Evesos 6 - Tennet

Anyik dooli kiziyet zoz ci be̱e̱ti̱gge̱k ki e̱e̱ti̱gge̱k

¹ Niga dooli, o̱to̱ngo̱o̱ltte̱ be̱e̱ti̱ggo̱k ki e̱e̱ti̱ggo̱k zo̱ze̱ ci Manyi Ye̱su̱, eci ming ogonnu niko, abunna oroot.

² Een necu ti̱lo̱wi̱ne̱t wa een oo ki zoz ci u̱du̱ya̱i̱, icu: “To̱ngo̱o̱lle̱ yaatunne ki baatunne,

³ kar i̱nna̱ bak baiz ci abunna lo̱o̱ta̱ ngatu.”

⁴ Imma niga be̱e̱ti̱k doolinnu, ma ogonikku dooli kaal cik anyike nogo kutuburret nong. Abarik demez nogo go̱o̱le̱ ci azikne zoz ci Manyi ju̱rru̱m.

E̱e̱t ci een du̱ca̱i̱t ki manyi ce̱e̱z

⁵ Niga du̱cca̱ha̱, o̱to̱ngo̱o̱ltte̱ ddi̱ki̱ryyo̱k cuggo̱k lo̱o̱ta̱ ngatu. Abunna ming a̱li̱ngli̱nge̱kku̱ nogo zi̱nze̱tti̱nne̱ cik alali ki i̱yo̱ko̱ ming a̱li̱ngli̱nge̱kku̱ niga Ki̱ri̱sto̱ ko̱.

⁶ Ma a̱li̱ngli̱nge̱kku̱ nogo ming aavtte nege to do̱, abarik i̱li̱ngli̱nge̱t kiwagon du̱cca̱ha̱ cik Ki̱ri̱sto̱, u̱tu̱gu̱z li̱ngli̱ngo̱n ci Ta̱mu̱ta̱dde̱no̱ zi̱nze̱tti̱nne̱ cuggo̱k do̱o̱k.

⁷ I̱li̱ngli̱ngtte̱k nogo talninta ki i̱yo̱ko̱ ming a̱li̱ngli̱nge̱kku̱ niga Manyi Ye̱su̱ ko̱, ma i̱no̱nnu̱ a̱nnu̱ ne e̱e̱ggi̱n ne̱ko̱ ol cik diirik gaganiko.

⁸ Eci a̱gga̱yyu̱ niga, ming ogon e̱e̱ti̱ kaal cik abunna, okko atin Manyi amuc nonno kaale ne̱k abunna u̱tu̱gu̱ enne ke̱, ming een e̱e̱ti̱ nu̱nu̱n du̱ca̱i̱t icima iróng een du̱ca̱i̱t.

⁹ Imma niga lo̱ddi̱ki̱re̱ cik een ma̱ci̱gi̱ ce̱e̱zi̱, u̱tu̱gu̱zze̱k du̱cca̱k cuggo̱k kaal cik abunna. Ma a̱gi̱ddu̱ nogo li̱ngli̱ngo̱na̱ oroot. A̱gga̱c een Ye̱su̱ Manyi cunno̱ng okko bo̱do̱k een Manyi cinne̱ng wa aave ta̱mu̱-kenga. Iróng enne enger ol.

Abunna ol wak a̱tu̱we̱ ming ooro ki lo̱rye̱ni̱t

¹⁰ I̱yo̱ko̱ zin okkomit kak rumente ci arumenu niga ki Manyi doize wa a̱a̱nyu̱ng enne i̱ge̱ta̱.

¹¹ A̱gga̱mi̱t i̱be̱n cik Ta̱mu̱ta̱dde̱no̱ kar akatek zo̱o̱ lo̱o̱c kokkomit kak, oorto ki lo̱rye̱ni̱t wa een rumuzoit ci iróng niga a̱mi̱re̱nnu̱ ki vu̱rru̱t.

¹² Eci iróng naga kooro ki mo̱ddo̱ cik anyak e̱le̱tti̱ ki i̱yo̱ko̱ cik kanyak naga ko̱. Abarik kooro ki to̱ni̱a̱k cik lo̱rye̱nta̱k ki vongizzok waginnek gerzek abak zara. Abal nege lo̱o̱c necu, anyak doiz vatanine cigge̱k, abal nege lo̱o̱cco̱k ne̱ko̱ do̱o̱k ku̱ru̱m nginti engerone ta̱mu̱-keng ki lo̱o̱c.

¹³ I̱yo̱ko̱ zin, a̱gga̱mi̱t i̱be̱n cik Ta̱mu̱ta̱dde̱no̱ kar inimet illa ci lo̱rye̱nto̱ ming i̱ki̱ya̱ i̱i̱te̱ni̱ neci. Akatek zo̱o̱ lo̱o̱c, i̱li̱ngli̱nge̱t kaal cik a̱a̱nyu̱ng Ta̱mu̱ta̱dde̱n do̱o̱k, kar ommogit lo̱rye̱ni̱t.

¹⁴ Ibilet ju̱rru̱m, aanycik zoz ci Ta̱mu̱ta̱dde̱no̱ wa een de̱de̱ kize nyakadingo ci ecebju ke̱ngti̱. Aanycik baiz wanno̱ng abunna kize i̱li̱b cunno̱ng baiza.

¹⁵ Uwait kaviyak cik abunna Ta̱mu̱ta̱dde̱no̱ anyaha gano, aanycik ku̱tu̱gu̱zzo̱ ki caava cik aimnyu niga zoone.

¹⁶ Aanycik tu̱we̱ne̱t cunno̱ng ku̱tu̱gu̱ ki i̱li̱b kar atin eeltai e̱le̱tti̱ ilanyai cik lo̱rye̱nta̱k meelek giir.

¹⁷ A̱gga̱mi̱t ti̱ri̱ze̱ne̱t ci bali a̱ti̱ri̱zu̱ng Ta̱mu̱ta̱dde̱n ko̱ ju̱rru̱m, aanycik ti̱ri̱ze̱ne̱t neci ku̱tu̱gu̱ ki luluk ci ilau, imma illanya cuggo̱k oroonu ki lo̱rye̱ni̱t ko̱, aanycik kize zoz ci Ta̱mu̱ta̱dde̱no̱, kaviyak cik a̱vvu̱ Vongiza.

¹⁸ Ma abilizzu lawinet Ta̱mu̱ta̱dde̱n. U̱tu̱gu̱z kaal ne̱ko̱ do̱o̱k ngati alaweku gonoggu wak a̱tu̱we̱ Ta̱mu̱ta̱dde̱n odohize doize ci Vongiz cinne kar enne keelaung.

¹⁹ Alayeang gon annit bu̱k Ta̱mu̱ta̱dde̱n kar kaanya enne annit ku̱du̱wa̱ zo̱zzo̱k cik abunna gwo̱o̱nya̱ do̱o̱k ngati kozoze, kar kuwahek mazeta ol do̱o̱k ke̱ngti̱ cik kaviyak cik abunna Ta̱mu̱ta̱dde̱no̱ bali arrak a̱lu̱gnye̱ ke̱.

²⁰ Eci ke̱e̱ni̱ zin anna to̱na̱i̱t ci kar kuwahek ol kaviyak cik Ta̱mu̱ta̱dde̱no̱ abunna, ming kecebje nu̱nu̱n ko̱. Alayeang Ta̱mu̱ta̱dde̱n kar kuwahek ol zoz ci Ta̱mu̱ta̱dde̱no̱ mazeta labak.

Zawinet ci Pa̱u̱lo̱ vu̱rrto̱

^21-22 I̱yo̱ko̱ zin, ki̱tto̱na̱kku̱ng i̱ge̱t gotonet tu̱we̱nta̱ wa een zara Tychicos, e̱e̱t ci gon anime zinin cinne li̱ngli̱ngo̱n ci Manyi. Okko atin enne a̱du̱wa̱kku̱ng kaviyak cik li̱ngli̱ngo̱n cinanni, ki ol cik karumena ki annit nga̱to̱de̱ ko̱ do̱o̱k. Kar zin enne bu̱k ka̱a̱nyu̱ng i̱ge̱t okkomit tu̱we̱nta̱ zo̱ze̱ ci Ta̱mu̱ta̱dde̱no̱.

²³ Kala Ta̱mu̱ta̱dde̱n bai wa een Be̱e̱ti̱nna̱ ki Manyi Ye̱su̱ Ki̱ri̱sto̱, kaanyyet gano ki tu̱we̱ne̱t, ki rezinet gotonogget wak tu̱we̱nta̱k do̱o̱k.

²⁴ Anyik Ta̱mu̱ta̱dde̱n kanyik deten ol do̱o̱k wak irez Manyitinna Ye̱su̱ Ki̱ri̱sto̱ rezinte ci iróng a̱da̱i̱.