1 Ko̱ri̱nto̱ 8 - Tennet

Da̱i̱ne̱t cik apahek ol ta̱mu̱ta̱dde̱ne̱t cik adimanai azzine

¹ Korongi ku̱du̱wa̱u̱ng zoz ci obod ki da̱i̱ne̱t wak aanyik ol ta̱mu̱ta̱dde̱ne̱t wak adimanai azzine. Ka̱gga̱ naga do̱o̱k kanyak naga genyiz. Aanyyet genyizi kodongit e̱le̱tti̱. Ma̱i̱je̱ rezinet aanyyet ka̱vvu̱t labak kodoit kak.

² Imma e̱e̱ti̱ ci odong ele, azi ne kegenyi ka̱gga̱ kaal do̱o̱k, iróng enne a̱gga̱ gi̱i̱ imma, ki ming i̱no̱n enne ko̱.

³ Imma e̱e̱ti̱ ci irez Ta̱mu̱ta̱dde̱n, a̱gga̱ Ta̱mu̱ta̱dde̱n nonno.

⁴ I̱yo̱ko̱ zin, imma zo̱ze̱ ci obod ki da̱i̱ne̱t cik kadak naga apahek ol to̱do̱yyo̱k cik e̱e̱ggi̱n ta̱mu̱ta̱dde̱ne̱t cigge̱k, ka̱gga̱ naga to̱do̱yyo̱k ne̱ko̱ e̱e̱ggi̱n kaal cik iróng anyak doiz. Anyak Ta̱mu̱ta̱dde̱n co̱de̱ ṯok lo̱o̱ta̱ ngatu.

⁵ Ma wo̱ye̱ nu̱nu̱n ming anyak kaal cik meelek a̱di̱ngdi̱nga̱n ol kize ta̱mu̱ta̱dde̱ne̱t cigge̱k, icima ta̱mu̱-kenga ki lo̱o̱ta̱,

⁶ ka̱gga̱ naga anyak Ta̱mu̱ta̱dde̱n wa een Be̱e̱ti̱nna̱ o̱de̱ ṯok niko. A̱vvu̱ kaala do̱o̱k ngatinne, kabak naga do̱o̱k zo̱ze̱ cinne; anyak Manyi Ye̱su̱ Ki̱ri̱sto̱ co̱de̱ ṯok niko, a̱vvu̱ kaala do̱o̱k ki ruget ci kabahe naga ko̱ do̱o̱k zo̱ze̱ cinne.

⁷ Ma̱i̱je̱ i̱yo̱ko̱, iróng ol do̱o̱k a̱gga̱ zoz necu. Ngen ol uggak irez to̱do̱yyo̱k wak adimanai azzine kize ta̱mu̱ta̱dde̱ne̱t cigge̱k, ming ovvo adak da̱i̱ne̱t cigge̱k, i̱no̱n nege apahek ta̱mu̱ta̱dde̱ne̱t cik aruge. A̱gga̱ zi̱nze̱tti̱nne̱ cigge̱k abaccit nege, eci ngen i̱no̱ni̱ cinne̱ng iróng okkomi.

⁸ Abarik iróng zin da̱i̱ne̱t anyahannet kizet ojontte ki Ta̱mu̱ta̱dde̱n; iróng naga kapirna ming iróng naga kadak da̱i̱ne̱t ne̱ke̱, i̱llo̱i̱ gi̱i̱ imma ci abunna ming kadak naga da̱i̱ne̱t ne̱ke̱.

⁹ Abunna zin ming egenyyu, u̱tu̱gu̱z kaal cik acinnu niga abunna ngatinno̱ng go̱o̱le̱ ci iróng anyike ol cik amuje o̱o̱tti̱ ku̱tu̱gu̱zzo̱ mu̱nye̱n.

¹⁰ Ming anyak e̱e̱t ci iróng zinin cinne anime ku̱tu̱gu̱ kaal ne̱ko̱, ming okko enne acinnin, i̱nne̱ta̱ ci anyai genyiz ko̱ ci aave ngati gon atuve ol ta̱mu̱ta̱dde̱ne̱t cik adimanai azzine ko̱, kar bo̱do̱k adait da̱i̱ne̱t cik atuve ol ta̱mu̱ta̱dde̱ne̱t niko, kar enne bu̱k kodola kadak da̱i̱ne̱t cik atuveku ta̱mu̱ta̱dde̱ne̱t cik adimanai keene ko̱.

¹¹ Baling okko adak da̱i̱ne̱t wak i̱no̱n enne gerzek ko̱ zo̱ze̱ ci acinni enne i̱nne̱ta̱, egerzannu zin i̱nna̱ nonno. Iróng zin abunna ming okolozi gotonnu bali a̱da̱i̱ Ye̱su̱ Ki̱ri̱sto̱ zo̱ze̱ cinne ko̱.

¹² Ma go̱o̱le̱ necu abaccu niga ngati anyikku gotonogget cik amuje o̱o̱tti̱ kabaccit, u̱tu̱gu̱zzu̱ niga mu̱nye̱n ngati Ki̱ri̱sto̱.

¹³ I̱yo̱ko̱ zin, ming kanyike anna gotona tu̱we̱nta̱ kadak gi̱i̱ ci iróng enne orong kar ku̱tu̱gu̱ mu̱nye̱n, iróng bo̱do̱k anna ngen kadai da̱i̱ne̱t ne̱ke̱ udut, gerza ming kanyike nonno ku̱tu̱gu̱ mu̱nye̱n.