2 Peturu 1 - Tennet

¹ Annita Si̱mo̱ne̱ Peturu wa ke̱e̱ni̱ du̱ca̱i̱t ki to̱ni̱a̱t ci Ye̱su̱ Ki̱ri̱sto̱. Keherakkung waraga necu i̱ge̱t ol wak anyakku tu̱we̱ne̱t ci okkomi ki i̱yo̱ko̱ naga ko̱ ngati Ta̱mu̱ta̱dde̱n cinna ki Ti̱ri̱zo̱i̱t Ye̱su̱ Ki̱ri̱sto̱, ogon atin enne kaal cik abunna.

² Kala anna Ta̱mu̱ta̱dde̱n bai kar ka̱a̱nyu̱ng deten ci a̱ppwe̱ ki gano baize cunno̱ng ngati a̱gga̱yyu̱ zoz ci Ta̱mu̱ta̱dde̱no̱ ki ci Manyitinna Ye̱su̱ Ki̱ri̱sto̱.

Gool ci abahe ol wak a̱tu̱we̱

³ Aanyyet komizi ci Ta̱mu̱ta̱dde̱no̱ agit kaal do̱o̱k wak korong naga baize cinna, abunna kaanyik Ta̱mu̱ta̱dde̱n katalo ngatinna, baling kiziyet naga awuyet di̱ngdi̱ngo̱nte̱ cinne kar kozolit bunnat cinne.

⁴ Imma zin go̱o̱le̱ necu aanyyet enne agit kaal cik abunna riilik oroot, balik u̱du̱wa̱ enne kar kaanyyet ke̱ do̱o̱k. Ma zin kaale ne̱ko̱ a̱a̱nyu̱ng e̱de̱yya̱ e̱le̱tti̱ kaale wak lo̱o̱tu̱ gerzek balik orong zi̱nze̱tti̱ cuggo̱k u̱tu̱gu̱z ke̱, kar zin i̱yo̱ko̱ niga ozolit bunnat ci Ta̱mu̱ta̱dde̱no̱.

⁵ Imma zin zo̱ze̱ ci tu̱we̱ne̱t cunno̱ng, abunna ming a̱li̱ngli̱ngnyu̱ oroot kar otortek bunnat tu̱we̱ne̱t cunno̱ng ki bo̱do̱k otortek bunnat genyiz.

⁶ Otortek genyiz ki laliz ci zi̱nze̱tti̱nnu̱, kar bo̱do̱k otortek laliz ci zi̱nze̱tti̱nnu̱ nimenet no̱ngi̱tto̱n, kar bo̱do̱k otortek nimenet no̱ngi̱tto̱n gool ci arikku zoz ci Ta̱mu̱ta̱dde̱no̱ zi̱nze̱tti̱.

⁷ Kar bo̱do̱k otortek zoz ci arikku zoz ci Ta̱mu̱ta̱dde̱no̱ zi̱nze̱tti̱ ko̱ zoz ci eelannu gonoggu wak a̱tu̱we̱ ki niga, kar bo̱do̱k otortek rezinet zoz ci eelannu ol cik a̱tu̱we̱ ko̱.

⁸ Ming anyakku niga kaal ne̱ko̱ do̱o̱k zi̱nze̱tti̱nne̱ cuggo̱k, a̱ti̱ri̱zu̱ng wo̱ye̱ kaala ne̱ko̱ i̱ge̱t kar a̱gga̱c Manyitinna Ye̱su̱ Ki̱ri̱sto̱.

⁹ Ma̱i̱je̱ ming iróng e̱e̱ti̱ imma anyak kaal ne̱ko̱ do̱o̱k, u̱tu̱gu̱ enne ki e̱e̱ti̱ ci ru̱be̱ni̱, erek nonno ming utunycai mu̱nye̱na̱ balik anyak enne ke̱.

¹⁰ I̱yo̱ko̱ zin gotonogga ki ngonogga tu̱we̱nta̱, abunna ming a̱li̱ngli̱ngnyu̱ oroot kar a̱gga̱c ilem Ta̱mu̱ta̱dde̱n zo̱ze̱ ci awuyyung ki ci ahalanung. Eci ming ogonnu niga kaal ne̱ko̱, iróng atin a̱yu̱we̱nu̱.

¹¹ Kar zin go̱o̱le̱ necu, a̱gga̱ma̱nu̱ng atin Manyitinna Ti̱ri̱zo̱i̱t Ye̱su̱ Ki̱ri̱sto̱ talinte ci a̱ppwe̱ oroot ba̱a̱li̱nte̱ cinne aave udut.

Zoz ci kehere anna waraga cu

¹² I̱yo̱ko̱ zin zo̱ze̱ necu, a̱gga̱mta̱u̱ niga kaal ne̱ko̱ la̱du̱n, akateu zin zo̱o̱ lo̱o̱c tu̱we̱nta̱ zo̱ze̱ ci een de̱de̱, ngen anna kemenna ka̱du̱wa̱kku̱ng ka̱a̱da̱ku̱ng kaal ne̱ko̱ dee.

¹³ Ki̱no̱ni̱ anna abunna ka̱a̱da̱ku̱ng zoz necu zee nginti ka̱da̱kne̱.

¹⁴ Eci anna ka̱gga̱ i̱i̱we̱ cu nginti kokko ka̱da̱kne̱ ize ojon ki i̱yo̱ko̱ u̱du̱wa̱ Manyitinna Ye̱su̱ Ki̱ri̱sto̱ ko̱.

¹⁵ Ka̱li̱ngli̱ngi̱ atin oroot kar ming kokko ka̱da̱i̱, kar atin niga a̱a̱dda̱ kaal balik ka̱li̱ngli̱ngi̱ anna ke̱ veelek odohize.

Di̱ngdi̱ngo̱n ci Ki̱ri̱sto̱

¹⁶ Baling ku̱du̱wa̱u̱ng zoz ci doiz ki we̱t ci okko Manyitinna Ye̱su̱ Ki̱ri̱sto̱ obodane ko̱, iróng ka̱du̱wa̱kku̱ng nga̱ri̱de̱t cik genyizak akana e̱e̱ti̱ imma. Abarik naga kicinnta eberene cigga̱k doiz cinne a̱ddi̱ki̱re̱ de̱de̱.

¹⁷ Eci enne amuda ngo̱li̱ne̱t ki di̱ngdi̱ngo̱n ngati Ta̱mu̱ta̱dde̱no̱ Be̱e̱ti̱nna̱ baling i̱tto̱na̱ enne muluk ci azi ne, “Een necu Ngeranni wa kirezi; katalne anna oroot ngatinne.”

¹⁸ Kaavtiya naga ki Ye̱su̱ biye ci a̱li̱le̱, kizikta muluk necu ming oroi ta̱mu̱-kenga.

¹⁹ Ka̱gga̱yya̱ zin naga e̱e̱ggi̱n zo̱zzo̱wa̱ balik u̱du̱kta̱ a̱ri̱tto̱wa̱ cik zoz ci Ta̱mu̱ta̱dde̱no̱ ko̱ do̱o̱k de̱de̱. Abunna zin ming aziknnu niga kaviyak cigge̱k, aanycik ka̱vvu̱to̱ zi̱nze̱tti̱nne̱ cuggo̱k ku̱tu̱gu̱ ki urezi ci ataran nginti mu̱hu̱ri̱ zee kiyowa munyunyoci ci een tukul maam.

²⁰ Abunna zin ming a̱gga̱yyu̱, i̱llo̱i̱ a̱ri̱to̱i̱t ci a̱du̱wa̱ zoz Warage ci Ta̱mu̱ta̱dde̱no̱ kar bo̱do̱k ku̱du̱wa̱ ke̱ngti̱ cik zo̱zzo̱k ne̱ke̱ o̱o̱we̱ cinne do̱.

²¹ Eci i̱llo̱i̱ a̱ri̱to̱i̱t ci ozoz kaal cik akana enne o̱o̱we̱ cinne do̱. Abarik zin Ta̱mu̱ta̱dde̱n ozozek zoz cinne a̱ri̱tto̱k go̱o̱le̱ ci Vongiz ci A̱li̱le̱.