2 Peturu 2 - Tennet

A̱ri̱tto̱k ki de̱me̱zzo̱k wak volongak

¹ Anyak ba̱li̱ye̱ a̱ri̱tto̱k cik volongak orgene ci olli Israilo. A̱vvu̱na̱kku̱ng atin bo̱do̱k de̱me̱zzo̱wa̱ wak volongak kar ku̱du̱ktta̱u̱ng zoz ci volongo. Edemezek atin nege ol de̱mzi̱ne̱t ci gerze lo̱mu̱k. Iróng de̱me̱zzo̱wa̱ ne̱ko̱ elemi zoz ci Manyi wa a̱ti̱ri̱z nogo mu̱nye̱ne̱, egerzan atin zoz neci e̱le̱tti̱ cigge̱k.

² Annu atin ol cik meelek gool ci mu̱nye̱nu̱ kar kaanycik ol u̱gge̱ kozozit gerzet zo̱ze̱ ci een de̱de̱.

³ Anyak atin ol ne̱ke̱ zi̱nze̱tti̱ cik a̱ppi̱nte̱k kaale, ozoziku̱ng u̱tu̱ge̱tti̱ne̱ cik emede. Ettedik Ta̱mu̱ta̱dde̱n nogo lo̱ki̱ko̱ zo̱ze̱ necu, iróng zin enne adunge.

⁴ Iróng Ta̱mu̱ta̱dde̱n alalnek anjilonya balik ogon mu̱nye̱n ke̱, abarik a̱ju̱ke̱k nogo koot ngati mu̱u̱hu̱ri̱ gwo̱o̱ya̱ ki̱ki̱ya̱ i̱i̱te̱ni̱ ci lo̱ki̱ko̱.

⁵ Imma e̱rki̱te̱ bali ngen Nowa aruge ke̱, iróng Ta̱mu̱ta̱dde̱n alalnek olli lo̱o̱tu̱ mu̱nye̱nu̱. I̱li̱b zin enne nogo tawana, eela zin enne ol turgerem ki Nowa wa bali uwahek ol zoz ci abunna.

⁶ Edez Ta̱mu̱ta̱dde̱n o̱ro̱gjo̱k cik Sodomi ki Gomorrah, utuz kize bbu̱u̱r, kar ki̱ye̱le̱k ol gool ci ovvo atin ol wak iróng elemi Ta̱mu̱ta̱dde̱n atuze niko bu̱k.

⁷ Eela zin bali Ta̱mu̱ta̱dde̱n Lot, e̱e̱t ci bali abak baiz ci emede ngu̱me̱ ci Ta̱mu̱ta̱dde̱no̱, u̱la̱l zin nonno baizi ci abahe olli mu̱nye̱nu̱ wak abak bu̱k ko̱.

⁸ Een enne ba̱li̱ye̱ e̱e̱t ci abunna, amuda enne piryanzet zo̱ze̱ ci mu̱nye̱n cik acin kar bo̱do̱k kizik odohize.

⁹ Ming een zoz necu de̱de̱, a̱gga̱ Manyi gool ci eelanne enne ol wak a̱tu̱ nonno, ngati amudanne nege no̱ngi̱tto̱n kar ka̱gga̱m olli mu̱nye̱nu̱ kar kedez nogo, ere ki̱ki̱ya̱ i̱i̱te̱ni̱ ci ettede enne lo̱ki̱ko̱.

¹⁰ Edez atin Ta̱mu̱ta̱dde̱n oroot ol wak i̱no̱n kaal cik gerzek ki wak ibbeze nege alaanzet ci alaatu. Odong ol ne̱ko̱ e̱le̱tti̱ kar kozozit mootiza, iróng nege o̱ngo̱o̱le̱ ngati otore kaal cik aavtte ta̱mu̱-kenga.

¹¹ Ma̱i̱je̱ anjilonya cik Ta̱mu̱ta̱dde̱no̱ anyak komiz oroot kommogit ol cik diirik ko̱, iróng odom kaal cik aruge ko̱ ngu̱me̱ ci Manyi.

¹² Imma ol ne̱ko̱ iróng a̱gga̱ gerziten cinne̱ng. Ogon nege ki i̱yo̱ko̱ elegje wak zarak iróng ozozi, a̱rri̱ta̱i̱ nege kize kaal cik a̱ru̱we̱ ka̱da̱i̱to̱. Ozoz zoz ci mu̱nye̱nu̱ ci iróng nege a̱gga̱. Egerzan atin nogo zoz ci gerze ogon nege ko̱.

¹³ A̱ru̱k atin Ta̱mu̱ta̱dde̱n nga̱bo̱lo̱, edez nogo mu̱nye̱ne̱ cik u̱tu̱gu̱zzo̱ nege. Abarik nege i̱no̱n azi ne, kadak kwo̱o̱r kar ku̱tu̱gu̱z kaal cik gerzek een gi̱i̱ ci abunna ngatinne̱ng.

¹⁴ I̱no̱n nege zoz ci gerze orongit kimice ngaai, ovvo ngaai orong ol cik macik. Orong ku̱lu̱ta̱ ol cik amuje o̱o̱tti̱. Abbize zi̱nze̱tti̱ cigge̱k gerziten do̱ niko.

¹⁵ Utungtek gool ci baizo okko ṯop ko̱ lo̱o̱c, kar kunuwet gool ci a̱ri̱to̱i̱t ci een zara Balaam ngerrti Beor, irez gon enne kaal cik gerzek.

¹⁶ Aanyik zin Ta̱mu̱ta̱dde̱n zi̱gi̱r ki̱ti̱lo̱ nonno zo̱ze̱ ci mu̱nye̱n balik u̱tu̱gu̱ enne ke̱. Ozozek zi̱gi̱ri̱ nonno muluwe ci e̱e̱t ci diiri kar enne kutungek kaal cik gerzek ogon enne ke̱ lo̱o̱c.

¹⁷ Ogon zin ol ne̱ko̱ ki i̱yo̱ko̱ ta̱mu̱ ci iróng aṯile, i̱ti̱k ngooti di̱i̱z veelek. Ere nginti mu̱u̱hu̱ri̱ lo̱rye̱nto̱ nogo.

¹⁸ Odong nege e̱le̱tti̱ gaganiko, ozoz zoz ci ilabane ol wak amuje o̱o̱tti̱ orong kaal cik lo̱rye̱nta̱k.

¹⁹ A̱nne̱k nege ol ne, aavtiyyu atin labak, imma nege e̱e̱ggi̱n du̱cca̱k cik baiz ci gerze, eci ol cik diirik e̱e̱ggi̱n du̱cca̱k cik kaal wak uuta nogo o̱o̱tti̱.

²⁰ Ming elemtta zoz ci Manyitinna Ti̱ri̱zo̱i̱t Ye̱su̱ Ki̱ri̱sto̱, ijarit nege kaal cik gerzek lo̱o̱ce̱ cu. Abarik ngen nege bo̱do̱k a̱gga̱mo̱ ki kaal cik gerzek lo̱o̱ce̱ cu, a̱vvu̱to̱ zin i̱yo̱ko̱ nege gerzet kommog baiz bali o̱o̱wu̱ ke̱.

²¹ Abunna zin weda ming iróng nege a̱gga̱ gool ci abunna. Ming nu̱nu̱n ovvo nege a̱gga̱ gool ci abunna vu̱rrta̱, utuhuyek nege bo̱i̱ci̱ ti̱lo̱wi̱ne̱t ci a̱li̱le̱ bali aanyozik nogo ke̱.

²² Nya ci i̱i̱na̱k nogo ko̱ ogon ki zoz ci een de̱de̱, “Obodak atin uruz tazak ciginnek,” kar “Okko baatai ci utunye okko a̱mi̱ro̱ni̱k roboboc.”