ne̱ke̱ udut.”

¹³ Imma zin go̱o̱le̱ ci a̱du̱wa̱ne̱ enne olom necu, aanyik enne olom necu kize jor. Utung enne olom wa bali reeni iróng ngen bo̱do̱k a̱li̱ngli̱nge̱ eci kaala wak unuweto iróng ol ngen a̱li̱ngli̱nge̱.