1 Peturu 2 - Tennet

Zu̱we̱ ci a̱li̱le̱

¹ Niga gotonogga ki ngonogga tu̱we̱nta̱, ki i̱yo̱ko̱ ming izetu ol cik a̱tu̱yyu̱ Ye̱su̱ Ki̱ri̱sto̱ ko̱, ma amarnonu, ma adaccu gonoggu, ma anyakku meder, ma ozozu ol gerzet, ma e̱e̱ggi̱nnu̱ ol cik a̱ru̱kku̱ talaben.

² U̱tu̱gu̱z ki dooli wak kidik aud i̱ra̱ cik caalek paz Vongizak, kar keela nogo ki̱ddi̱ki̱rre̱t ti̱ri̱ze̱nte̱ cinne̱ng.

³ U̱mu̱dda̱u̱ niga de̱de̱ een Manyi bunnatait.

Ogon Ye̱su̱ ki bee ci aruge udut

⁴ I̱vi̱tta̱k Ye̱su̱ Ki̱ri̱sto̱, een enne bee ci aave udut. Bee wa bali abure ol ke̱, abarik zin ba̱li̱ye̱ Ta̱mu̱ta̱dde̱n ci ahala nonno kar kirez.

⁵ I̱yo̱ko̱ zin, niga bu̱k izetu biyen wak abak udut wak eenyconik kize ce̱e̱z ci abahe Vongizi ci Ta̱mu̱ta̱dde̱no̱. Izetu niga olli wawaco wak a̱li̱le̱ bu̱k. Ma go̱o̱le̱ ci a̱ti̱ri̱zu̱ng Ye̱su̱ Ki̱ri̱sto̱ ko̱, ovvo atin niga anyikku Ta̱mu̱ta̱dde̱n muci ci atin aanyik nonno katalo.

⁶ Ki ming a̱du̱wa̱ Ta̱mu̱ta̱dde̱n Warage cinne: “Icinnet, karike anna bee ci riili oroot nginti een Zion, een bee ci atahalai kar kize ci abilne ce̱e̱z, imma e̱e̱ti̱ ci a̱tu̱ nonno iróng atin adak a̱li̱ya̱ni̱.”

⁷ I̱yo̱ko̱ niga ol wak a̱tu̱we̱ ko̱, riil bee necu. Ma̱i̱je̱ ol wak iróng a̱tu̱we̱, “Okko bee bali abure ol wak eenyce ko̱ ize bee ci abilne ce̱e̱z kommog veelek.”

⁸ Azi bo̱do̱k ne, “Een enne bee ci adir ol kamarmarit, bee ci aanyik nogo ku̱yu̱kte̱.” Alam bee nogo eci iróng nege o̱ngo̱o̱le̱ kaviyak cik Ta̱mu̱ta̱dde̱no̱ bali odola enne kize cinne̱ng.

⁹ Abarik e̱e̱ggi̱nnu̱ niga zu̱we̱ ci atahala Ta̱mu̱ta̱dde̱n, olli wawaco ce̱e̱ze̱ cinne, zu̱we̱ ci a̱li̱le̱, ol cik Ta̱mu̱ta̱dde̱no̱, kar inatit nonno eci anyahaung ngati mu̱hu̱ri̱ kar icinnet ngintinne voori.

¹⁰ “Iróng niga ba̱li̱ye̱ e̱e̱ggi̱nnu̱ ol cik Ta̱mu̱ta̱dde̱no̱. I̱yo̱ko̱ zin izetu niga ol ciginnek. Ba̱li̱ye̱ ngen niga urubta deten cinne, imma zin i̱yo̱ko̱ urubtau.”

Abaito ki i̱yo̱ko̱ du̱cca̱ha̱ cik Ta̱mu̱ta̱dde̱no̱

¹¹ Niga gotonogga ki ngonogga tu̱we̱nta̱, e̱e̱ggi̱nnu̱ niga e̱re̱nno̱k lo̱o̱ce̱ cu. Kilalekkung aarta e̱le̱tti̱ kaale cik gerzek amin zi̱nze̱tti̱ cuggo̱k, eci anyaha zoz necu jo̱o̱re̱ zi̱nze̱tti̱nne̱ cuggo̱k.

¹² Aanycik ol kicinnet baiz cunno̱ng ming abunna orgene ci ol wak iróng a̱gga̱ Ta̱mu̱ta̱dde̱n, ma̱i̱je̱ nu̱nu̱n ming orong nege kimertung azi ne, abacu niga. Ovvo atin nege i̱i̱te̱ne̱ ci okko Ta̱mu̱ta̱dde̱n ettede lo̱ki̱ko̱, a̱di̱ngdi̱nga̱n Ta̱mu̱ta̱dde̱n kar koobtek Ta̱mu̱ta̱dde̱n kaal cik abunna ogonnu niga ba̱li̱ye̱.

¹³ Aanycik e̱le̱tti̱ ciggo̱k alaat zo̱ze̱ ci Manyi, abunna ming elemannu alaanzet ci e̱e̱t ci diiri a̱gga̱me̱ lo̱o̱c ngatu ko̱ do̱o̱k, ommogje alaan ci riili oroot.

¹⁴ O̱to̱ngo̱o̱ltte̱ bo̱do̱k alaat wak i̱tto̱na̱ enne kar ki̱vi̱ta̱ kettedek ol wak ogon kaal cik gerzek lo̱ki̱ko̱ kar bo̱do̱k kinnatit ol wak ogon kaal cik abunna.

¹⁵ Orong Ta̱mu̱ta̱dde̱n i̱ge̱ta̱ abunna ming ogonnu kaal cik abunna kar amarta ol wak a̱zze̱ o̱o̱tti̱ tarbalik ozozung i̱ge̱ta̱ go̱o̱le̱ ci gerze.

¹⁶ Abaito zin labak, ma anyikku baiz ci abakku ko̱ kize baiz ci ogonnu kaal cik gerzek. Abarik zin a̱vvu̱t izet du̱cca̱k wak Ta̱mu̱ta̱dde̱no̱ wak een de̱de̱.

¹⁷ O̱to̱ngo̱o̱ltte̱ ol do̱o̱k, irezit ol wak a̱tu̱ Ta̱mu̱ta̱dde̱n, akatek Ta̱mu̱ta̱dde̱n u̱zu̱ngtti̱ lo̱o̱c, o̱to̱ngo̱o̱ltte̱ bo̱do̱k alaat.

¹⁸ Du̱cca̱k, abunna ming elemnyyu zoz wa a̱du̱wa̱ alaata cuggo̱k kar bo̱do̱k irezit nogo. Ma ogonikku kaal ne̱ko̱ ol wak i̱i̱rke̱ do̱, abarik u̱tu̱gu̱zze̱k ol wak ogon kaal cik gerzek bu̱k.

¹⁹ A̱ma̱yu̱kku̱ng atin Ta̱mu̱ta̱dde̱n ming nu̱nu̱n a̱gi̱ddu̱ng ol gaganiko eci o̱ngo̱o̱li̱nnu̱ niga Ta̱mu̱ta̱dde̱n.

²⁰ Iróng atin i̱nna̱ amuda gi̱i̱ imma ming a̱gi̱ddi̱ ol zo̱ze̱ ci gerze ogoni i̱nna̱ kar niim ru̱we̱ne̱t. Abarik, ming a̱gi̱ddi̱ ol zo̱ze̱ ci abunna ogoni i̱nna̱, kar niim ru̱we̱ne̱t ci ollu, a̱ma̱yu̱ki̱ atin Ta̱mu̱ta̱dde̱n.

²¹ Atahalaung ba̱li̱ye̱ Ta̱mu̱ta̱dde̱n kar ipirta kaale cik gerzek, ki bali ming apirna Ki̱ri̱sto̱ ngatinno̱ng ke̱. I̱ye̱le̱kku̱ng enne gool necu kar unuwet.

²² “Ngen enne ku̱tu̱gu̱ mu̱nye̱n icima kamuda zoz ci een volong utuge cinne.”

²³ Ming nu̱nu̱n odom ol nonno, iróng enne abarizek nogo kodom bu̱k, ma baling apirna enne lo̱o̱ta̱ ngatu ke̱, ngen enne kutuburek e̱e̱t imma nong. Abarik zin enne a̱tu̱ Ta̱mu̱ta̱dde̱n wa apahek ol lo̱ki̱ko̱ ju̱rru̱m.

²⁴ Atala Ye̱su̱ mu̱nye̱n cigga̱c. Odode ba̱li̱ye̱ enne keete wa een ta̱la̱ke̱c kar naga abunna ming kunnek mu̱nye̱n lo̱o̱c kar ka̱vvu̱t baize ci abunna. I̱di̱lle̱t enne agit ngodocete wak balik a̱ru̱we̱ ol nonno ke̱.

²⁵ Ogonnu niga ba̱li̱ye̱ ki a̱zza̱ wak ajali. Imma zin i̱yo̱ko̱ oboddau, i̱vi̱ta̱u̱ tuwayoit wa azunne ruget cunno̱ng.