1 Te̱se̱lo̱ni̱ka̱ 4 - Tennet

Kabait baiz ci atali Ta̱mu̱ta̱dde̱n

¹ Ma zin i̱yo̱ko̱ vu̱rrte̱ ci waraga cu, gotonogga ki ngonogga tu̱we̱nta̱, kedemezteung ri̱t gool ci abakku ju̱rru̱m katal Ta̱mu̱ta̱dde̱n. Ma̱i̱je̱ zin i̱yo̱ko̱ kilalekkung ki̱lo̱tu̱ng zare cik Manyi Ye̱su̱ kar abait ki ol labak kommog baiz necu.

² A̱gga̱yyu̱ ri̱t niko, ming odolai lo̱ti̱nno̱wa̱ balik ki̱lo̱tu̱ng ke̱ ngati Manyi Ye̱su̱.

³ Azi zin Ta̱mu̱ta̱dde̱n ne ma a̱u̱llu̱ e̱le̱tti̱ ngati orootonu ki ngaai, a̱gga̱mi̱t e̱le̱tti̱ ki̱li̱le̱c.

⁴ Anyik gon ngengene kalam ele cinne ngati okkoye ngaane, a̱gga̱mi̱t e̱le̱tti̱ ki̱li̱le̱c kar kirezzttung ol.

⁵ Ma anyikku a̱li̱ya̱kze̱t ka̱gga̱ma̱u̱ng baiz kiwagon ol cik iróng a̱gga̱ zoz ci Ta̱mu̱ta̱dde̱no̱.

⁶ Ma orootonu ki ngaai cik ollu, ming u̱tu̱gu̱ niko, edezi atin Manyi wa a̱gga̱ no̱ngi̱tto̱n do̱o̱k ki bali ming koobteung ke̱, kar bo̱do̱k icinntu baize cinna̱ng ke̱.

⁷ Eci Ta̱mu̱ta̱dde̱n adimannet ba̱li̱ye̱ iróng orongnyet ku̱tu̱lle̱, abarik orongnyet kabait baiz ci caale paz.

⁸ Ming abure e̱e̱ti̱ imma de̱mzi̱ne̱t necu, iróng abure e̱e̱t ci diiri, abure abarik Ta̱mu̱ta̱dde̱n wa aanyik ol Vongiz ci A̱li̱le̱.

⁹ Ma̱i̱je̱ ming een lemanet wa irezzu gotonogget wak a̱tu̱we̱, iróng keherikung zoz ci obod ki o̱to̱n neci, ma̱rri̱t ba̱li̱ye̱ ming een Ta̱mu̱ta̱dde̱n eliya ci edemezung gool ci irezzu e̱le̱tti̱.

¹⁰ Irezttu de̱de̱ gotonogget ki ngonogget tu̱we̱nta̱ wak abak lo̱o̱ce̱ ci een Macedonia veelek. Ngen naga kilalekkung dee kar otortek rezinet neci kize a̱ppwa̱.

¹¹ Ki̱lo̱tu̱ng bo̱do̱k ka̱nne̱kku̱ng ne, abait baiz ci abunna aavtiyyu labak, i̱li̱ngli̱nge̱t li̱ngli̱ngo̱n azzine cuggo̱k kar urubta da̱i̱ne̱t ki bali ming ku̱du̱ktta̱u̱ng ke̱.

¹² Ming u̱tu̱gu̱zzu̱ niko, o̱ngo̱o̱li̱nnu̱ng wo̱ye̱ ol wak iróng a̱tu̱we̱. I̱ce̱lli̱t e̱le̱me̱tti̱ cuggo̱k ma̱ci̱gja̱.

We̱t ci a̱kku̱nne̱ Manyi

¹³ Gotonogga ki ngonogga tu̱we̱nta̱, korongnyung a̱gga̱c zoz ci een de̱de̱ obod ki ol wak a̱tu̱we̱ a̱da̱i̱to̱. Iróng korongnyung i̱ge̱t u̱tu̱lu̱z ki ol wak iróng arike zi̱nze̱tti̱ zoz ci baiz wa ovvo ol wak a̱da̱i̱to̱ obodane.

¹⁴ Ming kelemi naga zoz ci a̱da̱kne̱ Ye̱su̱ kar zin kitinga daiza, obodane atin Ta̱mu̱ta̱dde̱n ol ne̱ke̱ daiza kuruget bu̱k ki Ye̱su̱ nga̱to̱de̱.

¹⁵ Kedemezung de̱mzi̱ne̱t ci Manyi Ye̱su̱ azi, ming okko Manyi oboda ta̱mu̱-kenga, iróng naga ne̱k ngen karuge ko̱ kuwante o̱o̱we̱ ci ol balik a̱da̱i̱to̱ ke̱.

¹⁶ Eci Manyi Ye̱su̱ eliya alucak lo̱o̱c ta̱mu̱-kenga kar ddi̱ki̱ryo̱i̱ti̱ ci anjilonyau kozoz muluwe ci a̱bu̱le̱, kar zin ol kiziyet ture ci Ta̱mu̱ta̱dde̱no̱ ming abuwe. Ma̱i̱je̱ ol balik a̱da̱i̱to̱ ngati elemtta zoz ci Ki̱ri̱sto̱ ke̱, ingazi atin daiza kuruget.

¹⁷ Imma naga ol ne̱k ngen karuge ko̱, i̱rra̱ne̱t atin gi̱i̱ imma lo̱o̱ta̱ koot kurumto ki Ye̱su̱ di̱i̱zo̱ca̱. Kar koot kabait ki Manyi udut.

¹⁸ I̱ti̱lo̱zzo̱ kar eelta e̱le̱tti̱ cuggo̱k zo̱ze̱ necu.