I̱bu̱ru̱ 3 - Tennet

Ommog Ye̱su̱ Muses

¹ Gotonogga ki ngonogga wak tu̱we̱nta̱k balik awuyyung Ta̱mu̱ta̱dde̱n wa a̱li̱le̱ ta̱mu̱-kenga, i̱no̱ni̱t zoz ci Ye̱su̱ ko̱, wa een to̱ni̱a̱t ci Ta̱mu̱ta̱dde̱no̱ kar bo̱do̱k kize alaan ci a̱ddi̱ki̱re̱ wawaco wa ka̱tu̱ naga zoz cinne.

² Ogon ba̱li̱ye̱ Ye̱su̱ odohize li̱ngli̱ngo̱n ci Ta̱mu̱ta̱dde̱no̱ ki bali Musesi een e̱e̱t ci a̱li̱ngli̱nge̱k ol cik Ta̱mu̱ta̱dde̱no̱ odohize.

³ Anyike Ta̱mu̱ta̱dde̱n Ye̱su̱ kommog Muses, ogon ki i̱yo̱ko̱, ming ommog e̱e̱ti̱ ci eenyet ce̱e̱z, ce̱e̱z ele, kar kirezit ol nonno kommog ce̱e̱z neci.

⁴ Eenyet e̱e̱ti̱ ci diiri ce̱e̱z, abarik Ta̱mu̱ta̱dde̱n ci eenyet kaal do̱o̱k.

⁵ A̱li̱ngli̱nge̱k Musesi ol cik Ta̱mu̱ta̱dde̱no̱ wak een Ce̱e̱z ci Ta̱mu̱ta̱dde̱no̱, a̱du̱wa̱ zoz ci atin okko ogone.

⁶ Ma̱i̱je̱ Ye̱su̱ Ki̱ri̱sto̱ Ngerrti Ta̱mu̱ta̱dde̱no̱ odohize a̱li̱ngli̱nge̱k ol cik Ta̱mu̱ta̱dde̱no̱. Ke̱e̱ggi̱n naga Ce̱e̱z wa Ta̱mu̱ta̱dde̱no̱, ming karike naga zi̱nze̱tti̱ zoz Ta̱mu̱ta̱dde̱no̱ kere naga ko̱.

U̱zu̱tte̱ zoz ci Ta̱mu̱ta̱dde̱no̱

⁷ I̱yo̱ko̱ zin, ki ming a̱du̱wa̱ Vongizi ci A̱li̱le̱ ko̱: “Wazin necu, ming aziknnu niga muluk ci Ta̱mu̱ta̱dde̱no̱,

⁸ ma aburnnu zoz cinne, ki baling i̱ti̱yye̱t ji̱ji̱ti̱ggo̱k tu̱, baling atimana nege annita balala,

⁹ ngati atimana ji̱ji̱ti̱ggo̱k annit kar kutuburret zoz cinanni kar e̱rki̱nya̱ moten we̱c balala, icinnet zin nege kaal cik a̱vu̱la̱ ku̱tu̱gu̱ anna ke̱.

¹⁰ Zoz zin ci kaburnek anna nong bu̱u̱l neci ko̱ nenen necu, kar anna kize ne, ‘Ovvo odohize zi̱nze̱tti̱ cigge̱k tu̱a̱, iróng nege a̱gga̱ go̱o̱llo̱k cigannik.’

¹¹ Kar zin anna ku̱tu̱gu̱ olom ngati kaburne nong, ‘Iróng atin nege i̱i̱zo̱ lo̱o̱c cinanni ki̱ye̱be̱ze̱ kabahe yahe.’”

¹² Artta iin, gotonogga ki ngonogga, ma i̱zzo̱yu̱ mu̱nye̱n cik iróng a̱a̱nyu̱ng u̱tu̱we̱t Ta̱mu̱ta̱dde̱n bak a̱ti̱kku̱ tu̱.

¹³ Abarik ki̱ti̱lo̱z gotonogget ki ngonogget odohize, ki i̱yo̱ko̱ ming a̱du̱wa̱kke̱t zoz ci Ta̱mu̱ta̱dde̱no̱ wazin necu ko̱. Ma anyikku mu̱nye̱n kecebtaung o̱o̱tti̱ kar utuburet zoz ci Ta̱mu̱ta̱dde̱no̱.

¹⁴ Kozol naga li̱ngli̱ngo̱n ci Ki̱ri̱sto̱ nga̱to̱de̱. Abunna ka̱tu̱ naga nonno de̱de̱ udut ki baling ka̱tu̱ arrak oowa ke̱.

¹⁵ Zoz zin ci e̱he̱rye̱ Warage ci Ta̱mu̱ta̱dde̱no̱ icu: “Wazin necu, ming aziknnu niga muluk ci Ta̱mu̱ta̱dde̱no̱, ma aburnnu zoz cinne, ki baling i̱ti̱yye̱t ji̱ji̱ti̱ggo̱k tu̱.”

¹⁶ A̱gga̱yyu̱ niga utuburet ji̱ji̱ti̱ggo̱k nong zo̱ze̱ ci Ta̱mu̱ta̱dde̱no̱ ba̱li̱ye̱. Muses ba̱li̱ye̱ ci een alaan ci anyaha nogo Masira.

¹⁷ Omoze ba̱li̱ye̱ Ta̱mu̱ta̱dde̱n ngatinne̱ng e̱rki̱nya̱ moten we̱c, eci nege u̱tu̱gu̱zzo̱ mu̱nye̱n ngati iróng a̱tu̱ nonno, kar zin ka̱da̱i̱to̱ balala.

¹⁸ E̱e̱ggi̱n zin ne̱ke̱ ol balik azi Ta̱mu̱ta̱dde̱n ne, iróng atin nege arum lo̱o̱c cinne ci ovvo nege i̱ye̱be̱ze̱. E̱e̱ggi̱n nege ol balik iróng aziye zoz ci Ta̱mu̱ta̱dde̱no̱.

¹⁹ I̱yo̱ko̱ zin, iróng nege i̱i̱zo̱ lo̱o̱c cinne i̱ye̱be̱ze̱ enne, eci iróng nege a̱tu̱ Ta̱mu̱ta̱dde̱n.