I̱bu̱ru̱ 2 - Tennet

Iziyyet Zoz ci Ta̱mu̱ta̱dde̱no̱

¹ Eci kiziyet naga zoz ba̱li̱ye̱, abunna ming kazunne, gerza ming ka̱ti̱k tu̱.

² Een kaviyaha balik anyaha anjilonya ke̱ de̱de̱, imma ol wak a̱du̱l zoz neci, icima abure lo̱ti̱nno̱k ne̱ke̱ ettedik Ta̱mu̱ta̱dde̱n nogo lo̱ki̱ko̱ cinne̱ng.

³ Ming kutuburret naga gool ci abunna kamudane ti̱ri̱ze̱ne̱t ko̱, kalit lo̱ki̱ko̱ ci Ta̱mu̱ta̱dde̱no̱ wo̱ye̱ ku̱? U̱du̱wa̱ Ye̱su̱ Manyi zoz necu arrak oowa, imma ol balik iziyyet ke̱ a̱gga̱c ming een zoz ci een de̱de̱, nogo cik a̱du̱wa̱kke̱ta̱.

⁴ I̱ye̱le̱kke̱t Ta̱mu̱ta̱dde̱n ti̱ri̱ze̱ne̱t cu, bali u̱du̱wa̱ Ye̱su̱ ke̱ go̱o̱le̱ ci ogone kaal cik a̱vu̱la̱ kar enne ki̱ye̱la̱ ti̱ri̱ze̱ne̱t cu kaale cik abunna aanyik Vongizi ci A̱li̱le̱ nogo.

I̱ti̱rra̱i̱ Ye̱su̱ kize e̱e̱t ci diiri

⁵ Ngen Ta̱mu̱ta̱dde̱n ku̱du̱wa̱k i̱i̱te̱n imma anjilonya ciginnek zoz ci ovvo atin nege abale lo̱o̱c ci een jor, ci kozoz naga zoz cinne ko̱.

⁶ Abarik e̱he̱rye̱ ngamani Warage ci Ta̱mu̱ta̱dde̱no̱, a̱jji̱n e̱e̱ti̱ imma Ta̱mu̱ta̱dde̱n a̱nne̱k ne, “Nya ming i̱no̱ni̱ i̱nna̱ zoz ci e̱e̱to̱ ko̱, ngerrti e̱e̱t ci diiri ci azunne i̱nna̱ nonno ko̱?

⁷ Anyik i̱nna̱ nonno kize vu̱rru̱t ci anjilonyau; i̱di̱ngdi̱nga̱nnu̱ zin i̱nna̱ nonno kize alaan.

⁸ Kar anyik nonno kabal kaal do̱o̱k.” Kar go̱o̱le̱ ci abale enne kaal do̱o̱k ko̱, iróng Ta̱mu̱ta̱dde̱n ungnek gi̱i̱ imma ci iróng enne abali. I̱yo̱ko̱, iróng naga kacin ming abal e̱e̱ti̱ kaal do̱o̱k.

⁹ Abarik zin kicinnta Ye̱su̱ bali a̱rri̱ta̱i̱ kar kize vu̱rru̱t anjilonyai cik Ta̱mu̱ta̱dde̱no̱ arrak do̱yo̱i̱t. I̱yo̱ko̱, i̱di̱ngdi̱nga̱n Ta̱mu̱ta̱dde̱n nonno kize alaan, eci atar enne daiz, kar zin zo̱ze̱ ci deten ci Ta̱mu̱ta̱dde̱no̱ atar enne daiz zo̱ze̱ cinna do̱o̱k.

¹⁰ E̱e̱ggi̱n kaala do̱o̱k cik Ta̱mu̱ta̱dde̱no̱, nonno ci adiman kaal ne̱ko̱ doize cinne. Idiman Ta̱mu̱ta̱dde̱n gi̱i̱ ci abunna ngati aanyik Ye̱su̱ kubunna ngati apirnane keete ci een ta̱la̱ke̱c, baling i̱ti̱ri̱z enne dooli cik Ta̱mu̱ta̱dde̱no̱ cik kelemtta nonno kar kozolit di̱ngdi̱nga̱ni̱ne̱t ci Ta̱mu̱ta̱dde̱no̱.

¹¹ Ye̱su̱ ci anyike ol kizeto dooli cik a̱li̱le̱ Ta̱mu̱ta̱dde̱no̱, o̱de̱ be̱e̱ti̱ ol ne̱k aanyik Ye̱su̱ kizeto dooli cik Ta̱mu̱ta̱dde̱no̱ ko̱. Iróng a̱li̱ya̱ni̱ adak Ye̱su̱ ngati awu nogo kizeto gotonoggi ki ngonoggi.

¹² Eci enne a̱nne̱k Ta̱mu̱ta̱dde̱n ne, “Kokko atin kuwahek zoz cunne gotonogga; Imma ngati aavtte ol cik ke̱le̱ci̱a̱k do̱o̱k, kinnati atin anna i̱nne̱ta̱ lo̱nga̱.”

¹³ Kar bo̱do̱k, “Karike anna nonno zinin oroot.” Kar bo̱do̱k kize enne dee ne, “Annita icu, ki dooli cik aanya Ta̱mu̱ta̱dde̱n.”

¹⁴ Ke̱e̱ggi̱n naga ol cik diirik, een Ye̱su̱ bu̱k e̱e̱t ci diiri. Gool zin ci a̱kku̱na̱ke̱t Ye̱su̱ agit ko̱ necu, kar ki̱ki̱ya̱ ka̱da̱k kommog lo̱rye̱ni̱t ci anyak komiz ci daizo.

¹⁵ A̱da̱i̱ enne kar keela ol do̱o̱k wak abak kize du̱cca̱k o̱ngo̱o̱le̱ daiz.

¹⁶ Iróng Ye̱su̱ a̱kku̱ de̱de̱ kar ki̱ki̱ya̱ keela anjilonya, abarik enne a̱kku̱ kar ki̱ki̱ya̱ keela dooli cik dooli cik Aburahami.

¹⁷ Atubuz Ta̱mu̱ta̱dde̱n Ye̱su̱ ki ol cik diirik do̱o̱k, kar ki̱li̱ngli̱nge̱k Ta̱mu̱ta̱dde̱n kize alaan ci a̱ddi̱ki̱re̱ wawaco abunna arik zinin nonno, uuwa atin ol cik Ta̱mu̱ta̱dde̱no̱, kar zin kaanyik ele cinne kize wawac ci alalnek ol mu̱nye̱n.

¹⁸ I̱yo̱ko̱ zin, eci ippira Ye̱su̱ bak atiman lo̱rye̱nti̱, eela atin enne ol cik atiman lo̱rye̱nti̱ bu̱k.