2 Ti̱mo̱te̱yo̱ 3 - Tennet

Ize ojontte i̱i̱nya̱ cik obodane Ye̱su̱

¹ Imma i̱yo̱ko̱, abunna zin ming aziknnu zoz cu ju̱rru̱m: Ming izeto ojontte i̱i̱nya̱ cik obodane Ye̱su̱, i̱i̱na̱k atin kaala cik gerzek lo̱o̱c.

² Orong atin ol kaal do̱o̱k kizeto cigge̱k, kar bo̱do̱k kirezit o̱ro̱bi̱ya̱, a̱ppi̱k atin ol e̱le̱tti̱, odom ol e̱le̱tti̱ oroot, ogon kaal cik gerzek i̱ba̱ti̱ne̱, iróng ol ngen o̱ngo̱o̱le̱ be̱e̱ti̱gge̱k ki e̱e̱ti̱gge̱k. Iróng anyik ol zany icima o̱ngo̱o̱le̱ Ta̱mu̱ta̱dde̱n, abak baiz ci gerze.

³ Iróng irez ol, iróng alalnek e̱e̱t imma, anyak volong, iróng anyak urutoit zoza, anyak mootiz. Amarine zoz ci een de̱de̱.

⁴ Ovolonge atin nege gonoggi, kar zin ku̱tu̱gu̱zzo̱ kaal cik e̱e̱ggi̱n darace, odong e̱le̱tti̱. Irez kaal cik lo̱o̱tu̱, abarik uunge Ta̱mu̱ta̱dde̱n.

⁵ Ogon e̱le̱tti̱ ki cik e̱e̱ggi̱n ol cik Ta̱mu̱ta̱dde̱no̱, ma̱i̱je̱ ngatu amikzene komiz ci Ta̱mu̱ta̱dde̱no̱ baize cinne̱ng. Ma orkoryyu ki ol cik ogon ki i̱yo̱ko̱.

⁶ Anyak olle ne̱ke̱ u̱gge̱ cik ovvo ce̱e̱zi̱nne̱ cik ngaai wak amuje o̱o̱tti̱ kar ki̱mi̱cce̱ nogo, a̱i̱c ngaai ne̱ke̱ mu̱nye̱na̱, kar koronggit kaal cik gerzek irez zi̱nze̱tti̱ cigge̱k,

⁷ edemez ol ngaai ne̱ko̱ odohize ma̱i̱je̱ ngatu iróng a̱gga̱m zoz ci een de̱de̱.

⁸ Abure ol ne̱ko̱ zoz ci Ta̱mu̱ta̱dde̱no̱ ki bali ming abure ol cik e̱e̱ggi̱n zara Jannes ki Jambares zoz ci Musesi ke̱. A̱ma̱li̱ltte̱ o̱o̱tti̱ cigge̱k, utuburet tu̱we̱ne̱t wa een de̱de̱.

⁹ Iróng zin atin zoz cinne̱ng okko u̱u̱mu̱c. A̱gga̱ atin ol do̱o̱k a̱li̱ya̱kze̱t cinne̱ng ke̱ ki bali ming a̱gga̱ ol zoz ciko Yanes ki Yambares.

I̱lo̱t Pa̱u̱lo̱ Ti̱mo̱te̱yo̱

¹⁰ I̱yo̱ko̱, Ti̱mo̱te̱yo̱, a̱gga̱ i̱nna̱ de̱mzi̱ne̱t cinanni oroot, gool ci kowowene ki ol, ki gi̱i̱ ci korongi anna baize cinanni, ki tu̱we̱ne̱t cinanni ci ka̱tu̱we̱ Ta̱mu̱ta̱dde̱n, ki zinin ci alali, ki gool ci kireze ol, ki baiz ci kanime no̱ngi̱tto̱n.

¹¹ A̱gga̱ bo̱do̱k i̱nna̱ gi̱de̱ne̱t wa a̱gi̱dda̱ ol o̱ro̱gjo̱we̱ cik een Antiyok, ki Iconium ki Lystra. Kinima gi̱de̱ne̱t neci kar Manyi keelawa no̱ngi̱tto̱ne̱ ne̱ke̱ do̱o̱k.

¹² De̱de̱, ming aanyik e̱e̱ti̱ zinin Ta̱mu̱ta̱dde̱n ngati Ye̱su̱ Ki̱ri̱sto̱, abarik a̱gi̱d atin ol nonno.

¹³ Ma̱i̱je̱ ol wak gerzek ki ol wak een volongnyok, gerza atin zoz cinne̱ng oroot, ovolongek ol kar bo̱do̱k ol kovolongttek nogo.

¹⁴ Ma̱i̱je̱ ngatunne Ti̱mo̱te̱yo̱, medak de̱mzi̱ne̱t ba̱li̱ye̱ ju̱rru̱m, kar bil tu̱we̱nta̱ ju̱rru̱m, abunna ming a̱gga̱ ngene ci edemezin.

¹⁵ A̱gga̱ ri̱t i̱nna̱ Waraga ci Ta̱mu̱ta̱dde̱no̱ baling ngen e̱e̱ni̱ idica. Aanyi zoz cinne genyiz ki ti̱ri̱ze̱ne̱t go̱o̱le̱ ci a̱tu̱we̱ Ye̱su̱ Ki̱ri̱sto̱ kar ruba baiz wa aave udut.

¹⁶ A̱kku̱ Waraga ci Ta̱mu̱ta̱dde̱no̱ do̱o̱k Vongize ci Ta̱mu̱ta̱dde̱no̱, kar ke̱de̱me̱zi̱t zoz wa een de̱de̱, ci amad ol zo̱ze̱ ci mu̱nye̱nu̱, ki dimaninet zoz ci abaci, kar kedemez bunnat ci kabahe ju̱rru̱m,

¹⁷ kar zin e̱e̱ti̱ ci a̱li̱ngli̱nge̱k Ta̱mu̱ta̱dde̱n kuruba arizet ci ogone kaal cik abunna.