Evesos 4 - Tennet

U̱tu̱gu̱zzo̱ ol wak a̱tu̱we̱ ki ele co̱de̱ ngati Ki̱ri̱sto̱

¹ Eci kaale cik u̱tu̱gu̱we̱u̱ng Manyi Ye̱su̱, kecebje zin anna zo̱ze̱ ci ka̱li̱ngli̱ngo̱ni̱ke̱ nonno, kilalekkung zin anna i̱ge̱t abait baiz ci ol wak a̱tu̱we̱ balik atahalak Ta̱mu̱ta̱dde̱n ele cinne.

² Ma odongnyu e̱le̱tti̱ cuggo̱k, izet gunune. Aanycik zi̱nze̱tti̱ kalalit. Abait ki ol rezinta.

³ U̱tu̱gu̱z kaal do̱o̱k ju̱rru̱m kar Vongizi ci Ta̱mu̱ta̱dde̱no̱ ka̱a̱nyu̱ng zi̱nze̱tti̱ cik abakku nga̱to̱de̱. U̱tu̱gu̱z zoz necu ngati abakku labak.

⁴ E̱e̱ggi̱nnu̱ niga do̱o̱k ele co̱de̱. Anyakku niga do̱o̱k Vongiz co̱de̱ ṯok ci Ta̱mu̱ta̱dde̱no̱, ogon ki bali arikku niga zi̱nze̱tti̱ zoz co̱de̱ ṯok ci ovvo atin niga arubannu kaal wak u̱du̱wa̱ enne kize cunno̱ng ol balik atahala enne ke̱.

⁵ Anyakku niga Manyi co̱de̱ ṯok niko, ki tu̱we̱ne̱t co̱de̱, ki ba̱ti̱ti̱mo̱ co̱de̱.

⁶ Anyak Ta̱mu̱ta̱dde̱n co̱de̱ wa een Be̱e̱ti̱ ollu do̱o̱k. Abal enne kaal do̱o̱k, abarik a̱li̱ngli̱ng enne baize ci ol do̱o̱k.

⁷ Ma̱i̱je̱ Ki̱ri̱sto̱ engerek ol deten ci a̱li̱ngli̱nge̱ ngengene baize cinne.

⁸ Ki i̱yo̱ko̱ ming e̱he̱rye̱ Warage ci Ta̱mu̱ta̱dde̱no̱ azi ne: “Baling uk enne ta̱dde̱na̱, uwe ki ol cik meelek giir balik e̱ce̱bje̱ ke̱ kar kaanyik ol muci.”

⁹ Ma i̱yo̱ko̱ ming azi ne, “Uk enne ta̱mu̱-kenga.” Azi keng ci zoz necu ne aave da̱ Ki̱ri̱sto̱ lo̱o̱ta̱ ecito todowai.

¹⁰ Azi keng ci zoz necu ne, Ye̱su̱ bali ci okko todowai, nonno ci bo̱do̱k dee ci okko ta̱mu̱-kenga, ta̱dde̱na̱, kar enne kibbizitan ta̱mu̱-keng ki lo̱o̱c veelek.

¹¹ Ki̱ri̱sto̱ zin nenen ci aanyik ol u̱gge̱ kizeto to̱ni̱a̱k, ovvo uggak e̱e̱ggi̱n a̱ri̱tto̱k cik zoz ci Ta̱mu̱ta̱dde̱no̱, ovvo uggak e̱e̱ggi̱n ol wak eron ovvo uwahek ol kaviyak cik Ta̱mu̱ta̱dde̱no̱ i̱do̱ngi̱ne̱, ovvo uggak e̱e̱ggi̱n tuwayok cik zoz ci Ta̱mu̱ta̱dde̱no̱ ki de̱me̱zzo̱k,

¹² kar ol ciginnek ke̱de̱me̱zi̱t zoz ci a̱li̱ngli̱nge̱k nege Ta̱mu̱ta̱dde̱n kar ke̱le̱ci̱a̱ ci Ki̱ri̱sto̱ kanyak ol cik meelek.

¹³ Okko zoz necu zee ka̱vvu̱t naga kizet ol co̱de̱ tu̱we̱nte̱ ci ka̱tu̱we̱ Ta̱mu̱ta̱dde̱n ki gga̱wa̱ne̱t ci ka̱gga̱we̱ naga Ngerrti Ta̱mu̱ta̱dde̱no̱. Kar atin naga kegenyit ki i̱yo̱ko̱ Ki̱ri̱sto̱ ko̱, kogon zin atin naga ki enne.

¹⁴ Abunna kabiliz baiz ci kabahe ki i̱yo̱ko̱ dooli cikidik ko̱. Gerza ming kelemi ol cik volongak kecebtaet o̱o̱tti̱ de̱mzi̱nte̱ cinne̱ng volongo. Ogon ki ngooti ci odong kaal okkoye gon ngati okkoye ngooti.

¹⁵ Abarik gon ming kozoz zoz ci een de̱de̱ rezinta, aanyet ku̱du̱kta̱ zoz ci een de̱de̱. Kar zin naga kitilizet ju̱rru̱m ki i̱yo̱ko̱ Ki̱ri̱sto̱ ko̱, ming een oo

¹⁶ ci eliyo, Ki̱ri̱sto̱ zin ci a̱gga̱ ele do̱o̱k kar kaanyik ki̱li̱ngli̱nge̱t ju̱rru̱m, ngati ingane e̱e̱ti̱ kokkom eci enne anyak rezinet.

Baiz ci een jor ngati Ye̱su̱ Ki̱ri̱sto̱

¹⁷ Eci anna ke̱e̱ni̱ nuyait ci Manyi, ki̱lo̱tu̱ng oroot, ma ngen abakku ki ol wak iróng e̱e̱ggi̱n Ya̱u̱d a̱zze̱ o̱o̱tti̱ ki ol wak iróng a̱gga̱ Ta̱mu̱ta̱dde̱n.

¹⁸ Iditet ba̱ci̱no̱wa̱ nogo zi̱nze̱tti̱ ki̱zzi̱ ngatinne̱ng rok gool ci a̱gga̱we̱ Ta̱mu̱ta̱dde̱n. Engertta zin nege e̱le̱tti̱ cigge̱k rugete ci aanyik Ta̱mu̱ta̱dde̱n ol ko̱, eci odoi nogo zi̱nze̱tti̱ kak, kar kutuburret zoz wa een de̱de̱.

¹⁹ Iróng a̱li̱ya̱ni̱ ngen adak nogo, kar zin kaanycik e̱le̱tti̱ cigge̱k ku̱tu̱gu̱zzo̱ kaal cik gerzek. Ogon nege kaal cik gerzek do̱o̱k abarik ize baiz cinne̱ng.

²⁰ Abarik zin niga ngati Ki̱ri̱sto̱ ngen bali edemezit kaal cik ogon niko.

²¹ Iziktu niga zoz ci obod ki Ye̱su̱ ju̱rru̱m, edemeztu gool wainne de̱de̱.

²² Edemezung de̱me̱zzo̱wa̱ ba̱li̱ye̱ zoz cu, ibilizet baiz bali reeni ke̱ eci baizi bali reeni amin zi̱nze̱tti̱ ciggo̱k ke̱ ecebannung o̱o̱tti̱ kar kegerzan baiz cunno̱ng.

²³ Anyik Vongiz kutuhu gool ci i̱no̱nnu̱ niga kaal cik abunna,

²⁴ kar ka̱a̱nyu̱ng izet ol cik een jor. A̱ri̱ta̱nnu̱ng Ta̱mu̱ta̱dde̱n kar anyait bunnat ki baiz ci a̱li̱le̱ ming ogonnu ki enne zo̱ze̱ ci een de̱de̱.

Zo̱zzo̱k cik baiz ci een jor

²⁵ Imma zin baize ci een jor ko̱, ma ngen bo̱do̱k ovolongnyu, abunna gon ming a̱du̱wa̱k e̱e̱ti̱ gooni zoz ci een de̱de̱, eci naga do̱o̱k kurumte kizeto ele co̱de̱ ngati Ye̱su̱.

²⁶ “Imma ming ette aburnnu nong zo̱ze̱ emani, ma anyikku burnenet nong kuwuyung mu̱nye̱ne̱.” Ma ovvoyyu ungnyahe ming ngen aburnnu nong,

²⁷ eci burnenet nong aanyik lo̱rye̱ni̱t gool ci a̱li̱ngli̱nge̱ baize cunne.

²⁸ Anyik e̱e̱t ci bali gon een ogoryait kutungek ogor lo̱o̱c, abunna akane li̱ngli̱ngo̱n eliye cinne kar kumuda kaal cik orong enne go̱o̱le̱ ci abunna, kar gon enne kumuc ol u̱gge̱ bu̱k.

²⁹ Ma anyikku zoz ci gerze kiyowa u̱tu̱ge̱tti̱ne̱ cuggo̱k. U̱du̱kta̱ zoz ci een de̱de̱ go̱o̱le̱ ci abunna ngati ol cik azikne, kar eelta nogo zo̱ze̱ ci a̱du̱wa̱nnu̱ niga ko̱.

³⁰ Ma anyikku Vongiz ci A̱li̱le̱ Ta̱mu̱ta̱dde̱no̱ komoze, nonno ci a̱a̱nyu̱ng a̱gga̱c i̱i̱te̱n imma, ovvo atin niga abakku labak ki̱zze̱c mu̱nye̱na̱ ming okko Ye̱su̱ obodak lo̱o̱c.

³¹ Utungtek zoz ci avarace e̱e̱ti̱ kutubur nong oroot ko̱ lo̱o̱c. Utungtek gernyi ki burnenet nong ki dominet lo̱o̱c.

³² Abunna abarik ming irezonu niga do̱o̱k, abunna ming anyakku eezet zi̱nze̱tti̱nne̱, alaltek ol, ki i̱yo̱ko̱ ming alalnek Ta̱mu̱ta̱dde̱n ol zo̱ze̱ ci Ki̱ri̱sto̱ ko̱.