1 Peturu 5 - Tennet

Ti̱lo̱wi̱ne̱t ci i̱lo̱to̱ni̱k ol wak a̱ddi̱ki̱re̱ ki nyazorok

¹ Niga ddi̱ki̱rze̱t ci ke̱le̱ci̱o̱, ki ming karume anna ki i̱ge̱t ko̱, kilalekkung ke̱e̱ni̱ bbacait ci Ki̱ri̱sto̱ wa bali a̱gi̱d ol lo̱o̱ta̱ ngatu ke̱ ka̱da̱k, kokko atin anna kozola imma nonno di̱ngdi̱ngo̱n ci okko atin i̱ye̱la̱i̱ ke̱.

I̱lo̱ti̱k Peturu ol wak a̱tu̱we̱ li̱ngli̱ngo̱n

² Ki i̱yo̱ko̱ tuwayoiti ko̱, u̱zu̱tte̱ ol cik Ta̱mu̱ta̱dde̱no̱ a̱a̱nyu̱ng enne ko̱, abunna ming azunnu nogo. U̱tu̱gu̱z li̱ngli̱ngo̱n necu zi̱nze̱tti̱nne̱ cik alali ki ming orong Ta̱mu̱ta̱dde̱n. U̱zu̱tte̱ nogo ci iróng een zoz ci orongnyu o̱ro̱bi̱ya̱, abarik aanycik kize li̱ngli̱ngo̱n ci a̱kku̱ zi̱nze̱tti̱nne̱ ciggo̱k.

³ Ma ogonnu ki alaata wak odong e̱le̱tti̱ olle ngati a̱gga̱me̱ ol. Abarik aanycik ol kicinnta li̱ngli̱ngo̱n cunno̱ng ngati a̱li̱ngli̱ngnyu̱ ju̱rru̱m.

⁴ Kar ming okko Ki̱ri̱sto̱ alaani wa tuwayowu oboda, okko atin enne a̱a̱nyu̱ng alaanzet ci atin iróng ti̱ri̱ze̱ne̱t ki de̱ti̱ne̱t cinne aṯurneke.

⁵ Niga dooli wak kidik, wak ngen ingannu, abunna ming o̱ngo̱o̱li̱nnu̱ ol cik a̱ddi̱ki̱re̱. Abunna ming o̱ngo̱o̱li̱nnu̱ e̱le̱tti̱, eci azi buwe ci Ta̱mu̱ta̱dde̱no̱ ne, “Adang Ta̱mu̱ta̱dde̱n e̱e̱t ci odong ele abarik aanyik deten e̱e̱t ci iróng odong ele.”

⁶ I̱yo̱ko̱ zin, abunna ming o̱ngo̱o̱li̱nnu̱ Ta̱mu̱ta̱dde̱n doize wainne ko̱ do̱o̱k, kar ming okko enne oboda, kar ki̱ti̱ri̱zzu̱ng.

⁷ Kodongtek Ta̱mu̱ta̱dde̱n kaal wak gerzek ogonekku̱ng ol ko̱ do̱o̱k, eci enne een e̱e̱t ci azunnung.

⁸ U̱zu̱tte̱ e̱le̱tti̱ ciggo̱k eci lo̱rye̱nti̱ wa een mo̱dde̱ni̱t cunno̱ng e̱re̱ye̱ goola kiwagon maa wa a̱rru̱k ngati orong kar kadaho.

⁹ Abunna zin niga do̱o̱k ming aburnnu kaal cik lo̱rye̱nta̱k. Okkomit tu̱we̱nta̱ kak. A̱gga̱yyu̱ ri̱t niga ol wak a̱tu̱we̱ lo̱o̱co̱we̱ do̱o̱k apirna ki i̱yo̱ko̱ niga ming apirnannu bu̱k ko̱.

¹⁰ Ma zin Ta̱mu̱ta̱dde̱n a̱a̱nyu̱ng i̱ge̱t deten do̱o̱k, ngati ipirtayyu niga, okko atin Ta̱mu̱ta̱dde̱n a̱a̱nyu̱ng okkomit kak kar bo̱do̱k ki̱ti̱ri̱zzu̱ng udut, nonno nenen ci i̱tto̱na̱ne̱ enne Ye̱su̱ Ki̱ri̱sto̱ kar ki̱ki̱ya̱ atahalaung ko̱.

¹¹ Okko ngatinne, aave atin doizi cinne udut. Amen.

Zawinet wa vu̱rrto̱

¹² Eelanna Silasi ngati kehere waraga cu, ka̱gga̱ Silas niko ming een gotonet ci anyak deten. Een waraga ci keherakkung ko̱, waraga ci orongi kar ku̱du̱wa̱u̱ng abunna ming a̱gga̱yyu̱ deten ci Ta̱mu̱ta̱dde̱n ming een de̱de̱ kar abunna ming emenannu ngati a̱tu̱yyu̱ nonno.

¹³ Izayung nuyaha wak Manyi lo̱o̱ce̱ ci een Babilon. E̱e̱ggi̱n nege cik bali atahala Ta̱mu̱ta̱dde̱n, ki i̱yo̱ko̱ Marko wa ogon ki ngeranni tu̱we̱nta̱ ko̱, izayung enne i̱ge̱t bu̱k.

¹⁴ Izzac ol do̱o̱k. Kala anna Ta̱mu̱ta̱dde̱n kar ka̱a̱nyu̱ng gano i̱ge̱t ol wak a̱tu̱ Ki̱ri̱sto̱.