2 Ti̱mo̱te̱yo̱ 1 - Tennet

¹ Annit Pa̱u̱lo̱ ci keheri waraga cu, ke̱e̱ni̱ to̱ni̱a̱t ci Ye̱su̱ Ki̱ri̱sto̱ wa bali atahalai. Orongnya Ta̱mu̱ta̱dde̱n kar kuwahek ol ruget wa bali u̱du̱wa̱ enne ize ne, kamuda atin ngati karumzene ki Ye̱su̱ ke̱.

² Keherike waraga cu Ti̱mo̱te̱yo̱ wa kirezi ko̱, u̱tu̱gu̱ enne ki ngeranni tu̱we̱nta̱. Kala anna Ta̱mu̱ta̱dde̱n Be̱e̱ti̱nna̱ ki Manyitinna Ye̱su̱ Ki̱ri̱sto̱, kar kaanyci deten ki bunnat ki a̱vvu̱ze̱t yahe.

Irez Pa̱u̱lo̱ Ti̱mo̱te̱yo̱

³ Kanyik zany Ta̱mu̱ta̱dde̱n wa ka̱li̱ngli̱nge̱k anna ko̱ zinine ci voori ki baling ogon ji̱ji̱ti̱ga̱nni̱k bu̱k. Kala gon Ta̱mu̱ta̱dde̱n tu̱p kaal ngati ka̱a̱da̱ni̱n.

⁴ Ka̱a̱da̱ gon u̱lu̱wa̱ bali a̱lu̱we̱ ngati kengerone ke̱, kazi gon ne aanya wo̱ye̱ bo̱do̱k kurumto kar katalto oroot.

⁵ Ka̱a̱da̱ tu̱we̱ne̱t wanunne okkomi, ki tu̱we̱ne̱t wa ya̱ngtu̱nne̱ Loyiz, ki tu̱we̱ne̱t wa yaatunne Yuniz, ka̱gga̱wa̱ niko aanyi i̱nna̱ bu̱k tu̱we̱ne̱t neci.

⁶ Imma zin zo̱ze̱ necu, anyik ele kezezek ngati a̱li̱ngli̱nge̱ zo̱ze̱ ci Ta̱mu̱ta̱dde̱no̱ ju̱rru̱m ki bali katadeki azzin kalaweki Manyi ke̱.

⁷ Ma̱rri̱t Ta̱mu̱ta̱dde̱n iróng aanyyet vongiz ci dalanzetinu, aanyyet vongiz ci kokkomne ki ci kirezone ki ci kazunne e̱le̱tti̱.

⁸ Ma zin anyike a̱li̱ya̱n kadayin ngati uwaheke ol zoz ci Manyi, icima a̱gga̱mnyi̱ a̱li̱ya̱ni̱ ngatinanni bali kecebine anna zo̱ze̱ cinne. Abarik nyak komiz ci aanyi Ta̱mu̱ta̱dde̱n ko̱, kar i̱jja̱ kipirta nga̱to̱de̱ ngati kuwahek ol kaviyak cik abunna.

⁹ Eelawet Ta̱mu̱ta̱dde̱n kar zin katahalait kizet ol ciginnek A̱li̱le̱, iróng ahalanet gi̱i̱ye̱ ci da̱ abunna kogon naga, abarik idiman da̱ Manyi eci abunna enne la̱du̱n. Baling ngen keteehenye looci, i̱no̱n Ta̱mu̱ta̱dde̱n kar atin kaanyyet eezet go̱o̱le̱ ci atin i̱tto̱na̱kke̱t Ye̱su̱ Ki̱ri̱sto̱ wa atahalai.

¹⁰ Kar i̱yo̱ko̱, i̱ye̱le̱i̱t zin Ta̱mu̱ta̱dde̱n bunnat cinne ngati aanyyet Ti̱ri̱zo̱i̱t cinna Ye̱su̱ Ki̱ri̱sto̱, kar kommog daiz, kar kanyaha ruget wa aave udut, kamuda go̱o̱le̱ ci kazikne kaviyak cik abunna.

¹¹ Atahala Ta̱mu̱ta̱dde̱n kize to̱ni̱a̱t ci Ye̱su̱ kar kuwahek ol kaviyak cik abunna, kar bo̱do̱k kize de̱me̱zo̱i̱t ci zoz neci.

¹² I̱yo̱ko̱ a̱gi̱dda̱ ol zo̱ze̱ necu, iróng kanyai a̱li̱ya̱n, ma̱rri̱t ming ka̱tu̱ Ye̱su̱ wa atahalai. Ka̱gga̱ niko ming kazunne li̱ngli̱ngo̱n cinne bali aanya ke̱ zee ki̱ki̱ya̱ i̱i̱te̱ni̱ ci atin okko enne obodane.

¹³ Gga̱m zo̱zo̱nno̱k balik een de̱de̱ iziyu ngatinanni ke̱, nyak tu̱we̱ne̱t ki rezinet ngati Ye̱su̱ Ki̱ri̱sto̱.

¹⁴ Zuute kaviyak cik abunna aanyi Vongizi ci A̱li̱le̱, wa abak ngatinna.

¹⁵ A̱gga̱ ri̱t i̱nna̱ niko utungteya ol balik lo̱o̱ce̱ ci een zara Asia ke̱ lo̱o̱c, owoye ciko Phygelus ki Hermogenes.

¹⁶ Anyik Manyi ka̱mu̱yu̱k ce̱e̱z ci Onesiphorus, ma̱rri̱t ba̱li̱ye̱ ozozikan, iróng enne anyak a̱li̱ya̱n zo̱ze̱ ci kecebine anna lagama ko̱.

¹⁷ Baling okko enne arawa lo̱o̱c ci een Roma, orongnye zee bak arubanan.

¹⁸ Anyik Manyi bai ka̱mu̱yu̱k Onesiphorus kar kuruba eezet ming okko Manyi Ye̱su̱ obodak lo̱o̱c. A̱gga̱ ri̱t i̱nna̱ bu̱k eelawa enne go̱o̱lo̱we̱ cik meelek lo̱o̱ce̱ ci Ephesusi.