2 Jon 1 - Tennet

Zawinet ki lawinet

¹ Eher ddi̱ki̱ryo̱i̱ti̱ ci ke̱le̱ci̱o̱ waraga cu. Eherik ngaa bali atahala Ta̱mu̱ta̱dde̱n ke̱ ki dooli ciginnek. Kirezung anna i̱ge̱t de̱de̱ do̱o̱k, iróng een annita do̱ ci kirezung, abarik ki ol do̱o̱k wak a̱gga̱ zoz ci een de̱de̱,

² eci zoz ci een de̱de̱ ko̱, aave ngatinna, kar atin ka̱vvu̱ ngatinna udut.

³ Anyik deten, ki eezet ki gano ngati Ta̱mu̱ta̱dde̱no̱ wa een Be̱e̱ti̱nna̱ ki ngati Ye̱su̱ Ki̱ri̱sto̱, Ngerrti Baba, aave atin ngatinna rezinta ki zo̱ze̱ ci een de̱de̱.

⁴ Katalne anna oroot ngati kuruba dooli cigunnek u̱gge̱ ming abak zo̱ze̱ ci een de̱de̱ ki bali u̱du̱wa̱ Baba zoz ci een de̱de̱ ki rezinet ke̱.

⁵ I̱yo̱ko̱ zin, ngaa ci kirezi ko̱, ka̱jji̱nni̱ abunna ming kirezo naga e̱le̱tti̱ne̱ do̱o̱k. Iróng neci een ti̱lo̱wi̱ne̱t ci een jor ci keheriki ko̱, abarik een ti̱lo̱wi̱ne̱t ci kanyak naga ba̱li̱ye̱ arrak oowa.

⁶ Een necu rezinet: abunna kabak ti̱lo̱wi̱nte̱ cinne, ki i̱yo̱ko̱ bali iziktu niga ke̱, a̱du̱wa̱ zoz ci azi ne, abaito rezinta.

⁷ Anyak volongnyok cik meelek azantozik lo̱o̱c, iróng nege elemi ming een Ye̱su̱ Ki̱ri̱sto̱ e̱e̱t ci diiri. A̱ti̱ye̱ nege ol tu̱, e̱e̱ggi̱n nege mo̱ddo̱ cik Ki̱ri̱sto̱.

⁸ U̱zu̱tte̱ li̱ngli̱ngo̱n bali a̱li̱ngli̱ngnyu̱ niga ke̱. Ming u̱zu̱ttu̱, kar abunna atin a̱ma̱yu̱kku̱ng Ta̱mu̱ta̱dde̱n kar ka̱a̱nyu̱ng kaal cik orong enne ka̱a̱nyu̱ng i̱ge̱ta̱.

⁹ Ma ukce kar bo̱do̱k tungek lo̱o̱c zoz bali edemezi ol i̱nne̱t obod ki Ki̱ri̱sto̱ ke̱, icima atin Ta̱mu̱ta̱dde̱n iróng ngen aave ngatunne. Imma e̱e̱ti̱ ci azunne de̱mzi̱ne̱t bali edemze ol nonno ke̱, aave Baba ki Ngerinne ngatinne.

¹⁰ Ming a̱kku̱ e̱e̱ti̱ imma ci iróng azunne de̱mzi̱ne̱t ci Ki̱ri̱sto̱, ma elemnyyu nonno ce̱e̱zi̱nne̱ cuggo̱k, kar bo̱do̱k ma izayu nonno.

¹¹ Imma e̱e̱ti̱ ci Ta̱mu̱ta̱dde̱no̱ ming izza e̱e̱t ci mu̱nye̱nu̱, ogon kiwagon e̱e̱ti̱ ci ozol ki nonno mu̱nye̱n bu̱k.

¹² Kanyai anna no̱ngi̱tto̱n cik meelek korongi ku̱du̱wa̱u̱ng, abarik iróng korongi keteherek waraga gaalama. Abarik korongi kar keronakkung kar kozozeung anna utuge cinanni, kar atin naga do̱o̱k katalto oroot.

¹³ I̱tto̱na̱ki̱ dooli cik ngononu bali atahala Ta̱mu̱ta̱dde̱n ko̱ zawinet cinne̱ng.