1 Te̱se̱lo̱ni̱ka̱ 1 - Tennet

Zawinet ci Pa̱u̱lo̱

¹ Keherikung anna Pa̱u̱lo̱, ki Silas, ki Ti̱mo̱te̱yo̱ waraga cu i̱ge̱t ol wak a̱tu̱we̱ ke̱le̱ci̱a̱k o̱rge̱ ci Te̱se̱lo̱ni̱ka̱, i̱ge̱t ol wak e̱e̱ggi̱nnu̱ ol cik Ta̱mu̱ta̱dde̱n wa een Be̱e̱ti̱nna̱ bali eenycanetta ki Manyi Ye̱su̱ Ki̱ri̱sto̱. Anyait deten ki baiz yahe tu̱we̱nte̱ ci zoz ci Ta̱mu̱ta̱dde̱no̱.

² Kanyikka gon Ta̱mu̱ta̱dde̱n zany zo̱ze̱ cunno̱ng do̱o̱k, kabungnya zar ciggo̱k ming kalayya Ta̱mu̱ta̱dde̱n odohize.

³ Ka̱a̱da̱nnu̱ng gon lawinte ci kalayya Ta̱mu̱ta̱dde̱n Be̱e̱ti̱nna̱ zo̱ze̱ ci li̱ngli̱ngo̱n wa ogonnu niga ko̱ ngati a̱tu̱yyu̱ nonno, kar inimet no̱ngi̱tto̱n ngati arikku zi̱nze̱tti̱ Manyitinna Ye̱su̱ Ki̱ri̱sto̱.

⁴ Gotonogga ki ngonogga tu̱we̱nta̱, ka̱gga̱yya̱ niko ming irezzung Ta̱mu̱ta̱dde̱n, kar katahalaung izet ol ciginnek.

⁵ Ma̱rri̱t baling kanyaktaung kaviyak cik abunna Ta̱mu̱ta̱dde̱no̱ obod ki zoz ci Ye̱su̱ wa atahalai. Iróng ba̱li̱ye̱ een kaviyak cik ku̱du̱kta̱ zar ulla ci a̱a̱nyu̱ng elemtta zoz ci Ye̱su̱, een abarik komize ci Ta̱mu̱ta̱dde̱no̱ ki Vongiz ci A̱li̱le̱ ci bali a̱li̱ngli̱ng orgene cinna. A̱gga̱yyu̱ ri̱t bo̱do̱k niga bu̱k niko baiz cinna̱ng baling kabak ki i̱ge̱t ke̱.

⁶ I̱ye̱zte̱ttu̱ ba̱li̱ye̱ baize cinna̱ng ki baiz ci Manyi Ye̱su̱ bu̱k. Ming apirnannu tu̱we̱nta̱ zo̱ze̱ ci Ye̱su̱ niko, elemttau labak, ma̱i̱je̱ Vongizi ci A̱li̱le̱ a̱a̱nyu̱ng talninet zo̱ze̱ cinne ngati animnyu no̱ngi̱tto̱n.

⁷ Izetu ol cik i̱ye̱zzu̱ng ol wak elemtta zoz ci Ta̱mu̱ta̱dde̱no̱ lo̱o̱ce̱ ci een zara Macedonia ki lo̱o̱c ci Achaia do̱o̱k.

⁸ Eci a̱tu̱we̱nu̱ niga zo̱ze̱ ci Manyi Ye̱su̱, iróng zin zoz neci atakuza lo̱o̱c ci Macedonia ki ci Achaia do̱, abarik edera lo̱o̱c do̱o̱k zo̱ze̱ ci a̱tu̱yyu̱ niga zoz ci Ta̱mu̱ta̱dde̱no̱, ki̱zzi̱ rok zoz imma ci ka̱du̱wa̱kka̱ nogo.

⁹ U̱du̱ktta̱i̱t ol do̱o̱k gool bali a̱gga̱mnyu̱ niga nogo baling i̱tto̱zzo̱ nege orog cunno̱ng, kar zin bo̱do̱k utuburtu gool ci a̱tu̱yyu̱ to̱do̱yyo̱k kar alac Ta̱mu̱ta̱dde̱n wa aruge een de̱de̱,

¹⁰ ngati e̱re̱yyu̱ Ye̱su̱ Ngerinne, wa atin obodak lo̱o̱c ta̱mu̱-kenga, bali ingane enne daiza. Eelannet atin agit do̱o̱k kar kilittet mozinet ci Ta̱mu̱ta̱dde̱no̱ ci atin okko enne edeze ol cik abure iróng a̱tu̱ zoz ci Ye̱su̱.