I̱bu̱ru̱ 11 - Tennet

Ol wak anyak tu̱we̱ne̱t de̱de̱

¹ I̱yo̱ko̱ zin, een tu̱we̱ne̱t gi̱i̱ ci karike naga zi̱nze̱tti̱ ko̱ de̱de̱, i̱ye̱le̱kke̱t atin kaal cik iróng naga kacin i̱yo̱ko̱ niko eberene.

² U̱mu̱dda̱ ol balik reentik baiz ci abunna eci nege anyak tu̱we̱ne̱t ci okkomi, atal zin Ta̱mu̱ta̱dde̱n nogo.

³ Imma bo̱do̱k tu̱we̱nte̱ cinna, ka̱gga̱, idiman Ta̱mu̱ta̱dde̱n ta̱mu̱-keng ki lo̱o̱c zo̱ze̱ ci a̱du̱wa̱ enne utuga, adiman kaal ne̱ko̱ kaale cik iróng naga kacin eberene.

⁴ Umuc ba̱li̱ye̱ e̱e̱ti̱ ci een Abel tu̱we̱nta̱ Ta̱mu̱ta̱dde̱n gi̱i̱ye̱ ci ommog ci gotononi Kain. Kar bo̱do̱k tu̱we̱nta̱, icin Ta̱mu̱ta̱dde̱n nonno kize e̱e̱t ci abunna. Ozoz Ta̱mu̱ta̱dde̱n ju̱rru̱m gi̱i̱ye̱ ci amuce enne nonno. Kar bo̱do̱k baling a̱da̱k Abeli nu̱nu̱n, ngen Ta̱mu̱ta̱dde̱n ozozikket zo̱ze̱ ci tu̱we̱ne̱t cinne.

⁵ Imma bo̱do̱k tu̱we̱nte̱ ci e̱e̱t ci een zara Enok, odong zin Ta̱mu̱ta̱dde̱n nonno rugetet uwe ta̱mu̱-kenga. Iróng atin ol ngen amuda nonno eci Ta̱mu̱ta̱dde̱n uwe nonno. Baling ngen Ta̱mu̱ta̱dde̱n kuuwe nonno, aanyik zin nonno kize e̱e̱t ci abunna.

⁶ Iróng wo̱ye̱ Ta̱mu̱ta̱dde̱n irez e̱e̱t ci diiri ming iróng elemi zoz cinne. Ming orong e̱e̱ti̱ a̱kku̱nna̱k Ta̱mu̱ta̱dde̱n, abunna ming elemi kar ka̱gga̱ aave Manyi to, kar zin Ta̱mu̱ta̱dde̱n kumuc e̱e̱t eci oronge nonno de̱de̱.

⁷ Imma bo̱do̱k tu̱we̱nte̱ ci e̱e̱t ci een zara Nowa, izik zoz bali i̱lo̱ti̱ke̱ Ta̱mu̱ta̱dde̱n ke̱ kar kuk ku̱tu̱gu̱ gi̱i̱ ci iróng enne acin bu̱k. Idiman zin i̱bo̱ ci a̱ddi̱ki̱re̱ kar ki̱ti̱ri̱z ol ciginnek. Utuburek zin Nowa olli lo̱o̱tu̱ nong, aanyik zin Ta̱mu̱ta̱dde̱n nonno kubunna eci enne anyak tu̱we̱ne̱t.

⁸ Imma bo̱do̱k tu̱we̱nte̱ ci e̱e̱t ci een zara Aburaham, elema zoz ci Ta̱mu̱ta̱dde̱no̱ baling awu nonno ke̱, kar kuk lo̱o̱ce̱ bali a̱nne̱k Manyi anyik nonno kuk ke̱, kar atin kuuwe lo̱o̱c neci kize cinne. Okko enne ming iróng a̱gga̱ lo̱o̱c neci nu̱nu̱n.

⁹ Baling okko enne azuca lo̱o̱c neci u̱du̱wa̱ Ta̱mu̱ta̱dde̱n ke̱, abak zin nginati tu̱we̱nta̱. Ogon enne ki e̱e̱ti̱ ci een e̱re̱nno̱i̱t abak ti̱ta̱, aragiz atin dooli cik dooli ciginnek, I̱sa̱ko̱ ki Ya̱ko̱bo̱ lo̱o̱c neci bu̱k.

¹⁰ Imma Aburahami bo̱do̱k ere orog ci riili eenyet Ta̱mu̱ta̱dde̱n.

¹¹ Imma bo̱do̱k tu̱we̱nte̱ ci Aburahami ki ngaa wainne abile kar kize ma̱ti̱yo̱c een zara Sarah, aanyik zin Ta̱mu̱ta̱dde̱n nogo do̱le̱c. A̱tu̱ nege zoz bali u̱du̱wa̱ Manyi ke̱.

¹² Anyat ba̱li̱ye̱ Aburahami oroot, ma baling anyat enne nu̱nu̱n, i̱ti̱rra̱ zin do̱le̱c ci okko a̱rri̱ta̱ ol cik lo̱o̱tu̱ do̱o̱k. Ovvo atin dooli ciginnek meele ne giir kommogit munyuny cik ta̱mu̱-kengo, iróng wo̱ye̱ a̱gi̱le̱ ogon ki azac ci moru.

¹³ Abaito zin ol ne̱k anyak tu̱we̱ne̱t ke̱ do̱o̱k, ngen zin nege a̱tu̱we̱ zo̱ze̱ ci okko Ta̱mu̱ta̱dde̱n ogoni. Ngen kurubta zoz bali u̱du̱wa̱ Manyi ke̱, icinnet nege kaal ne̱ke̱ meer reena many bak orongi. A̱gga̱ ming e̱e̱ggi̱n nege e̱re̱nno̱k ki i̱do̱ngi̱ lo̱o̱ta̱ ngatu.

¹⁴ Imma ol cik ozoz niko ko̱, orong nege orog cinne̱ng ci aave do̱.

¹⁵ Ming orong nege orog ci a̱vvu̱nne̱ nege ko̱, a̱mi̱re̱ wo̱ye̱ ovvo nginati labak.

¹⁶ Abarik nege orong orog ci riili aave ta̱mu̱-kenga, iróng zin a̱li̱ya̱ni̱ a̱da̱k Ta̱mu̱ta̱dde̱n ming awu nege nonno Ta̱mu̱ta̱dde̱n cinne̱ng, eci adimanek nogo orog ta̱mu̱-kenga.

¹⁷ Imma tu̱we̱nte̱ ci Aburahami bali atimane Ta̱mu̱ta̱dde̱n nonno zo̱ze̱ ci ngerinne I̱sa̱ko̱ ko̱, abunna ming apahek nonno kize wawac. Orong zin enne kapahek I̱sa̱ko̱ Ta̱mu̱ta̱dde̱n ngerinne wa o̱de̱ ṯok kize wawac, ming u̱du̱wa̱k Ta̱mu̱ta̱dde̱n nonno zoz neci nu̱nu̱n, eci enne a̱gga̱ zoz bali u̱du̱wa̱ Manyi ke̱.

¹⁸ Ming u̱du̱wa̱k Ta̱mu̱ta̱dde̱n nonno nu̱nu̱n zoz cu: “Okko atin ngerunne I̱sa̱ko̱ avada ce̱e̱z cunne.”

¹⁹ U̱du̱wa̱ zin Aburahami zinine cinne zoz ci azi ne ming a̱da̱i̱ I̱sa̱ko̱, ingane atin Ta̱mu̱ta̱dde̱n nonno daiza. U̱tu̱gu̱ zin ki ming ingane Ta̱mu̱ta̱dde̱n nonno daiza.

²⁰ Imma zin bo̱do̱k tu̱we̱nte̱ ci I̱sa̱ko̱, u̱mu̱yu̱k zin enne dooli ciginnek Ya̱ko̱bo̱ ki I̱sa̱u̱.

²¹ Imma bo̱do̱k tu̱we̱nte̱ ci Ya̱ko̱bo̱, u̱mu̱yu̱k enne dooli cik Yosevo baling ize enne ma̱ti̱yo̱c, kar ki̱di̱ngdi̱nga̱n Ta̱mu̱ta̱dde̱n ngati i̱ti̱re̱ne̱ ki̱ri̱ cinne.

²² Imma tu̱we̱nta̱ baling orong Yosevo ka̱da̱k, ize ne ovvo atin olli Israilo ungnek lo̱o̱c ci Masiro lo̱o̱c. Kar bo̱do̱k kize ne abunna ming ovvoye ol ki emme ciginnek bu̱k.

²³ Okko bo̱do̱k tu̱we̱nta̱, u̱lu̱gu̱nyye̱t olli Musesi nonno nyelowi i̱i̱yo̱ baling i̱ti̱rra̱i̱ enne, eci enne een do̱le̱c ci a̱zi̱ze̱. Iróng nege ngen o̱ngo̱o̱le̱ zoz ci alaano.

²⁴ Okko bo̱do̱k tu̱we̱nte̱ ci Musesi abure ming a̱nne̱k ol ne e̱e̱ni̱ i̱nna̱ do̱le̱c ci buweenyi alaan ci Masiro.

²⁵ Atahala enne gool ci apirnane enne ki olli Ta̱mu̱ta̱dde̱no̱, ngati wo̱ye̱ da̱ adahe lo̱o̱c mu̱nye̱nu̱ ci iróng aave u̱u̱mu̱c.

²⁶ Abunna ming apirna Musesi zo̱ze̱ ci Ki̱ri̱sto̱, ngati go̱o̱le̱ ci a̱gga̱me̱ eezet ci Masiro do̱o̱k, eci enne ere ma̱yu̱we̱ne̱t ci atin a̱kku̱ ke̱.

²⁷ Okko tu̱we̱nta̱ utungek Musesi lo̱o̱c ci Masiro lo̱o̱c, iróng o̱ngo̱o̱le̱ alaan, anime enne eci icin Ta̱mu̱ta̱dde̱n ci iróng naga kacin eberene.

²⁸ Okko bo̱do̱k tu̱we̱nta̱, uzute enne I̱i̱te̱n wa Va̱rda̱ngi̱nto̱, i̱i̱te̱n bali a̱kku̱nna̱k anjilo ci Ta̱mu̱ta̱dde̱no̱ olli Ya̱u̱do̱ Masire ke̱, kar kazac bi̱ye̱ kar gi̱i̱ ci adita a̱bu̱nya̱ cik Masiro ki̱ki̱ya̱, iróng zin a̱ru̱k a̱bu̱nya̱ cik Ya̱u̱do̱.

²⁹ Etted olli Ya̱u̱do̱ Nyatapar ci Ma̱ri̱ tu̱we̱nta̱ ki ci odoi looci. Ming ovvo olli Masiro annu nogo, utududde zin nege.

³⁰ Okko tu̱we̱nte̱ ci olli Ya̱u̱do̱ ming ovvo nege a̱lu̱c a̱lu̱wa̱ ci orog ci een Je̱ri̱ko̱ lak turgerem, i̱ta̱a̱ zin a̱lu̱wa̱ niko.

³¹ Okko tu̱we̱nte̱ ci ngaa ci een a̱li̱ya̱i̱t een zara Rihab ko̱, iróng Ta̱mu̱ta̱dde̱n ngen a̱ru̱k nonno ki ol balik abure Manyi ke̱, eci enne i̱ti̱ri̱z ro̱tto̱k balik ovvo oroot lo̱o̱c ke̱.

³² Orong ku̱du̱wa̱ zo̱zzo̱k cik ol cik a̱tu̱we̱ ko̱ do̱o̱k, ciko Gideon ki Barak, ki Samson ki Jephthah ki Da̱vi̱de̱ ki Samwel ki a̱ri̱tto̱k cik zoz ci Ta̱mu̱ta̱dde̱no̱ do̱o̱k.

³³ Tu̱we̱nte̱ ci ol ne̱ko̱, ommogit nege alaat cik lo̱o̱cco̱k u̱gge̱, abal ol de̱de̱, kar ku̱mu̱dda̱ zoz bali u̱du̱wa̱ Manyi, okko Danieli anyug u̱tu̱ge̱tti̱ cik maatetu.

³⁴ Adit gwo̱o̱ ci apadpadi, alit ilanya. Okko piryanzet cinne̱ng ukce kize doiz. Okkomit kak illawa kar mo̱ddo̱ do̱o̱k ki̱vi̱re̱t.

³⁵ Imma bali gi̱i̱ye̱ neci, icinnet ngaai uggak wak a̱tu̱we̱ ol cigge̱k ming obodai Manyi daiza. Ma̱i̱je̱ ngatu, i̱gi̱dde̱ ol uggak, abure ngati odotik zoz ci Ta̱mu̱ta̱dde̱no̱ lo̱o̱c, kar ol ne̱ke̱ koogtta nogo. Aartik nege zi̱nze̱tti̱ baiz ci abunna oroot a̱kku̱ atin vu̱rrta̱ ngati itingazze ol daiza.

³⁶ Atararte ol u̱gge̱ kar ki̱bi̱cce̱t bo̱i̱ci̱ a̱lle̱ne̱. Eceb u̱gge̱ zo̱o̱ lagama.

³⁷ Ovoc ol u̱gge̱ ka̱da̱i̱to̱. Ovvo uggak ngatinne̱ng etted ol rugetet ne pur. Ovvo uggak akane nyazuwata. Ovvo ne̱k anyigzai ke̱ aim ceremwa cik eezau ki cik a̱zza̱nnu̱, aminye ol kipirta ne twa̱c.

³⁸ Iróng olli lo̱o̱tu̱ abunna ngati ol ne̱ko̱, zoz zin ci ajale nege balala ki biyene, a̱lu̱gu̱ny e̱le̱tti̱ ngi̱lo̱mwa̱nne̱ ki lo̱o̱knya̱i̱.

³⁹ Atali zin Ta̱mu̱ta̱dde̱n ol ne̱ke̱ do̱o̱k eci nege anyak tu̱we̱ne̱t. Ngen zin nege kurubta zoz bali u̱du̱wa̱ Manyi ke̱.

⁴⁰ Anyak Ta̱mu̱ta̱dde̱n gi̱i̱ ci abunna oroot zinine cinne ci orong kaanyyet agit do̱o̱k, abunna kazuca nginti A̱li̱le̱ ta̱mu̱-kenga ki ol ne̱ke̱ do̱o̱k nga̱to̱de̱.