Biblia Todo Logo
Bìoball air-loidhne

- Sanasan -

I̱bu̱ru̱ 4 - Tennet


U̱du̱ya̱i̱ zoz ci okko e̱e̱ti̱ ci diiri abahe yahe

1 Ngen Ta̱mu̱ta̱dde̱n odolna zo̱ze̱ ci okko atin e̱e̱ti̱ ci diiri i̱i̱zo̱ lo̱o̱c ci i̱ye̱be̱ze̱ Ta̱mu̱ta̱dde̱n, abunna kazunne zoz neci kar iróng e̱e̱ti̱ imma odotonik vu̱rru̱t.

2 Kizikta naga e̱le̱tti̱ne̱ kaviyak cik abunna balik uwahekket ol ke̱, ki baling aziye olli Ya̱u̱do̱ balik aavtte balala ke̱. Baling iziyyet nege kaviyak ne̱ke̱ nu̱nu̱n, iróng zoz neci eela nogo, eci iróng nege a̱tu̱ Ta̱mu̱ta̱dde̱n.

3 Imma zin naga do̱o̱k cik kelemtta kaviyak cik abunna ko̱, kovvo ki̱zzo̱ lo̱o̱ce̱ cinne ki̱ye̱be̱z yahe. Azi zin bo̱do̱k Ta̱mu̱ta̱dde̱n ne, “Ku̱tu̱gu̱ anna olom ngati kaburne nong, ‘Iróng atin nege i̱i̱zo̱ lo̱o̱c cinanni ki̱ye̱be̱ze̱ kabahe yahe.’” Ma wo̱ye̱ nu̱nu̱n edeca Ta̱mu̱ta̱dde̱n li̱ngli̱ngo̱n wainne bali kananta eenycane ta̱mu̱-keng ki lo̱o̱c.

4 E̱he̱rye̱ buwe ci Ta̱mu̱ta̱dde̱no̱ ozoz enne zoz ci obod ki i̱i̱te̱n bali edeccane enne li̱ngli̱ngo̱n wa bali eenycane lo̱o̱c kar ki̱ye̱be̱z. Kar kize ne, “Omon zin Ta̱mu̱ta̱dde̱n teheenyinta i̱i̱te̱ne̱ wa een turgerem.”

5 Kar bo̱do̱k zo̱ze̱ ci a̱du̱wa̱ enne oowa ko̱ kar kize ne, “Iróng atin nege i̱i̱zo̱ lo̱o̱c cinanni ki̱ye̱be̱ze̱ kabahe yahe.”

6 Ngen zin atin ol uggak i̱i̱zo̱ lo̱o̱c cinne i̱ye̱be̱ze̱ ko̱, imma ol balik iziyyet kaviyak cik abunna, iróng atin nege i̱i̱zo̱ lo̱o̱c cinne i̱ye̱be̱ze̱ eci nege utuburet zoz ci Ta̱mu̱ta̱dde̱no̱.

7 I̱yo̱ko̱ zin, arik Ta̱mu̱ta̱dde̱n i̱i̱te̱n imma, ci awu enne kize Wazin necu, kar bali i̱i̱te̱n imma ozozek enne ol go̱o̱le̱ ci Da̱vi̱de̱, ki bali u̱du̱wa̱ enne oowa ke̱, “Wazin necu, ming aziknnu niga muluk ci Ta̱mu̱ta̱dde̱no̱, ma aburnnu zoz cinne.”

8 Iróng een nginti ovvo ol abak yahe, een lo̱o̱c ci een zara Kanaan, ngin bali okkoye Joshua olli Ya̱u̱do̱ ke̱. Iróng weda Ta̱mu̱ta̱dde̱n ozoz go̱o̱le̱ ci Da̱vi̱de̱ zo̱ze̱ ci wazin imma.

9 Anyaha zin Ta̱mu̱ta̱dde̱n i̱i̱te̱n wa a̱yu̱bze̱ ol ciginnek ko̱.

10 Ming amuda ol mediz ci i̱i̱te̱n ci yu̱bze̱nto̱ eci nege amuda yu̱bze̱ne̱t gi̱i̱ye̱ ci ogon nege, ki i̱yo̱ko̱ bali edeca Ta̱mu̱ta̱dde̱n li̱ngli̱ngo̱n ci eenycane ta̱mu̱-keng ki lo̱o̱c ke̱ kar ki̱ye̱be̱z.

11 I̱yo̱ko̱ zin, ku̱tu̱gu̱z naga do̱o̱k kaal cik eelannet kar ku̱mu̱dda̱ baiz ci kabahe yahe, ma anyikku e̱e̱t imma kutubur zoz ci Ta̱mu̱ta̱dde̱no̱, eci abure enne zoz ci Ta̱mu̱ta̱dde̱no̱ ki bali olli Ya̱u̱do̱ balik aavtte balala ming abure ke̱.

12 Eci zoz ci Ta̱mu̱ta̱dde̱no̱ een ci abak udut kar bo̱do̱k ki̱li̱ngli̱ng udut. Leheda kommog illa wa lehedi abanyo do̱o̱k, i̱i̱zo̱ kenger zinin ki vongiz ci e̱e̱to̱ ecito. Etted zoz ci Ta̱mu̱ta̱dde̱no̱ zoz ki vongiz ci aave zinina ki zoz ci i̱no̱n e̱e̱ti̱.

13 I̱llo̱i̱ gi̱i̱ imma ci aave lo̱o̱ta̱ ngatu ci iróng Ta̱mu̱ta̱dde̱n acinni. Acin enne kaal do̱o̱k, abunna ka̱du̱wa̱k nonno zoz ci een de̱de̱.


Een Ye̱su̱ alaan ci a̱ddi̱ki̱re̱ wawaco

14 I̱yo̱ko̱ zin, kanyak naga alaan ci a̱ddi̱ki̱re̱ wawaco, een enne Ye̱su̱, Ngerrti Ta̱mu̱ta̱dde̱no̱ bali okko ta̱mu̱-kenga ke̱. Abunna zin ming kazunne tu̱we̱ne̱t cinna wa bali obod ki nonno.

15 Kanyak alaan ci a̱ddi̱ki̱re̱ wawaco ci a̱gga̱ ming ke̱e̱ggi̱n naga olli mu̱nye̱nu̱, itiman zin lo̱rye̱nti̱ nonno go̱o̱lo̱we̱ do̱o̱k ki i̱yo̱ko̱ naga do̱o̱k ko̱, anyak gi̱i̱ co̱de̱, ngen enne kabac zoz imma udut.

16 Koot zin naga do̱o̱k rok Manyi Ta̱mu̱ta̱dde̱n ngati iróng ko̱ngo̱o̱li̱ne̱ gi̱i̱ imma kar kaanyyet deten, kar kurubta bunnat kar keelawet agit do̱o̱k i̱i̱te̱ne̱ ci koronge naga kaal.

© 2018, Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan