Buk wa To̱ni̱a̱u̱ 1 - Tennet

Odonge Ye̱su̱ uk ta̱mu̱-kenga

¹ Goona wa zinino Theophilos, okko buwe bali nanni ke̱, ketehera anna kaal balik akane Ye̱su̱ ke̱, ogon enne ki bo̱do̱k de̱mzi̱ne̱t cinne,

² rok i̱i̱te̱n bali odonge Ta̱mu̱ta̱dde̱n nonno okkoye ta̱mu̱-kenga ke̱. Aanyik zin enne ti̱lo̱wi̱ne̱t go̱o̱le̱ ci Vongiz ci A̱li̱le̱to̱ni̱a̱k balik atahala enne ke̱.

³ Imma bali vu̱rrta̱ ngati ippira enne ka̱da̱k ta̱la̱ke̱ca̱, i̱ye̱le̱k enne ele to̱ni̱a̱k ciginnek go̱o̱lo̱we̱ cik meelek giir kar zin nege kelemtta ming ngen enne aruge. I̱ye̱le̱k enne nogo ele cinne i̱i̱nya̱ moten we̱c kar kozoz zoz ci obod ki ba̱a̱li̱ne̱t ci Ta̱mu̱ta̱dde̱no̱.

⁴ I̱i̱te̱n imma, ngati adaine enne ki nogo, u̱du̱wa̱k enne nogo zoz cu, “Ma ungneku Jerusalem lo̱o̱c; abarik e̱re̱yya̱ muci bali u̱du̱wa̱ Baba ke̱, iziktu bali niga ming kozozi anna ke̱.

⁵ A̱gga̱me̱k Joni ol ba̱ti̱ti̱mo̱ maame, ma̱i̱je̱ i̱i̱nya̱we̱ cikidik a̱gga̱me̱kku̱ng atin Ta̱mu̱ta̱dde̱n ba̱ti̱ti̱mo̱ Vongize ci A̱li̱le̱.”

⁶ Ma baling urumte nuyaha nga̱to̱de̱, i̱jji̱nne̱t zin nege Ye̱su̱, izektek ne, “Manyi, okko atin i̱nna̱ e̱e̱ni̱ alaan cinna̱ng olli Israilo ki bali alaani Da̱vi̱de̱ ming abal lo̱o̱c ke̱?”

⁷ Iizek zin enne nogo ne, “Iróng een zoz cunno̱ng kar a̱gga̱c i̱i̱nya̱ icima i̱i̱te̱n ci arike Baba komize cinne.

⁸ Abarik atin niga arubannu komiz ming i̱ki̱ya̱u̱ng Vongizi ci A̱li̱le̱ i̱ge̱ta̱; kar atin niga izet bbacak cigannik Jerusalema, ki lo̱o̱ce̱ ci Ju̱de̱ya̱ ki Samariya do̱o̱k zee rok nginti aṯurneke looci.”

⁹ Baling u̱du̱wa̱ enne zoz cu, odonge zin Ye̱su̱ ngati acine nege uk ta̱mu̱-kenga, kar zin di̱i̱z ku̱bu̱ng nonno ci iróng nege ngen acin bu̱k.

¹⁰ Imma ngati ngen nege angamnik ta̱mu̱-keng niko, edenya abarik ataman niko ol cik e̱e̱ggi̱n rama aim ru̱u̱ma̱ni̱ cik voorik per abile abanyce cinne̱ng.

¹¹ Azi nege ne, “Ol cik Ga̱li̱li̱, abillu ette ngatu angamniku ta̱mu̱-keng nya? Ye̱su̱ cu ele, ci odonge ngatinno̱ng uk ta̱mu̱-kenga ko̱, okko atin oboda go̱o̱le̱ ci acinnu niga nonno ming okko ta̱mu̱-kenga ko̱.”

Atahalai Matthiasi karagiz Judas

¹² Baling i̱mi̱rrte̱ zin to̱ni̱a̱ha̱ cik Ye̱su̱ rok Jerusalem ngati a̱vvu̱nne̱ Biye ci I̱ngi̱ro̱u̱, ci aave ojonun ki Jerusalem, owo wo̱ye̱ e̱e̱ti̱ mail cidici.

¹³ Baling uzucca nege Jerusalem, oot ce̱e̱z ta̱dde̱na̱ ngin bali aavtte nege ke̱. E̱e̱ggi̱n ol ne̱ke̱ ciko Peturu, Jon, Je̱mi̱s, Andereya, Vilip, Tomas, Bartolomeyo, Ma̱te̱yo̱, Je̱mi̱s ngerrti Alipeyo, Si̱mo̱ne̱ wa amarine gaala wak Romi, ki Judas ngerrti Je̱mi̱si̱.

¹⁴ I̱vi̱ta̱ zin nege alayo do̱o̱k nga̱to̱de̱ ki ngaai ki Ma̱ri̱ya̱ e̱e̱ti̱ Ye̱su̱ ki gotonoggi bu̱k.

¹⁵ Imma bali i̱i̱nya̱we̱ ne̱ke̱, itinga Peturu je̱e̱na̱ orgene ci ol cik a̱tu̱we̱ ko̱. E̱e̱ggi̱n nege o̱bo̱n co̱de̱ ki moten rama (120).

¹⁶ Kar enne kize ne, “Gotonogga ki ngonogga tu̱we̱nta̱, akat zoz bali e̱he̱rye̱ Warage ci Ta̱mu̱ta̱dde̱no̱ ke̱ mo̱o̱le̱t, ci ozoz bali Vongizi ci A̱li̱le̱ go̱o̱le̱ ci Da̱vi̱de̱ bali reena zo̱ze̱ ci Judasi wa bali okko aanyik Ye̱su̱ kecebe,

¹⁷ een bali enne e̱e̱t cinna ci ka̱li̱ngli̱ng ki agit nga̱to̱de̱ ba̱li̱ye̱.”

¹⁸ Kar ki muci bali aruba Judasi go̱o̱le̱ ci gerze ke̱, ataltai zin ol ma̱na̱; kar zin enne ku̱yu̱we̱ keṯezante uluktena kiyokta re̱e̱nu̱n.

¹⁹ Iziyyet ol do̱o̱k Jerusalema zoz necu, a̱ka̱tte̱k ol ma̱na̱ neci kize Akeldama, azi keng cinne utuge cinne̱ng ne, Ma̱na̱ ci bi̱ye̱tu̱.

²⁰ Ize zin Peturu ne, “E̱he̱rye̱ buwe ci caliwono, azi ne, “‘Aanyik ngintinne ka̱vvu̱ ollin; ma anyike e̱e̱t imma kabak nginati,’ kar, “‘Anyik e̱e̱t imma wo̱ye̱ kuwe ngintinne kize ddi̱ki̱ryo̱i̱t.’

²¹ I̱yo̱ko̱ zin, abunna ming kahala naga e̱e̱t co̱de̱ ngati ol cik kaavtte ki agit i̱i̱nya̱we̱ balik kowoye naga ki Manyi Ye̱su̱ ke̱.

²² Akane ngati Jon ba̱ti̱ti̱mo̱ rok i̱i̱ bali odongine Ye̱su̱ okko ta̱dde̱na̱ ngati een agit ke̱. Een atin e̱e̱ti̱ co̱de̱ ki agit bbacait ci i̱i̱te̱n bali ingane Ye̱su̱ daiza ke̱.”

²³ Atahaltta zin arrak nege ol rama: Yosevo ci een zara Barsabbas een zara uggak bo̱do̱k Justus, kar bo̱do̱k e̱e̱t imma ci een zara Matthias.

²⁴ Kar zin nege kalayo, kizeto ne, “Manyi, a̱gga̱ i̱nna̱ zi̱nze̱tti̱ cik ollu do̱o̱k. Ngene olle cik een rama ko̱ ci atahala i̱nna̱,

²⁵ kar karagiz li̱ngli̱ngo̱n bali abure Judasi kar kuk ngati orong enne ke̱.”

²⁶ Baling ovvo nege ovoc bibi, i̱ta̱k bibicoci Matthias niko, kar zin enne karozik to̱ni̱a̱k balik e̱e̱ggi̱n omoto ki co̱de̱ ke̱.