I̱bu̱ru̱ 1 - Tennet

Anyak Ngerrti Ta̱mu̱ta̱dde̱no̱ doiz ci ommog anjilonya

¹ Imma da̱ bali reena, go̱o̱lo̱we̱ cik meelek, ozozik Ta̱mu̱ta̱dde̱n ji̱ji̱ti̱gga̱c balik reentik ke̱, zoz wainne go̱o̱le̱ ci i̱tto̱na̱ne̱ a̱ri̱tto̱k cik zoz ci Ta̱mu̱ta̱dde̱no̱ ki̱vi̱ta̱ ku̱du̱kta̱k ol zoz ci a̱du̱wa̱ enne.

² Imma zin i̱yo̱ko̱ ko̱, i̱tto̱na̱e̱t Ta̱mu̱ta̱dde̱n Ngerinne ki̱ki̱ya̱ kanyahaet kaviyak cik abunna. Eenyca Ta̱mu̱ta̱dde̱n lo̱o̱c ki ta̱mu̱-keng do̱o̱k ngati Ngerinne. Een atin kaala do̱o̱k cik Ngerinne.

³ I̱ye̱la̱ Ngerinne doiz ki di̱ngdi̱ngo̱n ci Ta̱mu̱ta̱dde̱no̱, ogon enne odohize ki Ta̱mu̱ta̱dde̱n. A̱gga̱m zin enne lo̱o̱c doize cinne. Baling utunya Ngerinne mu̱nye̱n cigga̱c do̱o̱k, a̱vvu̱ zin lo̱o̱ta̱ a̱tte̱ ci a̱zzo̱ di̱ngdi̱ngo̱nte̱ ci Ta̱mu̱ta̱dde̱no̱, ta̱mu̱-kenga.

⁴ Ommog zin enne anjilonya cik Ta̱mu̱ta̱dde̱no̱ do̱o̱k, kar zara wak akanonik nonno ku̱bu̱lte̱ kommog nogo do̱o̱k.

Ommog Ye̱su̱ to̱ni̱a̱k cik Ta̱mu̱ta̱dde̱no̱ veelek

⁵ Ngen Ta̱mu̱ta̱dde̱n i̱i̱te̱n imma kizek anjilo co̱de̱ anjilonyai ne, “E̱e̱ni̱ i̱nna̱ Ngeranni; kiize anna wazin cu Baatunne.” Icima bo̱do̱k, a̱nne̱k anjilonya u̱gge̱ ngatinne̱ng ne, “Ke̱e̱ni̱ anna Baatunne, Okko i̱nna̱ e̱e̱ni̱ Ngeranni.”

⁶ Baling i̱tto̱na̱k Ta̱mu̱ta̱dde̱n Ngerinne wa o̱de̱ ṯok lo̱o̱c, “I̱lo̱te̱k anjilonya waginnek do̱o̱k abunna ming a̱di̱ngdi̱nga̱n nonno.”

⁷ Imma baling ozoz Ta̱mu̱ta̱dde̱n zoz ci obod ki anjilonya waginnek, azi ne, “Kuhu anna anjilonya cigannik ku̱tu̱gu̱zzo̱ ki ngooti, ki a̱ha̱tti̱ cik gwo̱o̱yo̱.”

⁸ Abarik Ta̱mu̱ta̱dde̱n ozoz zoz ci obod ki Ngerinne, azi ne, “E̱e̱ni̱ i̱nna̱ Ta̱mu̱ta̱dde̱n, abali atin lo̱o̱c ize alaan ci abak udut! Okko alaanzet cunne apahek ol lo̱ki̱ko̱ ju̱rru̱m.

⁹ Irezi i̱nna̱ zoz ci abunna, kar tubur zoz ci gerze, i̱yo̱ko̱ zin anna Ta̱mu̱ta̱dde̱n cunne, katahalai zin i̱nne̱t Ta̱mu̱ta̱dde̱n, kaanyi li̱ngli̱ngo̱n ci ommoge i̱nna̱ gonoggu do̱o̱k go̱o̱le̱ ci ka̱vu̱di̱ maale ci talninto.”

¹⁰ Ozoz bo̱do̱k Ta̱mu̱ta̱dde̱n zoz ci Ngerinne, azi ne, “Manyi, bali arrak oowa, i̱nne̱t ci akane teheenyinet ci lo̱o̱c do̱o̱k kar bo̱do̱k teheenya ta̱mu̱-keng.

¹¹ Ovvo atin looci ki ta̱mu̱-keng a̱zze̱ dakdak ku̱tu̱gu̱ ki ru̱u̱m ci erece ku̱mu̱. Imma i̱nna̱ abai udut.

¹² Anyumi atin i̱nna̱ lo̱o̱c ki ta̱mu̱-keng kiwagon ru̱u̱m ci a̱lu̱ce̱k ele, kar bo̱do̱k aragizek nogo kiwagon ru̱u̱ma̱ni̱. Ma̱i̱je̱ i̱nna̱, iróng ele cunne ukce, abai atin udut.”

¹³ Ngen Ta̱mu̱ta̱dde̱n i̱i̱te̱n imma ku̱du̱wa̱k anjilonya ciginnek zoz imma ci azi ne, “A̱vvu̱ a̱tte̱ cinanni a̱zzo̱ ngati a̱di̱ngdi̱nga̱ni̱ ol, zee kanyik anna mo̱ddo̱ wagunnek, ka̱vvu̱to̱ zoone cigunnek.”

¹⁴ E̱e̱ggi̱n anjilonya cik Ta̱mu̱ta̱dde̱no̱ vongizzok cik i̱tto̱na̱ Ta̱mu̱ta̱dde̱n kar ki̱li̱ngli̱ngto̱zi̱k ol wak amuda ti̱ri̱ze̱ne̱t ci Ta̱mu̱ta̱dde̱no̱.