I̱bu̱ru̱ 7 - Tennet

Ommog alaani Melchizedeki Aburaham

¹ Een Melchizedeki alaan ci orog ci een Salem, een bo̱do̱k enne e̱e̱t ci wawaco ci apahek Ta̱mu̱ta̱dde̱n kaal. U̱ru̱mto̱ enne ki Aburaham baling oboda illawa, ommog enne alaat, kar zin ku̱mu̱yu̱k nonno.

² Aanyik zin Aburahami Melchizedek taban ci alaatu gi̱i̱ co̱de̱ kaale cik e̱e̱ggi̱n omoto kaale ci anyak enne do̱o̱k. Een zara cik een Melchizedek “Alaan ci voori zinin per annu zoz ci Ta̱mu̱ta̱dde̱no̱.” Anyak bo̱do̱k zar u̱gge̱ cik een “Alaan ci Salemi.” Azi ungec cinne ne, “Alaan ci anyak gano.”

³ Iróng e̱e̱ti̱ imma a̱gga̱ ming anyak enne yaatinne icima baatinne, i̱llo̱i̱ rok ji̱ji̱ti̱gi̱nne̱k, iróng ol a̱gga̱ i̱i̱te̱n ci a̱rri̱ta̱ne̱ enne, icima ci okko enne a̱da̱kne̱. Ogon enne ki Ngerrti Ta̱mu̱ta̱dde̱no̱, eci erahek atin enne een e̱e̱t ci wawaco ci aave udut.

⁴ A̱ddi̱ki̱re̱ Melchizedeki kommog veelek. I̱no̱ni̱t zoz cu: Aanyik Aburahami nonno taban cinne gi̱i̱ co̱de̱ kaale cik e̱e̱ggi̱n omoto a̱zi̱ze̱ akana enne illawa.

⁵ Ka̱gga̱ a̱du̱wa̱ lo̱ti̱nno̱wa̱ cik Musesi zoz ci azi ne a̱vvu̱ ol wak wawaco boore co e̱e̱t ci een zara Le̱vi̱, kar ol kaanycik taban cinne̱ng gi̱i̱ co̱de̱ kaale cik e̱e̱ggi̱n omoto ki ming e̱he̱rye̱ lo̱ti̱nno̱we̱, ming een ol ne̱ke̱ gotonoggi nu̱nu̱n, een Aburahami ji̱ji̱ti̱nne̱ng do̱o̱k.

⁶ Imma e̱e̱ti̱ ci een Melchizedek ko̱, iróng a̱kku̱ boore co Le̱vi̱, abarik Aburahami aanyik nonno taban cinne gi̱i̱ co̱de̱ kaale cik e̱e̱ggi̱n omoto akana enne illawa, kar zin enne ka̱mu̱yu̱k Aburaham, nonno ba̱li̱ye̱ ci aanyik Ta̱mu̱ta̱dde̱n zoz ci u̱du̱wa̱ enne ke̱.

⁷ Ka̱gga̱ zin naga do̱o̱k a̱mu̱yu̱k e̱e̱ti̱ ci a̱ddi̱ki̱re̱ e̱e̱t cidici.

⁸ Kar gon ba̱li̱ye̱, aluta gon ol wak wawaco balik a̱da̱i̱to̱ ke̱ taban cinne̱ng gi̱i̱ co̱de̱ kaale cik e̱e̱ggi̱n omoto kaale do̱o̱k; ma̱i̱je̱ bali go̱o̱le̱ emani, aluta e̱e̱ti̱ ci u̱du̱ya̱i̱ aruge udut ko̱.

⁹ Azi wo̱ye̱ e̱e̱ti̱ imma ne, aluta boor co Le̱vi̱ da̱ taban neci gi̱i̱ co̱de̱ kaale cik e̱e̱ggi̱n omoto ngati ollu kar kanyik Melchizedek zare cik Aburahami,

¹⁰ eci baling u̱ru̱mto̱ Melchizedei ki Aburaham, ngen Le̱vi̱ ki̱ti̱rra̱i̱.

Ogon Ye̱su̱ ki Melchizedek

¹¹ Ming wo̱ye̱ anyahak boor co Le̱vi̱ ol cik diirik gi̱i̱ ci a̱vi̱la̱ ol mu̱nye̱n go̱o̱le̱ ci e̱e̱ggi̱nne̱ nege ol wak wawaco, eci Ta̱mu̱ta̱dde̱n aanyik ol lo̱ti̱nno̱k go̱o̱le̱ ci ol wak wawaco cik bu̱u̱l neci. Ming anyaha nege gi̱i̱ ci aara ol mu̱nye̱n, inya zin ming i̱tto̱na̱ Ta̱mu̱ta̱dde̱n e̱e̱t imma ci wawaco ci ogon ki Melchizedek, iróng enne ogon ki e̱e̱ti̱ ci wawaco wa een Aaron?

¹² Ming a̱kku̱ e̱e̱ti̱ ci wawaco boore ci aave do̱, aragizek atin Ta̱mu̱ta̱dde̱n lo̱ti̱nno̱k cik Musesi ki lo̱ti̱nno̱k u̱gge̱.

¹³ A̱kku̱ e̱e̱ti̱ ci keheri zoz cinne ko̱ biilete ci aave do̱, ngen e̱e̱ti̱ imma biilete neci ki̱li̱ngli̱ng kize e̱e̱t ci wawaco i̱te̱le̱ ci reene ci Ce̱e̱z wa Ta̱mu̱ta̱dde̱no̱.

¹⁴ Ka̱gga̱ naga ju̱rru̱m a̱kku̱ Manyi Ye̱su̱ boore co e̱e̱t ci een zara Ju̱da̱, ngen zin Musesi kidima ol wak wawaco imma boore neci.

¹⁵ Ming zin ogon niko, uhu atin Ta̱mu̱ta̱dde̱n lo̱ti̱nno̱k cik Musesi, ming okko enne i̱tto̱na̱ e̱e̱t imma wa wawaco ci ogon ki Melchizedeki.

¹⁶ Een e̱e̱ti̱ ci wawaco ko̱, ci a̱li̱ngli̱ng Ce̱e̱ze̱ wa Ta̱mu̱ta̱dde̱no̱, ahala Manyi zo̱ze̱ ci een jor, iróng een zo̱ze̱ ci boor cinne, abarik eci bo̱do̱k anyak enne doiz ci abahe udut, i̱llo̱i̱ gi̱i̱ imma ci a̱ru̱k nonno.

¹⁷ Azi bui ci Ta̱mu̱ta̱dde̱no̱ zo̱ze̱ ci Ye̱su̱ ne, “E̱e̱ni̱ i̱nna̱ e̱e̱t ci wawaco ci aave udut, ki bali e̱e̱ti̱ ci wawaco wa een Melchizedek ke̱.”

¹⁸ Utungek zin Ta̱mu̱ta̱dde̱n lo̱ti̱nno̱k balik Musesi ke̱ lo̱o̱c eci iróng nege anyak doiz.

¹⁹ Iróng zin lo̱ti̱nno̱wa̱ ngen a̱ti̱ri̱z e̱e̱t ci diiri, abarik zin i̱yo̱ko̱, i̱ki̱ya̱ zin zoz ci abunna karike naga zi̱nze̱tti̱, anyahannet zoz neci kar kojongozzit Ta̱mu̱ta̱dde̱n.

²⁰ Imma zin niko, atahala Ta̱mu̱ta̱dde̱n Ye̱su̱ kize e̱e̱t ci wawaco ngati azi ne i̱tto̱ni̱k ele cinanni. Imma ol wak wawaco do̱o̱k i̱i̱zo̱ kizeto ol wak wawaco gaganiko, iróng e̱e̱ti̱ imma i̱tto̱ni̱k ele cinne,

²¹ abarik baling okko Ye̱su̱ een e̱e̱t ci wawaco, u̱du̱wa̱ zin Ta̱mu̱ta̱dde̱n zoz ci azi ne, “U̱du̱wa̱k Manyi Ta̱mu̱ta̱dde̱n iróng atin enne uhu zinin cinne: ‘E̱e̱ni̱ i̱nna̱ e̱e̱t ci wawaco ci aave udut.’”

²² Eci Ta̱mu̱ta̱dde̱n atahala Ye̱su̱ zo̱ze̱ ci u̱du̱wa̱ enne, i̱ye̱la̱ necu olom ci ommog veelek elema Ta̱mu̱ta̱dde̱n ki Ye̱su̱ wowonet ci owowone ki e̱e̱t ci diiri.

²³ Imma o̱to̱ne̱ emani, anyak ol wak wawaco Ce̱e̱ze̱ wa Ta̱mu̱ta̱dde̱no̱ meelek giir, eci daizi ibiliz nogo ngati e̱e̱ggi̱nne̱ ol wak wawaco u̱u̱mu̱c;

²⁴ ma̱i̱je̱ Ye̱su̱ aruge udut, odokna enne een e̱e̱t ci wawaco Ce̱e̱ze̱ wa Ta̱mu̱ta̱dde̱no̱ udut.

²⁵ Imma go̱o̱le̱ neci, anyak enne doiz ci a̱ti̱ri̱ze̱ ol wak elemi Ta̱mu̱ta̱dde̱n ngatinne, eci enne aruge udut, alawek nogo Ta̱mu̱ta̱dde̱n odohize.

²⁶ Een Ye̱su̱ alaan ci a̱ddi̱ki̱re̱ wawaco Ce̱e̱ze̱ wa Ta̱mu̱ta̱dde̱no̱ ci korong naga. A̱li̱le̱ enne iróng anyak ba̱ci̱ kar kize voor zinin, aave enne do̱ ngati e̱e̱t ci diiri mu̱nye̱nu̱. Irez Ta̱mu̱ta̱dde̱n nonno kize alaan ci a̱ddi̱ki̱re̱ wawaco ci ommog kaal do̱o̱k, aave ta̱mu̱-kenga.

²⁷ Ommog enne alaat wak a̱ddi̱ki̱re̱ wawaco Ce̱e̱ze̱ wa Ta̱mu̱ta̱dde̱no̱ do̱o̱k. Iróng enne apahek Ta̱mu̱ta̱dde̱n wawa kiwagon alaata cik a̱ddi̱ki̱re̱ wawaco odohize, apahek arrak mu̱nye̱n cigge̱k kar vu̱rrta̱ kapaktek mu̱nye̱n cik ollu. I̱ti̱ri̱z zin Ye̱su̱ ol do̱o̱k mu̱nye̱ne̱ lak co̱de̱ ngati a̱da̱kne̱ keete ci een ta̱la̱ke̱c.

²⁸ Atahala zin lo̱ti̱nno̱wa̱ cik Musesi alaat cik a̱ddi̱ki̱re̱ wawaco iróng okkomi, imma Ta̱mu̱ta̱dde̱n atahala alaan ci a̱ddi̱ki̱re̱ wawaco ci okkomi zo̱ze̱ bali odola u̱du̱wa̱ enne ke̱ baling aanyik enne ol lo̱ti̱nno̱k cik Musesi arrak oowa, atahala zin Ngerinne kize alaan ci a̱ddi̱ki̱re̱, kar kidiman zoz cinne ju̱rru̱m udut.