1 Ti̱mo̱te̱yo̱ 2 - Tennet

Gool ci kalawe Ta̱mu̱ta̱dde̱n

¹ Korongnyung zin arrak oowa alayozik ol do̱o̱k kar keela Ta̱mu̱ta̱dde̱n, kar aanycik Ta̱mu̱ta̱dde̱n zany kaale wak ogonik enne nogo.

² Alayek Ta̱mu̱ta̱dde̱n alaat cik abal lo̱o̱c ki ol wak a̱ddi̱ki̱re̱ abal ol, ki ol wak abal nege, kar kabait labak go̱o̱le̱ ci kireze Ta̱mu̱ta̱dde̱n zi̱nze̱tti̱nne̱ cik abunna.

³ Abunna zin ming kogon niko kar katal Ta̱mu̱ta̱dde̱n wanna een Ti̱ri̱zo̱i̱t.

⁴ Orong Ta̱mu̱ta̱dde̱n ol do̱o̱k kurubta ruget, kar ka̱gga̱c zoz wa een de̱de̱.

⁵ Eci anyak Ta̱mu̱ta̱dde̱n co̱de̱ ṯok ki e̱e̱t ci een zoc co̱de̱ ṯok ci aave orgene ci Ta̱mu̱ta̱dde̱no̱ ki ol cik diirik, een enne Ki̱ri̱sto̱ Ye̱su̱,

⁶ ci aanyik zin enne ele cinne kize wawac, ku̱ru̱we̱ ka̱da̱k kar kaara ol mu̱nye̱n, a̱kku̱ zoz necu go̱o̱le̱ ci orong Ta̱mu̱ta̱dde̱n.

⁷ Atahala Ta̱mu̱ta̱dde̱n annit kize zoc ki to̱ni̱a̱t ci kedemezek ol cik iróng een Ya̱u̱d tu̱we̱ne̱t ci een de̱de̱. Iróng kovolongi, ka̱du̱wa̱ zoz ci een de̱de̱.

⁸ Korongi ol do̱o̱k wak a̱tu̱we̱ kabanycek azzin cik a̱li̱le̱ Ta̱mu̱ta̱dde̱n ngati alawine, ci iróng nege abure nong icima adango.

⁹ Korongi bo̱do̱k ngaai ki̱ti̱me̱t ru̱u̱ma̱ni̱ cik abunna iróng adak o̱ro̱bi̱ya̱ cik meelek, iróng e̱e̱ggi̱n ru̱u̱ma̱ni̱ cik u̱tu̱ri̱k ki̱ye̱lta̱i̱ vaana. Gerza ming a̱bbu̱k otir. Gerza ming aburuc zu̱rte̱ne̱n cik een dhahab ki alben cik i̱rra̱ne̱ nege.

¹⁰ Abunna ngaai wak ala Ta̱mu̱ta̱dde̱n ming eela ol.

¹¹ Anyik ngaai wak a̱tu̱ zoz ci Ta̱mu̱ta̱dde̱no̱ kizeto gunune kar ke̱de̱me̱zi̱t kaal cik meelek ngati ijaine nege.

¹² Iróng korongi ngaa ci edemez e̱e̱t ci maci icima ka̱gga̱ma̱ baiz. Abarik anyik kiziyo li̱i̱m.

¹³ Eenyca Ta̱mu̱ta̱dde̱n ba̱li̱ye̱ Adam oowa kar bo̱do̱k keteheenya Eva vu̱rrta̱.

¹⁴ Iróng bo̱do̱k ba̱li̱ye̱ een Adam nenen ci alaba lo̱rye̱nti̱, ngaa ci ba̱li̱ye̱ alaba lo̱rye̱nti̱ kanyahak ba̱ci̱ ol lo̱o̱ta̱ do̱o̱k.

¹⁵ A̱ti̱ri̱z atin Ta̱mu̱ta̱dde̱n ngaai go̱o̱le̱ ci a̱rri̱ta̱ne̱ dooli, ming emena nege tu̱we̱nta̱ ki rezinet Ta̱mu̱ta̱dde̱n kar kabaito baiz ci a̱li̱le̱.