2 Ko̱ri̱nto̱ 3 - Tennet

Zoz ci een jor Ta̱mu̱ta̱dde̱no̱ ki ol

¹ Iróng naga kuwahekka ol zoz ci Ta̱mu̱ta̱dde̱no̱ ngati kodongnyya e̱le̱tti̱. Iróng korongnya ol u̱gge̱ icima i̱ge̱t ikebit bunnat ci li̱ngli̱ngo̱n cinna̱ng.

² E̱e̱ggi̱nnu̱ niga e̱le̱tti̱ne̱ ol cik ibbacu zoz cinna̱ng, e̱he̱rye̱ zoz cinna̱ng zi̱nze̱tti̱nne̱ cuggo̱k, a̱gga̱ ol kar bo̱do̱k kikebit do̱o̱k.

³ Ogonnu niga e̱le̱tti̱ne̱ ki waraga ci eher Ki̱ri̱sto̱, agit cik kanyik waraga necu ol. Eher enne waraga necu go̱o̱le̱ ci kedemeza nogo. Iróng zin e̱he̱rye̱ waraga, e̱he̱rye̱ Vongize ci Ta̱mu̱ta̱dde̱n wa abak udut, iróng eheronik bee ci zabali, abarik eheronik zi̱nze̱tti̱ cik ol cik diirik.

⁴ Ka̱du̱wa̱kku̱ng zoz ci een de̱de̱ karike anna zinin, eci naga karikka zi̱nze̱tti̱ Ta̱mu̱ta̱dde̱n ngati Ki̱ri̱sto̱.

⁵ Imma o̱to̱ne̱ cinna, iróng naga kanyak doiz ci kuule kaal do̱o̱k, iróng wo̱ye̱ ka̱du̱wa̱ kazi ne agit cik kanyak doiz. Abarik Ta̱mu̱ta̱dde̱n ci aanyyet doiz.

⁶ Aanyyet enne kizet ol cik ka̱li̱ngli̱ng olom ci een jor Ta̱mu̱ta̱dde̱no̱, iróng een lo̱ti̱nno̱k balik e̱he̱rye̱ ke̱. Imma kaale do̱o̱k, aanyyet lo̱ti̱nno̱wa̱ ne̱ke̱ daiz, okko Vongizi ci a̱li̱le̱ aanyyet ruget.

⁷ Imma zo̱ze̱ bali reeni ke̱ ci anyaha daiz, e̱he̱rye̱ lo̱ti̱nno̱wa̱ balik Musesi ke̱ biyene cik zabalik, a̱di̱ngdi̱nga̱n ol lo̱ti̱nno̱k ne̱ke̱ oroot. Bak kacin ngu̱m ci Musesi atarane kataltal ci iróng olli Israilo acin nonno. Kar bo̱do̱k do̱yo̱i̱t niko, iróng ngu̱m cinne ngen atarane bo̱do̱k. Imma lo̱ti̱nno̱wa̱ ne̱ke̱ vu̱rrta̱ anyakttak ol daiz.

⁸ Anyak zoz ci lo̱ti̱nno̱k cik Musesi gool ci u̱tu̱ri̱, imma lo̱ti̱nno̱wa̱ cik een jor anyaha Vongizi ci A̱li̱le̱ ko̱, okkomi kommog lo̱ti̱nno̱k balik reentik ke̱.

⁹ Ming anyahak lo̱ti̱nno̱wa̱ balik reentik riilik ke̱ ol daiz, ommog zin atin lo̱ti̱nno̱wa̱ cik een jor riilik ko̱, anyaha bunnat do̱ niko.

¹⁰ Anyak lo̱ti̱nno̱wa̱ ne̱k een jor ko̱ di̱ngdi̱ngo̱n oroot ci okkomi kommog balik reentik ke̱, i̱llo̱i̱ zin lo̱ti̱nno̱k balik reentik ke̱ di̱ngdi̱ngo̱n.

¹¹ Imma ming anyak lo̱ti̱nno̱wa̱ balik reentik ke̱ di̱ngdi̱ngo̱n ci aditai, anyak zin lo̱ti̱nno̱wa̱ wak een jor ko̱ di̱ngdi̱ngo̱n oroot ci aave udut.

¹² Ki i̱yo̱ko̱ karike naga zi̱nze̱tti̱ zoz ci kedemez ko̱, iróng naga ko̱ngo̱o̱li̱na̱ gi̱i̱ imma.

¹³ Iróng naga ka̱du̱wo̱ ki Muses bali a̱bu̱ng ngu̱m ru̱u̱me̱ ci iróng olli Israilo acin ngu̱m cinne bali alanyit ke̱, ngati iróng ngen alanyce ju̱rru̱m ki bali arrak oowa ke̱ bak kacin iróng ngen alanyiti.

¹⁴ Abarik zin i̱di̱tte̱ nogo iina, ki bali ming a̱bu̱ng Musesi ngu̱m ke̱, eci iróng orong kicinnet olli Israilo nonno. Ngen zin nege abahe olom bali reeni ke̱. Amadane zin atin lo̱ti̱nno̱wa̱ ne̱ke̱ zi̱nze̱tti̱nne̱ cigge̱k do̱o̱k ming i̱vi̱ta̱ nege elemtta Ki̱ri̱sto̱.

¹⁵ Ma bali e̱rki̱nya̱ ne̱ke̱ rok i̱yo̱ko̱, ming ikeb olli Israilo lo̱ti̱nno̱k balik eher Musesi ke̱, ogon ki ci a̱bu̱ng gi̱i̱ imma zi̱nze̱tti̱ cigge̱k.

¹⁶ Imma ming anyak ol cik elemi ngatinne̱ng zoz ci Manyi, aara zin Ta̱mu̱ta̱dde̱n gi̱i̱ neci zi̱nze̱tti̱nne̱ cigge̱k.

¹⁷ I̱yo̱ko̱ zin, een Manyi Vongiz, ma zin ngati aave Vongizi ci Manyi, kabak yahe.

¹⁸ U̱tu̱gu̱ ki ci aara Ta̱mu̱ta̱dde̱n gi̱i̱ ci a̱bu̱ng zi̱nze̱tti̱ cigga̱c, alam zoz ci Ta̱mu̱ta̱dde̱no̱ ko̱. I̱ye̱lta̱ zi̱nze̱tti̱ cigga̱c di̱ngdi̱ngo̱n ki vooriten ci Manyi, utuhuwet agit zin Vongizi neci ku̱tu̱gu̱zzo̱ ki Manyi.