Evesos 5 - Tennet

¹ I̱yo̱ko̱ zin zo̱ze̱ ci e̱e̱ggi̱nnu̱ niga dooli cik Ta̱mu̱ta̱dde̱no̱ irezung enne ko̱, abunna zin ming i̱ye̱zu̱ nonno kaale cik abunna ogon enne.

² Abunna ming abakku baiz rezinta ki i̱yo̱ko̱ ming irezet Ki̱ri̱sto̱ ko̱, a̱kku̱ enne ta̱mu̱-kenga ki̱ki̱ya̱ kize wawac cinna ka̱da̱k zo̱ze̱ cinna, atalnet zin Ta̱mu̱ta̱dde̱n zo̱ze̱ cinne.

³ Ma oweku e̱le̱tti̱ ngoot kar ol kozozit zoz ci azi ne, e̱e̱ggi̱nnu̱ niga ol cik een a̱li̱ya̱k, icima ol cik gerzek, icima ol cik a̱ppi̱nte̱k zi̱nze̱tti̱ eci izetu niga ol cik Ta̱mu̱ta̱dde̱no̱.

⁴ Ma ngen a̱du̱wa̱nnu̱ zoz ci gerze ki zoz ci tarbali, zoz ci iróng agano ming kozozi, abarik ozozit zoz ci abunna ci anyikku Ta̱mu̱ta̱dde̱n zany.

⁵ Abunna ming a̱gga̱yyu̱ zoz ci een de̱de̱ icu, ming een e̱e̱ti̱ a̱li̱ya̱i̱t, icima a̱ppwa̱ zinin, iróng enne anyak ngin imma ba̱a̱li̱nte̱ ci Ki̱ri̱sto̱ ki ci Ta̱mu̱ta̱dde̱no̱. Ma zinin ci a̱ppwe̱ atubo ki e̱e̱t ci a̱di̱ngdi̱nga̱n to̱do̱yyo̱k cik orong zinin cinne kommog Ta̱mu̱ta̱dde̱n.

⁶ Ma anyikku e̱e̱t imma kalabaung zo̱ze̱ ci iróng een de̱de̱. Eci Ta̱mu̱ta̱dde̱n abure nong zo̱ze̱ ci een volong, a̱kku̱ de̱zi̱ne̱t ci Ta̱mu̱ta̱dde̱no̱ i̱i̱na̱k e̱e̱t ci iróng o̱ngo̱o̱le̱ nonno ming ozoz zoz ci iróng een de̱de̱.

⁷ Ma owowonu ki ol wak iróng a̱du̱wa̱ zoz ci een de̱de̱, iróng o̱ngo̱o̱le̱ Ta̱mu̱ta̱dde̱n.

⁸ Abakku gon ba̱li̱ye̱ niga mu̱hu̱ra̱, imma i̱yo̱ko̱ izetu ol cik abakku vooritena, eci i̱yo̱ko̱ izetu olli Manyi. Abait ki ol wak abak vooritena.

⁹ Eci baizi vooritena anyaha bunnat ki baiz ci abunna ki zoz ci een de̱de̱.

¹⁰ U̱tu̱gu̱z kaal cik aanyik Manyi katalo.

¹¹ E̱de̱yya̱ e̱le̱tti̱ kaale cik gerzek ogon ol wak abak mu̱hu̱ra̱, abarik i̱ye̱lta̱ kaal cik gerzek ko̱ vooriten ci Ta̱mu̱ta̱dde̱no̱.

¹² Imma kaala cik ogon ol mu̱hu̱ra̱ ko̱ anyaha a̱li̱ya̱n oroot, iróng wo̱ye̱ korong kozozit u̱tu̱ge̱tti̱ne̱.

¹³ Ma̱i̱je̱ atin vooriten ataran kaal ne̱k gerzek ke̱ do̱o̱k ki̱ye̱lta̱i̱ guulnya cigge̱k.

¹⁴ Eci vooriteni aanyik kaal do̱o̱k ki̱ye̱lta̱i̱. Zoz zin ci u̱du̱ya̱i̱ azi ne: “Tinga je̱e̱na̱ i̱nna̱ e̱e̱ti̱ ci adungi ko̱, tinga daiza, kar atin vooriten ci Ki̱ri̱sto̱ kataranin.”

¹⁵ Egenyyit zin oroot! Ma abakku ki i̱yo̱ko̱ ol wak tarbalik ko̱, abarik abait baiz ci ol wak egenyi.

¹⁶ Ming amudannu gool ci ogonnu kaal cik abunna, u̱tu̱gu̱z e̱co̱de̱ niko, eci i̱i̱nya̱ ne̱ko̱ izeto gerze.

¹⁷ Ma e̱e̱ggi̱nnu̱ tarbale, abarik a̱gga̱c kaal cik orong Manyi i̱ge̱t u̱tu̱gu̱z baize cunno̱ng.

¹⁸ Ma egerzannu e̱le̱tti̱ mertene, eci zoz necu okkoyyung go̱o̱le̱ ci gerze. Abarik aanycik Vongiz ci Ta̱mu̱ta̱dde̱no̱ ka̱vvu̱ zi̱nze̱tti̱nne̱ cuggo̱k.

¹⁹ Ming urumteu niga nga̱to̱de̱, e̱be̱nni̱t be̱ni̱nno̱k wak e̱he̱rye̱ warage ci Caliwono ki be̱ni̱nno̱k cik olli Manyi inatu nonno zi̱nze̱tti̱nne̱ cuggo̱k.

²⁰ Aanycik Ta̱mu̱ta̱dde̱n Be̱e̱ti̱nna̱ zany kaale do̱o̱k odohize zare cik Manyitinna Ye̱su̱ Ki̱ri̱sto̱.

²¹ Izikto zin niga do̱o̱k zo̱ze̱ ci o̱ngo̱o̱li̱nnu̱ Ki̱ri̱sto̱.

Ngaai ki macwa

²² Ngaai, iziyyet macwa cuggo̱k ki i̱yo̱ko̱ ming aziknnu niga Manyi Ki̱ri̱sto̱ ko̱.

²³ Eci e̱e̱ti̱ ci maci nonno ci abal ngaa cinne ki i̱yo̱ko̱ Ki̱ri̱sto̱ ming abal ol wak a̱tu̱ nonno ke̱le̱ci̱e̱ cinne ko̱, een enne Ti̱ri̱zo̱i̱t cinne̱ng.

²⁴ Anyik ngaa kizik zoz ci e̱e̱t cinne arrak oowa odohize, ki i̱yo̱ko̱ ol wak a̱tu̱we̱ ming aziye zoz ci Ki̱ri̱sto̱ arrak oowa odohize.

²⁵ Abunna e̱e̱ti̱ ci maci ming irez ngaa cinne ki i̱yo̱ko̱ ming irez Ki̱ri̱sto̱ ol wak a̱tu̱we̱ kar kanyik ele cinne kize wawac zo̱ze̱ cinne̱ng.

²⁶ Ogon enne zoz necu abunna nege ovvo e̱e̱ggi̱n ol cik abunna doize ci zoz cinne, idiman zin enne nogo kizeto ol cik a̱li̱le̱ ngati unye nogo maame.

²⁷ Ogon Ki̱ri̱sto̱ zoz necu kar atin ki̱di̱ngdi̱nga̱ni̱t ke̱le̱ci̱a̱ ci a̱li̱le̱ ko̱, ki̱zzi̱ rok gi̱i̱ imma ci anganye ol nonno to.

²⁸ Ogon zin bo̱do̱k niko, anyik e̱e̱t kirez ngaa cinne ki i̱yo̱ko̱ ming irez enne ele cinne manyi ko̱. Imma e̱e̱ti̱ ci irez ngaa cinne i̱ye̱la̱ de̱de̱ ming irez enne ele cinne.

²⁹ I̱llo̱i̱ zin e̱e̱t imma ci abure ele cinne manyi, abarik azunne ele cinne ju̱rru̱m, ki i̱yo̱ko̱ Ki̱ri̱sto̱ ming azunne ol wak a̱tu̱we̱,

³⁰ eci naga ol wak ka̱tu̱ Ki̱ri̱sto̱ ke̱e̱ggi̱n ol cik ele cinne.

³¹ Ki i̱yo̱ko̱ ming e̱he̱rye̱ Warage ci Ta̱mu̱ta̱dde̱no̱ ko̱: “Eci zo̱ze̱ necu, ungnek atin e̱e̱ti̱ ci maci baatinne ki yaatinne lo̱o̱c kar koot kurumet baiz ki ngaa cinne, kar ol ne̱k e̱e̱ggi̱n ram ko̱ kizeto ele co̱de̱.”

³² Een necu zoz ci okkomi ngati ka̱gga̱we̱, ozoz zoz ci Ki̱ri̱sto̱ ki ol wak a̱tu̱we̱.

³³ I̱yo̱ko̱ zin, i̱ya̱bzo̱ni̱ku̱ng abarik zoz necu i̱ge̱t e̱le̱tti̱, abunna e̱e̱ti̱ ming irez ngaa cinne ki i̱yo̱ko̱ ming irez enne ele cinne ko̱. Abunna bo̱do̱k ngaa ming aziye zoz ci e̱e̱t cinne ju̱rru̱m.