2 Ko̱ri̱nto̱ 8 - Tennet

Aanycik kaal Ce̱e̱z wa Ta̱mu̱ta̱dde̱no̱

¹ Gotonogga ki ngonogga tu̱we̱nta̱, i̱yo̱ko̱ korongnyya ku̱du̱ktta̱u̱ng de̱ti̱ne̱t ci Ta̱mu̱ta̱dde̱no̱ ngati ogon ol wak a̱tu̱we̱ ce̱e̱zi̱nne̱ cik Ta̱mu̱ta̱dde̱no̱ lo̱o̱ce̱ ci Macedonia.

² Ming amati ol ne̱k a̱tu̱we̱ ko̱ nu̱nu̱n, abak talninta odohize, i̱i̱rke̱, eela ol u̱gge̱ wak a̱tu̱we̱.

³ Ka̱gga̱ een zoz necu de̱de̱, eci kicina anna eliya, oowak ol o̱ro̱bi̱ya̱ cik meelek ommog cik anyak nege, eci nege atalne irez ming aanyik ol kaal.

⁴ I̱jji̱nte̱t ol ne̱k a̱tu̱we̱ ke̱ orong kooya o̱ro̱bi̱ya̱ cigge̱k talninta, kar ki̱tto̱ntte̱k ollik Ta̱mu̱ta̱dde̱no̱ Jerusalema.

⁵ Iróng zin nege ogon ki bali ki̱no̱n naga ke̱, abarik aanyik e̱le̱tti̱ cigge̱k arrak Manyi kar bo̱do̱k agit ngati azunne nege zoz ci Ta̱mu̱ta̱dde̱no̱.

⁶ Kilalekka zin naga Ti̱to̱ baling akate enne i̱ye̱le̱kku̱ng gool ci ooyyu o̱ro̱bi̱ya̱ ko̱ een gi̱i̱ ci abunna, i̱yo̱ko̱ zin kilalekka nonno kar keelaung e̱de̱cca̱ li̱ngli̱ngo̱n ci ooyyu niga o̱ro̱bi̱ya̱ ko̱.

⁷ Ogonnu niga ju̱rru̱m kaale cik meelek. Anyakku tu̱we̱ne̱t ci okkomi. Anyakku ol cik uwak ju̱rru̱m, i̱i̱rke̱nnu̱, kar irezettu niga agita oroot. I̱yo̱ko̱, abunna ming i̱i̱rke̱nnu̱ ommogit ol do̱o̱k.

⁸ Iróng anna kadangekkung abunna ming ogonnu kaal ne̱ke̱. Eci kicina ol wak a̱tu̱we̱ o̱ro̱gjo̱we̱ ugganik ming anyak zi̱nze̱tti̱ cik voorik orongnyet keeltta ol wak a̱tu̱we̱, korongi ku̱du̱wa̱u̱ng katimani anna rezinet cunno̱ng ming irezzu niga ol de̱de̱.

⁹ A̱gga̱yyu̱ een ba̱li̱ye̱ Manyitinna Ye̱su̱ Ki̱ri̱sto̱ bunnatait oroot, utungek baiz ci abunna ta̱mu̱-kenga kar ki̱ki̱ya̱ katamat lo̱o̱ta̱ ngatu, abunna ming amuda e̱e̱ti̱ ci diiri baiz ci abunna Vongize ci A̱li̱le̱.

¹⁰ I̱yo̱ko̱ zin, iziyyet ti̱lo̱wi̱ne̱t cu: E̱rki̱t bali okko ke̱, i̱ge̱t cik oowanu o̱ro̱bi̱ya̱ oowa, ogonnu zin niko talninta orongnyu umucet Ce̱e̱z wa Ta̱mu̱ta̱dde̱no̱.

¹¹ Ki̱no̱ni̱ anna abunna ming edecakku oowinet ci o̱ro̱bi̱ya̱u̱ zo̱ze̱ ci abunna bali akannu niga ke̱. Anyik e̱e̱t kanyaha gi̱i̱ ci uule enne.

¹² Ming orong e̱e̱ti̱ ki̱ti̱ri̱z gonoggi kaale cik anyai, abunna ming anyike nogo kaal cik ette anyak enne zinine cinne do̱o̱k. Atalne Ta̱mu̱ta̱dde̱n ngati e̱e̱t ci anyike ol kaal talninta, iróng angija.

¹³ Iróng anna kazi ne umuc ol kaale cik meelek iróng i̱nna̱ bu̱k anyai. Iróng een niko, umuc ol kaale kar i̱nna̱ nyak u̱gge̱ bu̱k, anyik kaal ne̱ke̱ kutubto.

¹⁴ Ming anyai i̱nna̱ kaal cik meelek, ovvo ol cik a̱tu̱we̱ Ju̱de̱ya̱kte̱ amati, abunna kozol ki nogo kar nege bu̱k kanyait kaal u̱gge̱, imma ming een nogo cik anyak cik meelek, ozolu niga bu̱k ki nogo.

¹⁵ Azi Warage ci Ta̱mu̱ta̱dde̱no̱ ne, “Ovvo ol cik aluta da̱i̱ne̱t cik meelek iróng anyak cik meelek, ovvo ol cik aluta da̱i̱ne̱t cikidik iróng anyak cikidik.”

Ti̱to̱ ki ol balik i̱tto̱n Pa̱u̱lo̱ ke̱

¹⁶ I̱yo̱ko̱ zin, kanyike Ta̱mu̱ta̱dde̱n zany, eci enne aarik zoz ci abunna zinin ci Ti̱to̱ ki annita, ci irezzung i̱ge̱t oroot.

¹⁷ Okko enne nginati, iróng enne eronakku̱ng do̱ eci agit cik kilalekka nonno abunna ming okko, odola zinine cinne orong ki̱vo̱nnu̱ng bo̱do̱k dee.

¹⁸ Ki̱tto̱na̱kku̱ng Ti̱to̱ ki gotonet imma tu̱we̱nta̱ ci irez ke̱le̱ci̱a̱nya̱ do̱o̱k nonno, eci enne uwahek nogo ba̱li̱ye̱ kaviyak cik abunna Ki̱ri̱sto̱.

¹⁹ Ebertta bali ol nonno ke̱le̱ci̱a̱nya̱i̱ kar korkortta bu̱k ngati kovvoya muci ci ovvo ol a̱di̱ngdi̱nga̱ne̱ Manyi Ye̱su̱ lo̱o̱ce̱ ci een Jerusalem, ki̱ye̱la̱ gool ci keelane ol wak a̱tu̱we̱.

²⁰ Korongnya kilita ol cik ovvo adangnyeta go̱o̱le̱ ci ka̱gga̱mnya̱ naga muci ciko.

²¹ Kazi niko eci korongnyya ku̱tu̱gu̱zza̱ kaal cik acin Manyi Ta̱mu̱ta̱dde̱n, kar ol uggak kicinnet bu̱k.

²² Imma bo̱do̱k ki̱tto̱nna̱ gotonet imma ci a̱tu̱we̱ korkorrit ki Ti̱to̱ ki gonoggi u̱gge̱. Kicinnta li̱ngli̱ngo̱n ci e̱e̱t necu lak cik meelek giir, anyak zinin ci orong keelai ol cik a̱tu̱we̱. I̱yo̱ko̱ eci orong ovvoye muci rok ol wak a̱tu̱we̱, orong zin enne kuk bu̱k eci enne arikkung zinin oroot.

²³ Katahala anna Ti̱to̱ wagon ka̱li̱ngli̱ngnya̱ bu̱k kar ki̱ti̱ri̱zzu̱ng. Imma ol wak een rama ko̱, i̱tto̱na̱ ol cik ke̱le̱ci̱a̱nya̱i̱. Irez ol zoz ci Ki̱ri̱sto̱ go̱o̱le̱ ci ogone nege kaal.

²⁴ I̱yo̱ko̱ zin, i̱ye̱lte̱k ol ne̱ko̱ rezinet cunno̱ng, ki zoz ci kirezung naga i̱ge̱ta̱, kar ke̱le̱ci̱a̱nya̱ do̱o̱k kicinttung.