I̱bu̱ru̱ 10 - Tennet

A̱da̱i̱ Ki̱ri̱sto̱ kize wawac lak co̱de̱

¹ Een lo̱ti̱nno̱wa̱ cik Musesi ri̱ri̱to̱n ci zoz ci abunna een jor, u̱du̱wa̱ Manyi a̱kku̱ atin. Obodonik olli wawaco apahek Ta̱mu̱ta̱dde̱n kaal odohize odohize. Iróng kaala ne̱k apahek olli wawaco Manyi ko̱ a̱vi̱la̱ mu̱nye̱n wak ol wak ala nonno.

² Ming a̱vi̱la̱ weda kaala ne̱ko̱ mu̱nye̱n cik ollu, ibiltte weda nege zoz ci apahek Ta̱mu̱ta̱dde̱n kaal. Aarttai weda mu̱nye̱na̱ cik ol wak ala Manyi ko̱ do̱o̱k lak co̱de̱, iróng zin nege ngen o̱ngo̱o̱le̱ gi̱i̱ imma.

³ Imma ol ne̱k apahek Ta̱mu̱ta̱dde̱n kaal e̱rki̱ta̱ ko̱ a̱a̱dda̱ mu̱nye̱n cigge̱k,

⁴ eci bi̱ye̱ta̱ cik tiinu ki cik eezau iróng aara ol mu̱nye̱n.

⁵ Baling i̱ki̱ya̱k Ye̱su̱ Ki̱ri̱sto̱ lo̱o̱c kar kizek Ta̱mu̱ta̱dde̱n ne, “Iróng i̱nna̱ orongi kaal cik kapahekin, abarik i̱nna̱ aanya annit ele;

⁶ iróng i̱nna̱ orongi kaal cik kapahekin kize wawac ki ci kaarane mu̱nye̱n iróng i̱nna̱ atalne.

⁷ Kar zin anna bo̱do̱k kize ne, ‘Ta̱mu̱ta̱dde̱n bai, ka̱kku̱ni̱ anna kar ki̱ki̱ya̱ ku̱tu̱gu̱ li̱ngli̱ngo̱n cunne, ki baling e̱he̱rye̱ buwe cunne ke̱.’”

⁸ A̱du̱wa̱ zin Ye̱su̱ zoz necu azi arrak ne, “Iróng i̱nna̱ Ta̱mu̱ta̱dde̱n elemi kaal cik apaheki ol kize wawac, icima cik aburcene.” Ming nu̱nu̱n a̱du̱wa̱ lo̱ti̱nno̱wa̱ cik Musesi azi ne abunna.

⁹ Kar zin bo̱do̱k vu̱rrta̱ kize ne, “Ka̱kku̱ni̱ anna kar ki̱ki̱ya̱ ku̱tu̱gu̱ li̱ngli̱ngo̱n cunne.” Imma zin go̱o̱le̱ neci, ibiliz zin Ye̱su̱ li̱ngli̱ngo̱n bali u̱du̱wa̱k Manyi Muses ke̱, kar kanyaha Zoz ci een Jor.

¹⁰ U̱tu̱gu̱ zin enne gi̱i̱ ci orong Manyi nonno ku̱tu̱gu̱, aanyik zin Ye̱su̱ Ki̱ri̱sto̱ ele cinne kize wawac ci aara ol mu̱nye̱n ne lai, lak co̱de̱, kizeto caale paz.

¹¹ Abile ol wak wawaco Ce̱e̱ze̱ wa Ta̱mu̱ta̱dde̱no̱ apahek Ta̱mu̱ta̱dde̱n kaal odohize odohize ki ming a̱du̱wa̱ lo̱ti̱nno̱wa̱ cik Musesi, iróng kaala ne̱ke̱ aara ol mu̱nye̱n.

¹² Imma e̱e̱ti̱ ci wawaco wa aanyik ele cinne Ta̱mu̱ta̱dde̱n kize wawac ci aara ol mu̱nye̱n do̱o̱k. Kar Ta̱mu̱ta̱dde̱n kaanyik nonno ka̱vvu̱ ngatinne a̱tte̱ ci a̱zzo̱ ta̱mu̱-kenga.

¹³ Aave zin atin enne ta̱mu̱-kenga zee ki̱vi̱ta̱ mo̱ddo̱ ciginnek kakatek nonno u̱zu̱ngtti̱ lo̱o̱c ngati aave enne lecera.

¹⁴ Imma zin go̱o̱le̱ neci aanyik enne ele cinne kize wawac ko̱, idiman zin enne ol wak aara enne mu̱nye̱n ku̱tu̱gu̱zzo̱ ki enne, kizeto caale ne paz, udut.

¹⁵ U̱du̱wa̱i̱t zin Vongizi ci A̱li̱le̱ agit zoz cu. Arrak azi enne ne,

¹⁶ “Een necu olom ci een jor kogonni atin anna ki nogo, i̱i̱te̱n neci, azi Manyi. Karike atin anna ti̱lo̱wi̱ne̱t cinanni zi̱nze̱tti̱ cigge̱k, kar bo̱do̱k keteherek ti̱lo̱wi̱ne̱t cinanni o̱o̱tti̱ cigge̱k i̱i̱te̱n neci.”

¹⁷ Kar zin bo̱do̱k kotorek zoz ci azi ne, “Kalalnek atin anna nogo kaale balik gerzek u̱tu̱gu̱zzo̱ nege ke̱, iróng bo̱do̱k anna ka̱a̱da̱ ba̱ci̱nno̱k ne̱ke̱ udut.”

¹⁸ Ming alalek Ta̱mu̱ta̱dde̱n mu̱nye̱n cik ollu, iróng e̱e̱ti̱ ci wawaco Ce̱e̱ze̱ wa Ta̱mu̱ta̱dde̱no̱ ngen apahek Ta̱mu̱ta̱dde̱n gi̱i̱ imma.

Abunna kojongoz Ta̱mu̱ta̱dde̱n

¹⁹ Gotonogga ki ngonogga tu̱we̱nta̱, aanyyet bi̱ye̱ta̱ cik a̱da̱kne̱ Ye̱su̱ ki̱tto̱z Nginti A̱li̱le̱ Oroot aave Ta̱mu̱ta̱dde̱n Ce̱e̱ze̱ cinne labak.

²⁰ Okko go̱o̱le̱ ci een jor ki gool ci baizo kuk ngati ru̱u̱m wa enger nginti lawinto A̱li̱le̱ ki ngin wa A̱li̱le̱ Oroot Ce̱e̱ze̱ wa Ta̱mu̱ta̱dde̱no̱, een neci ele cinne, nonno ci aanyyet ki̱tto̱z nginti A̱li̱le̱ Oroot ke̱ labak.

²¹ Ming kanyak alaan ci a̱ddi̱ki̱re̱ wawaco ci abal ol Ce̱e̱ze̱ wa Ta̱mu̱ta̱dde̱no̱,

²² abunna zin naga ka̱vvu̱nna̱k Ta̱mu̱ta̱dde̱n zi̱nze̱tti̱nne̱ cik abunna kar kartik nonno zi̱nze̱tti̱ ki tu̱we̱ne̱t ci okkomi kak. Utunyca bi̱ye̱ta̱ cik Ye̱su̱ ngati a̱da̱kne̱ keete ci een ta̱la̱ke̱c ko̱ mu̱nye̱n, iróng ngen ko̱ngo̱o̱le̱ gi̱i̱ imma. Utunyyce e̱le̱tti̱ cigga̱c ko̱ maame cik caalek ne paz ngati ka̱gga̱me̱ ba̱ti̱ti̱mo̱.

²³ Abunna ka̱gga̱m tu̱we̱ne̱t ci karike naga zi̱nze̱tti̱ cik ka̱tu̱we̱ Ta̱mu̱ta̱dde̱n ko̱ ju̱rru̱m, eci Ta̱mu̱ta̱dde̱n ci ka̱tu̱ ko̱ ogon atin zoz ci u̱du̱wa̱ enne ke̱.

²⁴ Abunna ming ki̱lo̱t ol zo̱ze̱ ci kirezonne bak kogon kaal cik abunna.

²⁵ Abunna karume gon nga̱to̱de̱ ngati kalawe Ta̱mu̱ta̱dde̱n, aanycik kize kaale cinna; ki i̱yo̱ko̱ ming iróng ol uggak arume ko̱, eci izeto ojontte i̱i̱nya̱ cik okko Ye̱su̱ obodak lo̱o̱c.

²⁶ Gotonogga ki ngonogga tu̱we̱nta̱, ming kogon mu̱nye̱n i̱ba̱ti̱ne̱ ngati ka̱gga̱we̱ zoz ci een de̱de̱, i̱llo̱i̱ wawac imma ci atin a̱vi̱la̱ mu̱nye̱n ne̱ke̱ ngatinna ki baling aanyik Ye̱su̱ ele cinne kize wawac ci a̱vi̱la̱ mu̱nye̱n cik ollu do̱o̱k lak co̱de̱.

²⁷ Abarik e̱e̱ti̱ ci anyak mu̱nye̱n ko̱, abak ngo̱li̱nte̱ ci okko Ta̱mu̱ta̱dde̱n ettede lo̱ki̱ko̱, kar ol wak adite iina iróng aziye zoz cinne, atuze gwo̱o̱ye̱ ci apadpadi oroot.

²⁸ Ming abure e̱e̱ti̱ imma lo̱ti̱nno̱k cik Musesi, a̱da̱i̱ ki̱zzi̱ e̱e̱ti̱ ci amanik nonno ngati aavtte bbacaha cik een rama icima i̱i̱yo̱.

²⁹ I̱no̱ni̱t lo̱ki̱ko̱ ci okkomi okko Ta̱mu̱ta̱dde̱n etteddek ol wak ibbez zoz ci Ngerrti Ta̱mu̱ta̱dde̱no̱, adima bo̱do̱k bi̱ye̱ cik Ye̱su̱ anyaha olomi ci een jor, wa eela nonno mu̱nye̱ne̱ ko̱ kize gi̱i̱ ci labak, kar bo̱do̱k kodom Vongiz ci A̱li̱le̱ Ta̱mu̱ta̱dde̱no̱ ci aanyik nonno de̱ti̱ne̱t ko̱.

³⁰ Ka̱gga̱ naga azi Ta̱mu̱ta̱dde̱n ne, “Kacaca atin anna kaal cik gerzek ogonekku̱ng ol i̱ge̱ta̱.” Kar bo̱do̱k zoz ci Ta̱mu̱ta̱dde̱no̱ buwe emani azi ne, “Etted atin Manyi lo̱ki̱ko̱ ci ol cik abure nonno.”

³¹ A̱gga̱c zoz necu ju̱rru̱m, gerza oroot ming a̱kku̱nna̱k e̱e̱ti̱ ngu̱m ci Ta̱mu̱ta̱dde̱no̱ kar ketted lo̱ki̱ko̱ cinne, aanyik zoz necu e̱e̱t ngo̱li̱ne̱t oroot.

³² A̱a̱dda̱ i̱i̱nya̱ balik ngen elemannu Ye̱su̱ jor ke̱. Arikku niga zi̱nze̱tti̱ Ta̱mu̱ta̱dde̱n, ming anyak kaal cik anyahakku̱ng piryanzet.

³³ Anyak i̱i̱te̱n imma ci arannu̱ng ol icima a̱ru̱kku̱ng, anyak bo̱do̱k i̱i̱te̱n imma ci abilnnu eelannu niga ol cik a̱gi̱d ol.

³⁴ Ippirttau niga ki ol wak e̱ce̱bje̱ lagama, kar bo̱do̱k kaamttaung i̱jjo̱ cuggo̱k, abunna ming anyakku zi̱nze̱tti̱nne̱ cik alali. A̱gga̱yyu̱ niga a̱a̱nyu̱ng atin Ta̱mu̱ta̱dde̱n i̱jjo̱ cik abunna aavtte udut.

³⁵ Ma zin odotekku zoz ci arikku niga Ta̱mu̱ta̱dde̱n zi̱nze̱tti̱ ko̱ lo̱o̱c, a̱a̱nyu̱ng atin Manyi kaal cik abunna.

³⁶ Abunna ming Animnyu no̱ngi̱tto̱n, kar u̱tu̱gu̱z kaal cik orong Ta̱mu̱ta̱dde̱n. Kar atin urubta kaal balik u̱du̱wa̱ enne ke̱.

³⁷ Eci Waraga ci Ta̱mu̱ta̱dde̱no̱ ozoz zoz ci Ye̱su̱ azi ne, “A̱kku̱ atin enne ataman.

³⁸ Imma e̱e̱ti̱ cinanni abunna abak atin tu̱we̱nta̱. Ming a̱mi̱re̱ enne ki vu̱rru̱t, iróng anna kirezi kaal ne̱k ogon enne ke̱.”

³⁹ Imma naga e̱le̱tti̱ne̱, iróng kogon ki ol wak a̱mi̱re̱ ki vu̱rru̱t tu̱we̱nta̱ ko̱, kar kidittai, abarik naga ke̱e̱ggi̱n ol wak ka̱tu̱ Ta̱mu̱ta̱dde̱n, a̱ti̱ri̱ze̱t atin enne.