2 Te̱se̱lo̱ni̱ka̱ 3 - Tennet

Alayettu Ta̱mu̱ta̱dde̱n

¹ Gotonogga wak tu̱we̱nto̱, korongnyung alayettu Ta̱mu̱ta̱dde̱n kar kanyik zoz wa Manyi kuzuca ol u̱gge̱ ataman, ki baling azucanung kar o̱to̱ngo̱o̱ltte̱ zoz cinne ke̱.

² Alayettu Ta̱mu̱ta̱dde̱n kaanyyet kizetta reene olle wak gerzek iróng abak baiz ci abunna. Orong zin enne de̱de̱ ol cik meelek a̱tu̱we̱.

³ Ma̱i̱je̱ Manyi abunna, ka̱gga̱yya̱ niko ming a̱a̱nyu̱ng komiz kar zin bo̱do̱k kebeung ngati lo̱rye̱nto̱.

⁴ Ka̱gga̱yya̱ niko ming ebekkung Manyi, u̱zu̱tte̱ kaal balik kedemezung ke̱ ju̱rru̱m.

⁵ Kala Manyi ka̱a̱nyu̱ng kar a̱gga̱c rezinet ol ki Ta̱mu̱ta̱dde̱n, kar zin bo̱do̱k kalaltung zi̱nze̱tti̱ ki nimenet zoz ci Ki̱ri̱sto̱.

Gerza gu̱u̱rze̱t

⁶ Gotonogga ki ngonogga tu̱we̱nta̱, ka̱du̱wa̱kku̱ng zare cik Manyitinna Ye̱su̱ Ki̱ri̱sto̱, e̱de̱yya̱ e̱le̱tti̱ ngati gotonogget wak a̱tu̱we̱ imma ngatu iróng a̱li̱ngli̱ngi̱. A̱gga̱mi̱t zoz wa li̱ngli̱ngo̱nto̱ bali ki̱lo̱ti̱ku̱ng ke̱ ju̱rru̱m.

⁷ Abunna ming a̱li̱ngli̱ngnyu̱ ki bali gon naga ke̱. Iróng ba̱li̱ye̱ naga ke̱e̱ggi̱nna̱ gu̱u̱rwa̱, baling kaavtte bu̱k ke̱.

⁸ Iróng ba̱li̱ye̱ kadaka da̱i̱ne̱t cik e̱e̱t imma ollin. Iróng ba̱li̱ye̱ korongnyya kuluteung kaal do̱o̱k kar a̱gga̱mte̱ttu̱. Ka̱li̱ngli̱ngnya̱ ba̱li̱ye̱ wazin ki ba̱a̱li̱n oroot.

⁹ Kaburnna wo̱ye̱ da̱ naga li̱ngli̱ngo̱n kar ka̱vvu̱tta̱ gaganiko, korongnyya zin ba̱li̱ye̱ ki̱ye̱ltte̱u̱ng baiz ci abahe ol wak a̱tu̱we̱. U̱tu̱gu̱z ki naga ko̱.

¹⁰ Ku̱du̱ktta̱u̱ng ri̱t ba̱li̱ye̱ kizeung ne, “Ming aave e̱e̱ti̱ ci a̱tu̱we̱ abure li̱ngli̱ngo̱n to, ujurtak nonno da̱i̱ne̱t.”

¹¹ Ka̱du̱wa̱kku̱ng zoz necu ma̱rri̱t ming kazikna azi ne, aavtte ol uggak orgene cunno̱ng ollin iróng a̱li̱ngli̱ng, eceba o̱o̱tti̱ kaale cik ogon ol uggak.

¹² Ki̱lo̱tta̱ zin naga ol cik ogon niko zare cik Manyi Ye̱su̱ Ki̱ri̱sto̱ abunna ming akannek zo̱o̱ lo̱o̱c kar ki̱li̱ngli̱nge̱t da̱i̱ne̱t cik adak nege.

¹³ Gonogga wak zinino, ma apirnannu zo̱ze̱ ci ogonnu kaal cik abunna.

¹⁴ U̱zu̱tte̱ e̱e̱t ci abure zoz ci keherakkung naga ko̱ ju̱rru̱m. E̱de̱yya̱ e̱le̱tti̱ ngatinne kar kadak a̱li̱ya̱ni̱ nonno.

¹⁵ Ma zin anyikku ku̱tu̱gu̱zzo̱ ki mo̱ddo̱, abarik i̱ti̱lo̱zzo̱ ki ming i̱lo̱ttu̱ ol u̱gge̱ ko̱.

Lawinet ci Pa̱u̱lo̱ vu̱rrto̱

¹⁶ I̱yo̱ko̱ zin, kala zin Manyi wa anyaha gano, ka̱a̱nyu̱ng gano odohize go̱o̱lo̱we̱ do̱o̱k.

¹⁷ Keheri zin anna Pa̱u̱lo̱ a̱tte̱ cinanni kiwagon ko̱, ci anyak baayenit waraganyai cigannik do̱o̱k.

¹⁸ Kala Manyitinna Ye̱su̱ Ki̱ri̱sto̱ ka̱a̱nyu̱ng deten i̱ge̱t do̱o̱k.