Ga̱la̱ti̱a̱ 6 - Tennet

Tu̱gu̱we̱k ol do̱o̱k kaal cik abunna

¹ Gotonogga ki ngonogga, ming i̱ta̱k e̱e̱ti̱ imma mu̱nye̱n, imma niga ol ne̱k okkomnu Vongize ci Ta̱mu̱ta̱dde̱no̱ ko̱, o̱zo̱zze̱k nonno idic kar enne kobodak orgen cunno̱ng. Ming okko e̱e̱ti̱ adiman zoz neci, zuute ele cunne, gerza ming i̱i̱na̱k i̱nna̱ bu̱k mu̱nye̱n.

² Eelta ol cik anyak no̱ngi̱tto̱n orgene cunno̱ng, ming u̱tu̱gu̱zzu̱ niko, u̱zu̱ttu̱ zin niga lo̱ti̱nno̱k cik Ki̱ri̱sto̱.

³ Ming i̱no̱n e̱e̱ti̱ ele azi ne ke̱e̱ni̱ e̱e̱t ci riili ngati keelane ol, a̱lu̱t e̱e̱ti̱ neci ele cinne. Iróng e̱e̱ti̱ neci een riil.

⁴ Abunna ming acinni li̱ngli̱ngo̱n cunne ju̱rru̱m, kar zin ruba talninet ci li̱ngli̱ngo̱n neci, ma atubuzi ele cunne ki e̱e̱t imma.

⁵ Anyik ngengene kuk atin ngu̱me̱ ci Ta̱mu̱ta̱dde̱no̱ ki kaal cik ogon enne manyi.

⁶ Anyik ol wak edemez ol nogo kozolit ki de̱me̱zzo̱k wak edemez nogo zoz ci Ta̱mu̱ta̱dde̱no̱ kaal.

⁷ Ma anyike e̱e̱t imma ki̱ti̱kttu̱ng tu̱, i̱llo̱i̱ e̱e̱t imma ci alaba Ta̱mu̱ta̱dde̱n. Kazi niko, eci obodak e̱e̱t gi̱i̱ ci u̱tu̱gu̱ enne baize cinne.

⁸ Imma e̱e̱ti̱ ci ogon kaal cik gerzek irez zinin cinne, amuda atin enne zoz ci gerze. Ma̱i̱je̱ e̱e̱ti̱ ci ogon kaal Vongize ci Ta̱mu̱ta̱dde̱no̱, amuda atin baiz wa aave udut.

⁹ Ma arnannu ngati ogonnu zoz ci abunna. Ming emenannu li̱ngli̱ngo̱ne̱ ci Ta̱mu̱ta̱dde̱no̱, amuccu̱ng atin Ta̱mu̱ta̱dde̱n i̱i̱te̱ne̱ ci a̱gga̱ enne.

¹⁰ I̱yo̱ko̱ zin, ming aanyyet Ta̱mu̱ta̱dde̱n gool imma, ku̱tu̱gu̱zze̱k ol do̱o̱k kaal cik abunna, ommogje ol wak a̱tu̱ zoz ci Ki̱ri̱sto̱.

Ti̱lo̱wi̱ne̱t ci Pa̱u̱lo̱ vu̱rrto̱

¹¹ Icinnet, ketehera anna waraga cu a̱tte̱ cinanni kizeto poloze abacanya niko.

¹² Anyak ol cik orong kubunnta ngu̱me̱ ci ollu ommogkkung zo̱ze̱ ci ettede ol vi̱ca̱vi̱cce̱t. Ogon nege zoz neci niko gerza ming a̱gi̱d ol nogo zo̱ze̱ ci edemeze nege ol zoz ci azi ne, amuda ol ti̱ri̱ze̱ne̱t ngati a̱da̱kne̱ Ye̱su̱ Ki̱ri̱sto̱ ta̱la̱ke̱ca̱ do̱ niko.

¹³ Imma ol wak Ya̱u̱do̱ orong kettedit ol vi̱ca̱vi̱cce̱t ko̱, iróng azunne lo̱ti̱nno̱k wak Musesi do̱o̱k; abarik orong ol kettedit vi̱ca̱vi̱cce̱t, kar zin kodongit e̱le̱tti̱ kizeto ne annu ol ne̱ko̱ zoz cinne̱ng.

¹⁴ Imma ngatinanni, iróng anna kodongi ele gi̱i̱ye̱ emani, daiz ci Manyi Ye̱su̱ Ki̱ri̱sto̱ keete wa een ta̱la̱ke̱c do̱ niko ci ka̱gga̱. Eci zo̱ze̱ ci a̱da̱kne̱ enne keete wa een ta̱la̱ke̱c, iditai zin zoz ci irez zinin cinanne, kar bo̱do̱k zoz ci lo̱o̱tu̱ kiditai ngatinanni.

¹⁵ Icu zoz imma, ming etted e̱e̱ti̱ wucic vi̱ca̱vi̱ca̱ icima iróng ettedi, iróng ogon gi̱i̱ imma. Abarik zoz ci riili do̱o̱k icu, abunna ming anyak e̱e̱ti̱ baiz ci cuulai.

¹⁶ Anyik Ta̱mu̱ta̱dde̱n kanyik ol wak abahe zoz cinne de̱de̱ gano ki deten; e̱e̱ggi̱n nege olli Israilo cik cuulai Ta̱mu̱ta̱dde̱no̱.

¹⁷ I̱yo̱ko̱ zin, ma anyikku e̱e̱t imma kucunanna zo̱ze̱ necu, eci kanyaha bboroyyok eliye ci i̱ye̱la̱ ke̱e̱ni̱ anna e̱e̱t ci Ye̱su̱.

¹⁸ Gotonogga ki ngonogga tu̱we̱nta̱, anyik deten ci Manyitinna Ye̱su̱ Ki̱ri̱sto̱ ka̱vvu̱ baize icima vongize cunno̱ng. Nonno nenen, amin.