Biblia Todo Logo
Bìoball air-loidhne

- Sanasan -

I̱bu̱ru̱ 12 - Tennet


I̱ti̱lo̱ Ta̱mu̱ta̱dde̱n Logoz ciginnek

1 Eci ibbacit koole ci a̱ppwe̱ olli Ya̱u̱do̱ a̱tu̱ Ta̱mu̱ta̱dde̱n ko̱ tu̱we̱nte̱ ci kabahe naga niko, abunna kungnek mu̱nye̱n lo̱o̱c ki kaal wak adiryyet baiza. Abunna kabak baiz ci kanime no̱ngi̱tto̱n kar kurubta baiz ci aanyyet Ta̱mu̱ta̱dde̱n ko̱.

2 Abunna karike zi̱nze̱tti̱ do̱o̱k Ye̱su̱ wa anyahakket tu̱we̱ne̱t kar kidiman tu̱we̱ne̱t cinna kubunna ju̱rru̱m. Eci enne ere talninet ci okko enne a̱ti̱ri̱ze̱t agita, inim zin enne daiz keete ci een ta̱la̱ke̱c zo̱ze̱ ci talninet neci, iróng enne ngen o̱ngo̱o̱le̱ gi̱i̱ imma. I̱yo̱ko̱ aanyik Ta̱mu̱ta̱dde̱n nonno ka̱vvu̱ ngatinne a̱tte̱ ci a̱zzo̱ ta̱mu̱-kenga.

3 Icinnet da̱ baiz bali anime enne gi̱de̱ne̱t a̱tte̱ ci olli mu̱nye̱nu̱ oroot, abunna iróng niga o̱ngo̱o̱li̱nnu̱ baiz bak aburnnu nong.

4 Imma ngati a̱gi̱dde̱t mu̱nye̱na̱ ko̱ nu̱nu̱n, ngen e̱e̱ti̱ imma ngatinno̱ng ka̱da̱k ki bali Ye̱su̱ ke̱.

5 I̱bbi̱rttu̱ng o̱o̱tti̱ zo̱ze̱ bali i̱lo̱ttu̱ng Ta̱mu̱ta̱dde̱n izet dooli ciginnek azi ne, “Dooli cigannik, ma ebezbezannu ti̱lo̱wi̱ne̱t ci Manyi, ma aburnnu nong ming a̱du̱wa̱kku̱ng zoz ci een de̱de̱.

6 Eci Manyi i̱lo̱t dooli wak irez enne, kar ki̱bi̱c e̱e̱t ci elemi enne een do̱le̱c cinne.”

7 Niim no̱ngi̱tto̱n kize ti̱lo̱wi̱ne̱t ci a̱kku̱ ngati Manyoni. Abunna ming a̱gga̱yyu̱ a̱ti̱ri̱zu̱ng Ta̱mu̱ta̱dde̱n izet dooli ciginnek. I̱llo̱i̱ do̱le̱c imma ci iróng baatinne i̱lo̱ti̱.

8 Anyak Ta̱mu̱ta̱dde̱n dooli cik meelek, ming iróng enne i̱lo̱ttu̱ng ki ming i̱lo̱t enne dooli ciginnek, iróng niga e̱e̱ggi̱nnu̱ dooli ciginnek de̱de̱.

9 Ming i̱lo̱tte̱t be̱e̱ti̱gga̱c lo̱o̱ta̱ ngatu, ko̱ngo̱o̱le̱ zin naga nogo zo̱ze̱ necu. Abunna zin ko̱ngo̱o̱le̱ Be̱e̱ti̱nna̱ wa vongizzok cigga̱k aave ta̱mu̱-kenga kar kabait udut.

10 I̱lo̱tte̱t be̱e̱ti̱gga̱c lo̱o̱ta̱ ngatu e̱rki̱nya̱ cikidik, go̱o̱le̱ ci a̱gga̱ nege; imma ti̱lo̱wi̱ne̱t ci Ta̱mu̱ta̱dde̱no̱ abunna oroot ngatinna kar kabait baiz ci abunna.

11 Iróng e̱e̱ti̱ irez ti̱lo̱wi̱ne̱t i̱i̱te̱n neci ele, abarik a̱u̱ce̱, imma vu̱rrta̱, aanyik ti̱lo̱wi̱ne̱t neci e̱e̱t kubunna ngu̱me̱ ci Ta̱mu̱ta̱dde̱no̱ kar kabak labak baiza eci enne umuda mediz ci ti̱lo̱wi̱ne̱t neci.

12 I̱yo̱ko̱ zin, ma alacannu e̱le̱tti̱, abunna ming anyikku zi̱nze̱tti̱ kokkomit tu̱we̱nta̱.

13 Anyik tu̱we̱ne̱t cunno̱ng kibil ṯop, kar ol wak iróng a̱tu̱we̱ oroot abakku bu̱k ci iróng a̱mi̱re̱ ki vu̱rru̱t tu̱we̱nta̱, abarik eela baizi cunno̱ng nogo kokkomit tu̱we̱nta̱ ne kak.


Ma aburnnu zoz ci Ta̱mu̱ta̱dde̱no̱

14 Abait baiz ci abakku ki ol yahe ki baiz ci a̱li̱le̱, eci ol wak abak baiz ci caale do̱ niko cik atin acin Manyi.

15 Abunna ming eelannu kar urubta deten ci Ta̱mu̱ta̱dde̱no̱ niga do̱o̱k. Icinnet ju̱rru̱m, gerza ming oboda e̱e̱ti̱ ki vu̱rru̱t tu̱we̱nta̱ kar kize gerza bak a̱li̱b tu̱we̱ne̱t cunno̱ng, kar ol cik meelek kutungttek tu̱we̱ne̱t lo̱o̱c.

16 Gerza ming aave e̱e̱ti̱ ci maci icima ngaa ci orooto ki ol orgene cunno̱ng, icima ogon ki bali I̱sa̱u̱ ming utene a̱bu̱ze̱t da̱i̱nte̱, iróng enne elemi zoz ci Ta̱mu̱ta̱dde̱no̱. Utuwoi enne a̱bu̱ze̱t utubur kaal cik atin aragiz ko̱.

17 Imma bali vu̱rrta̱, ki ming a̱gga̱ i̱nna̱ ko̱, baling orong enne karagiz ma̱yu̱we̱ne̱t neci ngati baatinne, utubur zin baatinne. Iróng baatinne ngen alalek nonno baling uduta enne ti̱la̱lo̱ nu̱nu̱n.

18 Ngen niga u̱zu̱cca̱ bee bali alanyce gwa̱a̱ biye ci een zara Sinai anyak mu̱hu̱ri̱te̱n, mu̱hu̱ri̱te̱n ci adite looci ne pit ki lamalam i̱i̱te̱n bali aavtte olli Ya̱u̱do̱ balala ke̱.

19 Iziyyet nege muluk ci o̱ngo̱o̱le̱ nege oroot biye neci, ilalek Ta̱mu̱ta̱dde̱n abunna ming abiliz muluk neci.

20 Eci iróng zin nege uule zoz ci Manyoni, azi ne, “Ming u̱u̱m e̱e̱ti̱ ci diiri, icima e̱le̱gi̱ti̱ bee neci nu̱nu̱n, abunna la̱du̱n ming ovoce biyene ka̱da̱k.”

21 O̱to̱ngo̱o̱le̱ Musesi bu̱k zoz neci kar kize ne, “Ko̱ngo̱o̱le̱ anna ka̱bba̱ri̱to̱.”

22 Imma ngatu, i̱vi̱ta̱u̱ niga bee ci een Zion, lo̱o̱c ci Ta̱mu̱ta̱dde̱no̱, Jerusalem ci aave ta̱mu̱-kenga, aavtte anjilonya cik e̱e̱ggi̱n i̱bbo̱nge̱t cik meelek giir, atalne oroot.

23 I̱tto̱zzu̱ niga nginti aavtte a̱bu̱nya̱ ke̱le̱ci̱e̱ ci Ta̱mu̱ta̱dde̱no̱, wak e̱he̱rye̱ zara cigge̱k buwe ci Ta̱mu̱ta̱dde̱no̱ ta̱mu̱-kenga. I̱vi̱ta̱u̱ niga Ta̱mu̱ta̱dde̱n ele ci okko etted lo̱ki̱ko̱ ci kaal do̱o̱k. I̱vi̱ta̱u̱ niga vongizzok cik ol cik abunna idiman Ta̱mu̱ta̱dde̱n kubunnta ta̱mu̱-kenga.

24 I̱vi̱ta̱u̱ niga Ye̱su̱ ta̱mu̱-kenga, wa een zoc ci olom ci een jor, ki bali aanyik Ye̱su̱ ele cinne kize wawac, kar bi̱ye̱ta̱ ciginnek kanyakta zoz ci kalalek naga ol, een necu olom ci een jor, ommog necu bi̱ye̱ cik Abeli orong caac.

25 U̱zu̱tte̱ zin, abunna ming aziknnu zoz ci Ta̱mu̱ta̱dde̱n ci ozozikkung ko̱. Iróng olli Ya̱u̱do̱ a̱vi̱r ba̱li̱ye̱ balala baling abure zoz ci Musesi, iróng zin naga ka̱vi̱r zoz ci Ta̱mu̱ta̱dde̱no̱ ci ozozikket ta̱mu̱-kenga ko̱, ming kaburnna zoz cinne.

26 Baling ozoz Ta̱mu̱ta̱dde̱n biye ci een Sinai, otomowe zin looci, imma abarik i̱yo̱ko̱, u̱du̱wa̱ zoz imma, azi ne, “Komonne atin anna lo̱o̱c ki ta̱mu̱-keng bu̱k.”

27 Omone atin enne kaal wak eenycai do̱o̱k kuduccai, kirakttek kaala cik iróng omoti do̱ niko.

28 I̱yo̱ko̱ zin, abunna zin kanyike Ta̱mu̱ta̱dde̱n zany ngati kalawe nonno eci enne aanyyet ba̱a̱li̱ne̱t ci iróng omoti.

29 Eci Ta̱mu̱ta̱dde̱n ci ka̱di̱ngdi̱nga̱n naga ko̱ ogon ki i̱yo̱ko̱ gwa̱a̱ ci atuz kaal ne lai.

© 2018, Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan