2 Ti̱mo̱te̱yo̱ 4 - Tennet

¹ Kilaleki zare cik Ta̱mu̱ta̱dde̱no̱ ki Ye̱su̱ Ki̱ri̱sto̱ wa atin okko apak lo̱ki̱ko̱ cik ol wak ngen aruge ki wak a̱da̱i̱to̱ bu̱k, kar zin go̱o̱le̱ ci okko enne a̱kku̱ ki ba̱a̱li̱ne̱t cinne, ki̱lo̱ti̱ki̱ zoz cu:

² Uwahek ol zoz ci Ta̱mu̱ta̱dde̱no̱; abunna ming uwahek ol zoz ci Ta̱mu̱ta̱dde̱no̱ odohize, kar tu̱gu̱ra̱ o̱o̱tti̱ cik ollu, ti̱lo̱ ol ngati ogone kaal cik gerzek, kar gon zozek ol, demez nogo zinine ci voori.

³ A̱kku̱ i̱i̱te̱ni̱ ci iróng ol ngen orong kiziyet de̱mzi̱ne̱t ci abunna. Abarik aluta demezyak kizeto meele, orongit kar ku̱du̱kta̱k nogo kaal cik i̱i̱zo̱ iin cigge̱k.

⁴ Ungnek abarik atin zoz wa een de̱de̱ lo̱o̱c, kar zin koronggit kiziyet zoz ci iróng een de̱de̱.

⁵ Imma zin i̱nna̱ zuute ele cunne odohize. Niim piryanzet, li̱ngli̱ng li̱ngli̱ngo̱n ci uwahek ol zoz ci Ta̱mu̱ta̱dde̱no̱.

⁶ Imma i̱yo̱ko̱, i̱ki̱ya̱ i̱i̱te̱ni̱ ci ovvo ol otodongnya kize wawac. I̱ki̱ya̱ i̱i̱te̱ni̱ ci kungneke baiz cu lo̱o̱c, kokko ta̱mu̱-kenga.

⁷ Ku̱tu̱gu̱ gi̱i̱ ci abunna li̱ngli̱ngo̱nte̱ ci Ta̱mu̱ta̱dde̱no̱. Kedeca li̱ngli̱ngo̱n bali orong Ta̱mu̱ta̱dde̱n kar kidimanek nonno lo̱o̱ta̱ ngatu ke̱. Kuzute tu̱we̱ne̱t zo̱ze̱ cinne oroot.

⁸ I̱yo̱ko̱ kere gi̱i̱ ci okko Ta̱mu̱ta̱dde̱n aanya luluk ci abunna alaanzetu, eci anna kelemi zoz cinne. Aanya atin Manyi i̱i̱te̱ne̱ ci okko enne obodak lo̱o̱c, iróng enne anyak mu̱nye̱n, etted atin lo̱ki̱ko̱ labak. Iróng zin atin Manyi amuca annit do̱, amuc ol do̱o̱k wak irez nonno kar kerec i̱i̱te̱n ci okko enne obodane.

Orong Pa̱u̱lo̱ Ti̱mo̱te̱yo̱ ki̱vo̱n nonno

⁹ Ti̱mo̱te̱yo̱, korongi la̱du̱n i̱jja̱ rok ngintu ataman,

¹⁰ ma̱rri̱t e̱e̱ti̱ ci een zara Demasi irez kaal cik lo̱o̱tu̱, utungeya lo̱o̱c, kar ki̱mi̱re̱ kuk o̱rge̱ ci een Te̱se̱lo̱ni̱ka̱. Okko Cresceni lo̱o̱ce̱ ci een zara Ga̱la̱ti̱a̱, ma̱i̱je̱ Ti̱to̱ okko lo̱o̱ce̱ ci een zara Dalamatiya.

¹¹ Karumena i̱yo̱ko̱ ngatu ki Lu̱ka̱ do̱ niko. Ronga Marko kar zin orkortta bu̱k, kar ki̱li̱ngli̱ngo̱zi̱ya̱n.

¹² Ki̱tto̱na̱ Tychicos kuk o̱rge̱ ci een Ephesus.

¹³ Ming i̱ki̱ya̱ i̱nna̱, nyaha ki ru̱u̱m bali kungnek anna e̱e̱t wa een zara Carpus o̱rge̱ ci een Troas ke̱, ki waraganya wagannik bu̱k, ommogje waraganya wak e̱he̱rye̱ ru̱ce̱ne̱.

¹⁴ U̱tu̱gu̱we̱ya̱ bo̱do̱k Alizanduru wa gon u̱u̱rte̱ ko̱ kaal cik gerzek oroot. A̱ru̱k atin Manyi nga̱bo̱lo̱ cinanni do̱ niko.

¹⁵ Zuute ele cunne, eci enne adang zoz ci kuwaheka ol ko̱ oroot.

¹⁶ Imma i̱i̱te̱ne̱ bali kozoza lo̱ki̱ko̱ ke̱, kozozi zoz cinanni do̱, odoteya ol do̱o̱k annit lo̱o̱c, i̱llo̱i̱ e̱e̱t ci eelanna zoza. Anyik Manyi kalalek nogo.

¹⁷ Abarik wazin neci, uzuta Manyi kar zin kaanya komiz ci kuwaheke ol kaviyak ciginnek ju̱rru̱m, kar ol wak iróng een Ya̱u̱d do̱o̱k kiziyet. Eelawa zin Ye̱su̱ daiza.

¹⁸ Ka̱gga̱ niko ming eelanna atin Manyi kaale wak gerzek do̱o̱k, kar kuwuya ngati ba̱a̱li̱ne̱t ci ta̱mu̱-kengo. Abunna abarik ming ka̱di̱ngdi̱nga̱n nonno niko udut. Nonno nenen.

Izza Pa̱u̱lo̱ ol do̱o̱k

¹⁹ Kiza ngaa ci Priscilla ki mac wainne een Akuila ki ol wak tatug ci Onesiphorusi do̱o̱k.

²⁰ Erahek e̱e̱ti̱ ci een zara Erastusi o̱rge̱ wa een Ko̱ri̱nto̱, kutungeya Trophimos orog wa een Miletus, omori.

²¹ Abunna la̱du̱n ming a̱kku̱nni̱ ataman, ming ngen ki̱ki̱ya̱ tagiz. Izayi ciko Ebulosi ki Pudenis ki Linus ki Kaludia ki gotonogget wak a̱tu̱we̱ do̱o̱k.

²² Anyik Manyi ka̱vvu̱ baize icima vongize cunne, anyik Manyi kaanyi deten.