3 Jon 1 - Tennet

¹ Ngati ddi̱ki̱ryo̱i̱t ci ke̱le̱ci̱o̱. Keherik anna waraga cu goona wa zinino een zara Gaius, kirezi anna nonno zo̱ze̱ wa een de̱de̱.

² Goona wa zinino, kalaweki anna i̱nne̱t Ta̱mu̱ta̱dde̱n abunna ming abai yahe kaale do̱o̱k, kar bo̱do̱k abunna ming abunna ele ju̱rru̱m ki bo̱do̱k vongiz cunne.

³ Katalne anna oroot baling i̱vi̱ta̱ gotonoggeti uggak rok annita kar kozozit tu̱we̱ne̱t cunno̱ng zo̱ze̱ wa een de̱de̱ ki bo̱do̱k gool ci aavtiyyu niga baize wa een de̱de̱ udut.

⁴ Een necu talninet ci a̱ddi̱ki̱re̱ ngatinanni oroot, ngati kazikne abak dooli cigannik zo̱ze̱ ci een de̱de̱.

⁵ Goona wa zinino, anyai i̱nna̱ tu̱we̱ne̱t oroot kaale cik ogonik i̱nna̱ gotonogget ko̱, ming e̱e̱ggi̱n nege nu̱nu̱n i̱do̱ngi̱.

⁶ U̱du̱kta̱k zin nege ol cik a̱tu̱we̱ ke̱le̱ci̱a̱ zoz ci obod ki rezinet cunne. Eelta nogo ming ovvo nege eroni ki ming a̱du̱wa̱ zoz ci Ta̱mu̱ta̱dde̱no̱.

⁷ A̱li̱ngli̱ng nege zo̱ze̱ ci Zar cik abunna ko̱, iróng zin nege elemi kaal cik anyaha ol cik iróng a̱tu̱we̱.

⁸ Imma zin naga ol wak ka̱tu̱ Ki̱ri̱sto̱ ko̱, korong ming kawak ce̱e̱zi̱ cigga̱c ol cik ogon ki nege, kar naga bu̱k kidongte ki nogo kizet ol cik ka̱li̱ngli̱ng zoz ci een de̱de̱.

⁹ Ketehereya ba̱li̱ye̱ anna waraga ol cik a̱tu̱we̱ ke̱le̱ci̱a̱, ma̱i̱je̱ e̱e̱ti̱ ci een Diotrephes ci orong kize ddi̱ki̱ryo̱i̱t cinne̱ng ko̱, iróng zin enne orong kizik zoz cinna.

¹⁰ Ming ki̱ki̱ya̱u̱ng, kokko atin kozozi zoz cinne, ovolong enne egerzan zar cigga̱c. Abarik abure kar kurumte ki gotonogget tu̱we̱nta̱, iróng orong kar kivata gotonogget. Ottok zin enne ol wak ogon niko ke̱le̱ci̱a̱.

¹¹ Goona wa zinino, ma uhu zoz ci mu̱nye̱nu̱ kize zoz ci abunna. Imma e̱e̱ti̱ ci ogon zoz ci abunna een enne e̱e̱t ci Ta̱mu̱ta̱dde̱no̱, imma e̱e̱ti̱ ci ogon mu̱nye̱n iróng enne a̱gga̱ Ta̱mu̱ta̱dde̱n.

¹² Ozoz ol do̱o̱k zoz ci abunna obod ki e̱e̱t ci een zara Demetrius, i̱ye̱la̱ zoz ci een de̱de̱ bu̱k bunnat cinne. Kozozi zin anna bu̱k zoz ci abunna zo̱ze̱ cinne, a̱gga̱yyu̱ niga zoz ci kozozi anna ko̱ een de̱de̱.

Zawinet ci vu̱rrto̱

¹³ Kanyai anna kaal cik meelek korongi ku̱du̱wa̱u̱ng, ma̱i̱je̱ ngatu iróng korongi keteherek waraga.

¹⁴ Abarik korongi ki̱vo̱nnu̱ng ataman, kar anna eliya kozozit ki i̱ge̱t do̱o̱k.

¹⁵ Anyik gano ka̱vvu̱ ngatinno̱ng, a̱ma̱yu̱kku̱ng atin Ta̱mu̱ta̱dde̱n. Izayung gonoggeti do̱o̱k. Izzac gonogget do̱o̱k co̱de̱ co̱de̱ zare.