1 Peturu 3 - Tennet

Zoz ci obod ki ngaai ki maccwa

¹ Niga ngaai, o̱to̱ngo̱o̱ltte̱ maccwa ciggo̱k, kar uggak cik abure zoz ci Ta̱mu̱ta̱dde̱no̱ ko̱, okko atin zoz cunno̱ng a̱tu̱yyu̱ niga Manyi ko̱ aanyik atin nogo kelemtta zoz ci Ta̱mu̱ta̱dde̱no̱ ci iróng niga a̱du̱wa̱kku̱ nogo.

² Eci nege ovvo acinna baiz cunno̱ng ci o̱ngo̱o̱li̱nnu̱ niga Ta̱mu̱ta̱dde̱n ki baiz ci abakku niga caale paz ko̱.

³ Gerza ming a̱kku̱ zi̱zi̱wo̱ni̱ cunne eci re̱e̱nu̱no̱ kaale cik aimi i̱nna̱, ki i̱yo̱ko̱ bbuwenet otir ki alben cik een dhahab ki ru̱u̱ma̱ni̱ cik adak o̱ro̱bi̱ya̱ cik meelek.

⁴ Abarik zin abunna ming a̱kku̱ zi̱zi̱wo̱ni̱ cunne zinina, zi̱zi̱wo̱n ci iróng aditai ki zinin ci abunna, een necu zoz ci riili ngu̱me̱ ci Ta̱mu̱ta̱dde̱no̱.

⁵ Gool zin ci a̱tu̱we̱ ngaai balik reentik a̱li̱le̱, arike Ta̱mu̱ta̱dde̱n zi̱nze̱tti̱ ke̱ nenen necu. Aanycik nege e̱le̱tti̱ cigge̱k ki̱zi̱ze̱c ngati a̱tu̱we̱ Ta̱mu̱ta̱dde̱n kar bo̱do̱k ko̱to̱ngo̱o̱ltte̱ maccwa cigge̱k.

⁶ Ki bali Sarah ming elemi zoz ci Aburahami anyike nonno kize e̱e̱t cinne a̱ddi̱ki̱re̱. Ovvo zin atin niga e̱e̱ggi̱nnu̱ dooli ciginnek wak een de̱de̱ ming ogonnu niga kaal cik abunna iróng o̱ngo̱o̱li̱nnu̱ gi̱i̱ imma.

⁷ Anycik ol cik macik go̱o̱le̱ necu bu̱k ko̱to̱ngo̱o̱ltte̱ ngaai cigge̱k ming abakku bu̱k ko̱, i̱ti̱ri̱zze̱t nogo labak kizeto ngaai, kar niga do̱o̱k ozolit ruget ci aave udut, ki bali amuccu̱ng Ta̱mu̱ta̱dde̱n i̱ge̱ta̱ rugeta ko̱, kar atin i̱llo̱i̱ gi̱i̱ imma ci alam lawinet cunno̱ng ngati Ta̱mu̱ta̱dde̱no̱.

Apirna ol cik a̱tu̱we̱ eci ogon nege kaal cik abunna

⁸ I̱yo̱ko̱ zin, abunna niga do̱o̱k ming elemannu zoz necu. Irezit e̱le̱tti̱ kiwagon gotonoggeti ki ngonogget wak a̱tu̱we̱, izet ol cik i̱rrke̱nu̱, ma odongnyu e̱le̱tti̱ ciggo̱k.

⁹ Ming ogoneki e̱e̱ti̱ gi̱i̱ ci gerze icima odomnyin, icima amarninin, ma acaca, abarik lalek nonno, ma̱yu̱k nonno, tu̱gu̱we̱k kaal cik abunna eci bali atahalaung Ta̱mu̱ta̱dde̱n kar izet dooli ciginnek tu̱we̱nta̱. Azi Warage ci Ta̱mu̱ta̱dde̱no̱ ne,

¹⁰ Ming “Orong e̱e̱ti̱ de̱de̱ kar kabak labak talninta, kar kicin baiz i̱i̱nya̱ do̱o̱k ma ozozi ol gerzet, anyik nonno kuzute utug cinne zo̱ze̱ ci volongo.

¹¹ Abunna la̱du̱n enne ming uungnek kaal cik mu̱nye̱nu̱ kar ku̱tu̱gu̱ kaal cik abunna; abunna la̱du̱n ming orong enne gano kar kaanyik kize baiz cinne.

¹² Eci ebere cik Manyi acin ol cik abunna ovvo iina ciginnek aziye lawinet cinne̱ng, Imma Manyi iróng orong ol wak ogon mu̱nye̱n.”

¹³ Ngene ci ogonekku̱ng gi̱i̱ ci gerze ming orongnyu oroot u̱tu̱gu̱z zoz ci abunna?

¹⁴ Ma wo̱ye̱ nu̱nu̱n ming apirnannu ngati ogonnu kaal cik abunna, ngen zin abarik Ta̱mu̱ta̱dde̱n a̱ma̱yu̱kku̱ng. “Ma o̱ngo̱o̱li̱nnu̱ zoz imma icima i̱no̱nnu̱ zoz ci ogonekku̱ng ol kaal cik gerzek.”

¹⁵ Abarik o̱to̱ngo̱o̱ltte̱ Ki̱ri̱sto̱ kize Manyi zi̱nze̱tti̱nne̱ cuggo̱k. Abunna ming erewinnu ju̱rru̱m kar abarizet e̱e̱t ci a̱jji̱nne̱ orong ka̱gga̱ zoz ci anyakku niga arikku zi̱nze̱tti̱ ko̱.

¹⁶ Abunna abarizek ol zoz ci abunna kar ol wak a̱du̱wa̱ki̱ kaal cik gerzek ngati Ki̱ri̱sto̱ ko̱, kadak nogo a̱li̱ya̱ni̱.

¹⁷ Abunna ming apirnannu ming ogonnu zoz ci Ta̱mu̱ta̱dde̱no̱, gerza ming apirnannu ming ogonnu kaal cik mu̱nye̱nu̱.

¹⁸ Eci a̱da̱i̱ ba̱li̱ye̱ Ki̱ri̱sto̱ lak co̱de̱ mu̱nye̱ne̱ cigga̱c. Iróng bali enne abaci gi̱i̱ imma. Abarik zin bali enne a̱da̱i̱ zo̱ze̱ ci ol cik ogon kaal cik gerzek kar kanyahak nogo Ta̱mu̱ta̱dde̱n, a̱ru̱we̱ bali enne ka̱da̱k, ma̱i̱je̱ bali Vongizi aanyik nonno kurug.

¹⁹ Imma zin zo̱ze̱ ci Vongiz neci, uk Ki̱ri̱sto̱ uwahek zoz ci Ta̱mu̱ta̱dde̱no̱ vongizzok wak e̱ce̱bje̱ lagama.

²⁰ E̱e̱ggi̱n zin bali ol ne̱ke̱, ol cik abure Ta̱mu̱ta̱dde̱n bali reena e̱rki̱nya̱i̱ balik aave Nowa lo̱o̱ta̱ ngatu ke̱, ere bali Ta̱mu̱ta̱dde̱n nogo baling ngen Nowa adiman i̱bo̱ ke̱. Abarik zin bali i̱i̱te̱n neci anyigzai ol cik e̱e̱ggi̱n tu̱rge̱, imma ol do̱o̱k utuddudde maame.

²¹ Ogon zin maama ne̱k balik tawan neci ki ba̱ti̱ti̱mo̱ ci a̱gga̱me̱ke̱ ol, nonno nenen ci i̱yo̱ko̱ aruguzanung ko̱. Abarik zin ba̱ti̱ti̱mo̱ ommog maam cik arane e̱e̱ti̱ ele. I̱ye̱le̱kke̱t zoz necu gool ci kar naga kubunnta ngu̱me̱ ci Ta̱mu̱ta̱dde̱no̱ zi̱nze̱tti̱nne̱ cik abunna eci bali enne itingai Ye̱su̱ Ki̱ri̱sto̱ daiza.

²² I̱yo̱ko̱ zin, uk Ki̱ri̱sto̱ a̱vvu̱ ta̱mu̱-kenga kar kuk ka̱vvu̱ ngati Ta̱mu̱ta̱dde̱no̱ a̱tte̱ ci a̱zzo̱, urumte ki anjilonya ki alaat wak ta̱mu̱-kengo ki alaanzet do̱o̱k a̱gga̱m enne.