1 Peturu 4 - Tennet

U̱tu̱we̱t Ta̱mu̱ta̱dde̱n

¹ Ki i̱yo̱ko̱ baling apirna ele ci Ki̱ri̱sto̱ lo̱o̱ta̱ ngatu, a̱vvu̱t ju̱rru̱m, apirnannu atin niga ki i̱yo̱ko̱ enne ko̱ bu̱k, eci pirnanet ci ele cinne i̱ye̱le̱kke̱t i̱ti̱vi̱la̱ enne mu̱nye̱n cigga̱c.

² I̱ye̱le̱kke̱t zin zoz necu zoz ci azi ne, utungteu niga kaal cik mu̱nye̱nu̱ amin zi̱nze̱tti̱ ciggo̱k ko̱ do̱o̱k lo̱o̱c, orongnyu u̱tu̱gu̱z zoz ci Ta̱mu̱ta̱dde̱no̱ baize cunno̱ng.

³ Abakttu niga lo̱o̱ta̱ ngatu oroot, ogonnu ki ol wak iróng a̱gga̱ Ta̱mu̱ta̱dde̱n, ogonnu kaal cik gerzek amin zi̱nze̱tti̱ ciggo̱k, e̱e̱ggi̱nnu̱ a̱li̱ya̱k, e̱e̱ggi̱nnu̱ bba̱kco̱k, ogonnu bo̱do̱k to̱do̱yyo̱k kize ta̱mu̱ta̱dde̱ne̱t.

⁴ I̱yo̱ko̱ zin u̱ku̱lte̱u̱ng ol wak iróng a̱gga̱ Ta̱mu̱ta̱dde̱n azi ne, inya ming iróng niga ngen orkoryyu imma nogo kaale cik gerzek ogon nege ko̱? I̱yo̱ko̱ abarik nege odomtung i̱ge̱ta̱.

⁵ Abarik zin nege ovvo atin abarizek Ta̱mu̱ta̱dde̱n wa apahek ol wak aruge ki ol wak a̱da̱i̱to̱ lo̱ki̱ko̱.

⁶ Eci zo̱ze̱ necu, uwaktozik ba̱li̱ye̱ kaviyaha cik abunna ol wak a̱da̱i̱to̱, kar atin vu̱rrta̱ ming okko apahonik nogo lo̱ki̱ko̱ kaale wak gerzek ogon nege baizowe cigge̱k, ma̱i̱je̱ vongizzowa cigge̱k ovvo atin arume ki Ta̱mu̱ta̱dde̱n.

⁷ Ize ojon i̱i̱te̱ni̱ ci aṯurneke kaala veelek. I̱yo̱ko̱ zin, abunna ming egenyyu oroot, abunna bo̱do̱k ming okkomnu lawinta kak.

⁸ Ma gi̱i̱ye̱ ci riili oroot, abunna zin niga ming irezonnu, eci rezinet ngati aave, amadan mu̱nye̱n.

⁹ Aanycik ol ki̱vi̱ta̱k ce̱e̱zi̱ ciggo̱k ki̱zzi̱ rok zoz imma ci anyakku zi̱nze̱tti̱nne̱ to.

¹⁰ A̱ma̱yu̱ng i̱ge̱t deteni ci Ta̱mu̱ta̱dde̱no̱ a̱a̱nyu̱ng arizet ci abunna, kar niga abunna ming eelannu ol u̱gge̱. I̱li̱ngli̱ngte̱ zin ma̱yu̱we̱ne̱t necu ju̱rru̱m.

¹¹ Ming anyak e̱e̱ti̱ arizet zoza, aanyik nonno kuwahek ol zoz ci Ta̱mu̱ta̱dde̱no̱ wa een nonno ele. Ming anyak e̱e̱ti̱ zinin ci kar keela ol, anyik nonno keela ol doize bali aanyik nonno Ta̱mu̱ta̱dde̱n la̱du̱n ke̱. Kar ol kinnatit Ta̱mu̱ta̱dde̱n kaale do̱o̱k zo̱ze̱ ci Ye̱su̱ Ki̱ri̱sto̱. Imma zin zo̱ze̱ cinne aave di̱ngdi̱ngo̱ni̱ ki komiz atin udut. Amen.

Pirnanet ci ol cik a̱tu̱ Ki̱ri̱sto̱

¹² Niga gotonogga ki ngonogga tu̱we̱nta̱, ma a̱ku̱le̱kku̱ je̱e̱n icima anyikku zi̱nze̱tti̱ ku̱u̱ce̱t ngati apirnannu, a̱vvu̱na̱kku̱ng atin kaala cik gerzek kar kitimantung.

¹³ Ataltto go̱o̱le̱ ci apirnannu ko̱ ki baling apirna Ki̱ri̱sto̱ ke̱. Okko atin zoz neci apirnannu niga ko̱, anyaha talinet ci a̱ppwe̱ oroot atin ming okko di̱ngdi̱ngo̱ni̱ cinne i̱ye̱la̱i̱.

¹⁴ Abunna ming odomnyung ol zo̱ze̱ ci annuyu Ki̱ri̱sto̱ a̱tu̱yyu̱ nonno ko̱. A̱ma̱yu̱kte̱u̱ niga eci de̱ti̱ne̱t ki Vongiz ci Ta̱mu̱ta̱dde̱no̱ a̱vvu̱ ngatinno̱ng.

¹⁵ Abarik zin ming apirnannu niga niko ko̱, iróng ogonnu ki ol wak a̱ru̱k ol icima ogoryak, icima ogonnu ki i̱rrki̱rryo̱wa̱, icima a̱du̱lo̱ne̱kku̱ zoz ci ol u̱gge̱.

¹⁶ Ming apirnannu niga ol cik e̱e̱ggi̱n Kiristian, ma anyikku a̱li̱ya̱n kadaung, abarik inatit Ta̱mu̱ta̱dde̱n eci anyaktu niga zar ne̱ke̱.

¹⁷ Ize ojon i̱i̱ wa okko Ta̱mu̱ta̱dde̱n apahek ol waginnek lo̱ki̱ko̱. Ming akatai lo̱ki̱ko̱ neci ngatinna een wo̱ye̱ zoz ku̱ ngati ol wak abure kaviyak waginnek abunna. Azi Warage ci Ta̱mu̱ta̱dde̱no̱ ne,

¹⁸ ki i̱yo̱ko̱ “Ming okkomi ngati ol wak abunna kar kurubta ti̱ri̱ze̱ne̱t, ogon ucca ngati ol wak abure Ta̱mu̱ta̱dde̱n ki ol wak mu̱nye̱nu̱ ku̱?”

¹⁹ I̱yo̱ko̱ zin, imma niga ol wak apirnannu go̱o̱le̱ ci oronge Ta̱mu̱ta̱dde̱n ko̱, abunna ming arikku zi̱nze̱tti̱ ciggo̱k do̱o̱k E̱e̱t wa bali eenycanet kar ku̱tu̱gu̱ zoz ci abunna odohize.